YaNGIOBOD VA BOYOVUL MAHALLA FUQAROLAR YIGʻINLARI UChUN YaNGI MAʼMURIY BINOLAR QURILIB, FOYDALANIShGA TOPShIRILDI

Oʻzbekiston Respublikasi Prezidentining 2020-yil 18-fevral kungi “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni va hamda 2020-yil 18-fevraldagi “Mahalla va oilani qoʻllab-quvvatlash vazirligi faoliyatini tashkil etish toʻgʻrisida”gi Qarori bilan fuqarolar yigʻinlari oldida turgan asosiy vazifalar va ularning faoliyat yoʻnalishlari belgilab berildi.

Mazkur farmon va qarorlar fuqarolar yigʻinlari faoliyatini yangi bosqichga koʻtarishda, fuqarolar yigʻinlari xodimlari uchun munosib sharoitlar yaratishda muhim dasturilamal boʻlmoqda.

Amudaryo tumanidagi Yangiobod va Boyovul mahalla fuqarolar yigʻinlari shu kungacha oʻz maʼmuriy binosi yoʻqligi sababli boshqa tashkilot binolarida ijara asosida faoliyat yuritib kelayotgan edi.

Yigʻin maʼmuriyati, qolaversa, mahalla ahli uchun qulaylik yaratish maqsadida mazkur mahalla fuqarolar yigʻinlariga davlat-xususiy sherikchilik shartlari asosida yangidan bino qurib berildi.

4-dekabr kuni Yangiobod va Boyovul mahalla fuqarolar yigʻinlari uchun bunyod etilgan yangi binolarning ochilish marosimi oʻtkazildi. Marosimda Qoraqalpogʻiston Respublikasi Mahalla va oilani qoʻllab-quvvatlash vaziri Sagʻindiq Turmanov, tuman Mahalla va oilani qoʻllab-quvvatlash boʻlimi boshligʻi Alisher Yuldashev, boʻlim boshligʻining birinchi oʻrinbosari Muqaddas Beknazarova, nuroniylar masalalari boʻyicha oʻrinbosari Bahodir Boltaboyev, fuqarolar yigʻini xodimlari va mahalla faollari hamda bir guruh nuroniylar ishtirok etishdi.

Yangiobod mahalla fuqarolar yigʻini maʼmuriy binosi “Viktoriya xolding”, masʼuliyati cheklangan jamiyati tomonidan zamonaviy loyihalar asosida qurib bitkazildi. Loyiha qiymati 260 mln soʻm boʻlgan mazkur bino qisqa fursat ichida, sifatli tarzda bunyod etildi.

Ochilish marosimida soʻzga chiqqanlar yigʻilganlarni va mahalla ahlini yangi binoning foydalanishga topshirilishi bilan qutladilar.

Qoraqalpogʻiston Respublikasi Mahalla va oilani qoʻllab-quvvatlash vaziri tomonidan Yangiobod mahalla fuqarolar yigʻiniga kompyuter sovgʻa qilindi.

Binoda fuqarolar yigʻini raisi va oʻrinbosarlari, kotibi va boshqa aʼzolari, yigʻin huzuridagi komissiyalar uchun maxsus xonalar mavjud boʻlib, binoning mahalla hududida, aholiga yaqin joylashgani barcha uchun birdek qulaylik yaratadi.

Boyovul mahalla fuqarolar yigʻinining binosi “Norboy Mebel” masʼuliyati cheklangan jamiyati tomonidan qurib bitkazildi. Qurilish ishlariga 260 mln soʻm mablagʻ sarflandi.

Binoning ochilish marosimida Qoraqalpogʻiston Respublikasi Mahalla va oilani qoʻllab-quvvatlash vaziri Sagʻindiq Turmanov, tuman Mahalla va oilani qoʻllab-quvvatlash boʻlimi boshligʻi Alisher Yuldashev va boshqalar soʻzga chiqib, mamlakatimizda fuqarolar yigʻinlarini har tomonlama qoʻllab-quvvatlash, mahallaning jamiyatdagi nufuzini oshirish boʻyicha keng koʻlamli islohotlar amalga oshirilayotganini taʼkidlab oʻtdilar.

Tadbir davomida “Mahalla” xayriya jamoat fondi tuman boʻlinmasi tomonidan har ikkala, yaʼni Yangiobod va Boyovul mahalla fuqarolar yigʻinlariga jami 14 mln 480 ming soʻmlik, har bir mahallaga 3 ta jamlanmadan iborat mebel toʻplamlari topshirildi.

Har ikkala mahallada boʻlib oʻtgan yangi maʼmuriy binolarining ochilish marosimida qatnashgan fuqarolar yigʻini xodimlari va mahalla faollari zamonaviy uslubda qurilgan binoda ishlash uchun barcha sharoitlar yaratilganligini, bu yerda faqat sidqidildan ishlash kerakligini aytib oʻtishdi va bunday sharoit yaratib bergan Prezidentimizga, Qoraqalpogʻiston Respublikasi Mahalla va oilani qoʻllab-quvvatlash vazirligiga, tuman hokimiga hamda Mahalla va oilani qoʻllab-quvvatlash boʻlimiga, quruvchilarga oʻz minnatdorchiliklarini bildirishdi.

Dildora ABDURAHMONOVA.