YoNGʻIN XAVFSIZLIGI OYLIGIDA FAOL BOʻLAYLIK

Mamlakatimizda joriy yilning 15-noyabridan 15-dekabrgacha yongʻin xavfsizligi oyligi deb eʼlon qilindi. Oylikdan maqsad – iqtisodiyot tarmoqlari va ijtimoiy soha obʼektlari, shuningdek, uy-joy fondini yongʻin xavfsizligi talablariga muvofiq holga keltirish hamda oʻta muhim davlat ahamiyatiga molik yoki yongʻin xavfi yuqori boʻlgan obʼektlarda yongʻin xavfsizligi boʻyicha kompleks chora-tadbirlarni amalga oshirishdan iborat.

Oylik doirasida tumanimizda ham barcha korxona, muassasa va tashkilotlar, shuningdek, aholi turar joylarida yongʻin xavfsizligini taʼminlash ishlari olib borilmoqda.

Tuman hududidagi aholi xonadonlarida targʻibot-tashviqot ishlari olib borildi va koʻp qavatli uylardagi isitish qozoni moʻrikonlaridagi nosozliklar bartaraf etildi. Bunda tegishli tashkilotlar bilan hamkorlikda ish olib borildi. Oylik doirasida yangidan qad koʻtarayotgan koʻp qavatli binolarda ishlovchi ishchi-xizmatchilarga ham qurilishda xavfsizlikka eʼtiborli boʻlishlari lozimligi tushuntirildi. Tunda ishchilar tunab qoladigan joylar ham koʻzdan kechirildi va kamchiliklarni bartaraf etishi kerakligi aytilib, muhim tavsiyalar berildi.

Tadbirlar davomida qoʻl-bola elektr saqlagichlardan, isitish pechlaridan, nosoz dudboʻronlardan foydalanish, gaz taʼminotiga rezina shlanglar orqali ulanish kabi kamchiliklar aniqlanib, tegishli idoralar bilan hamkorlikda bartaraf etilmoqda. Yongʻin xavfsizligi qoidalarini buzgan shaxslarga nisbatan maʼmuriy choralar koʻrilib, nosoz elektr moslamalaridan foydalanish holatlariga chek qoʻyilmoqda.

Shuningdek, fuqarolarga yongʻin xavfsizligi qoidalari aks etgan eslatmalar tarqatilmoqda. Amalga oshirilayotgan barcha tadbirlar natijasida yongʻin sodir boʻlish holatlarining sezilarli ravishda kamayishiga erishilmoqda.

Aziz yurtdoshlar, oylik doirasidagi tadbirlarda faol boʻlaylik va uning talablariga rioya etishni unutmaylik!

B.Allaberganov, tuman FVB NTB boshligʻi.