56-SONLI MAKTABDA FAN OYLIGI MUVAFFAQIYaTLI YaKUNLANDI

Keyinggi yillarda barcha umumtaʼlim maktablarida fan oyligii oʻtkazilib, oʻquvchilarning fanlarga boʻlgan qiziqishlarini oshirishga erishilmoqda. Fan oyligi doirasida oʻtkazilayotgan ochiq darslar va turli mavzulardagi bellashuvlar oʻquvchilar ong va bilim darajalarining oshishida muhim omil boʻlayotir.

Tumanimizdagi 56-sonli umumtaʼlim maktabida ham noyabr oyi uchun belgilangan fan oyligi oʻqituvchi va oʻquvchilar faolligida, namunali tarzda oʻtkazildi.

“Rus va xorijiy tillar fan oyligi” deb nomlangan mazkur oylik davomida maktabning 23 ta sinfida rus tili fani boʻyicha va 23 ta sinfida ingliz tili fani boʻyicha bir qancha ochiq darslar, mashgʻulotlar va bellashuv tadbirlari oʻtkazildi.

Fan oyligi davomida oʻquv-tarbiya jarayonining sifatini, fan oʻqituvchilarining pedagogik mahoratini oshirish, ularning qobiliyat va isteʼdodlarini roʻyobga chiqarish yuzasidan bir qancha ishlar amalga oshirildi.

Ushbu fan oyligi jarayonida oʻqituvchilarning zamonaviy uslublardan keng foydlanishlariga, pedagogik texnologiyalarni takomillashtirishlariga va taʼlim-tarbiya borasida yaxshi natijalarga erishishlariga alohida eʼtibor berildi.

Fan oyligi davomida ayniqsa maktabning rus tili fani oʻqituvchilari Laylo Fayzullayeva, Gulnora Joldiboyeva va Muharram Qurbonboyevalar faol harakat qilishib, rus tili fani oʻqitilishida yaxshi natijalarga erishdilar.

Fan oyligining birinchi haftaligida eng chiroyli husnixat va eng chiroyli rasm chiqish boʻyicha bellashuvlar oʻtkazilib, kirish testlari olindi. Ikkinchi haftalikda ifodali oʻqish boʻyicha musobaqalar, uchinchi haftalikda esa “Oltin kuz” mavzusida ochiq darslar oʻtkazildi.

Rus tili fani oʻqituvchilari Laylo Fayzullayevaning 11“B”-sinfda, Gulnora Joldiboyevaning 10“A” va 8 “B”-sinflarda, Muxarram Qurbonboyevaning 10“V” va 3 “B”-sinflarda oʻtkazgan ochiq darslari barcha oʻquvchilarda katta qiziqish uygʻotdi.

Fan oyligining  toʻrtinchi haftaligida oʻtkazilgan yakunlovchi testlar va bellashuv tadbirlari maktab oʻquvchilarida rus tiliga boʻlgan qiziqishining yanada oshishiga omil boʻldi.

Joriy yilning 30-noyabr kuni maktabda fan oyligi yakuni boʻyicha alohida tadbir oʻtkazilib, unda oʻquvchilar ishtirokida rus tilida savol-javoblar va badiiy chiqishlar tashkil etildi, zukko oʻquvchilar ragʻbatlantirildi.

Ayni kunda maktabda navbatdagi fan oyligi doirasida amalga oshiriladigan ishlarga ham qizgʻin tayyorgarlik koʻrilmoqda.

Allambergan JUMANIYoZOV, maktabning ijodiy-madaniy masalalar boʻyicha targʻibotchisi.