“Sport nafislik va salomatlik manbai” shiori ostida ayol-qizlar oʻrtasida gimnastrada sport musobaqalari oʻtkazildi

Qoraqalpogʻiston Respublikasi Vazirlar Kengashining 2021-yil 4-noyabrdagi “Respublikada sportning gimnastarada (gimnastika barcha uchun) turini yanada rivojlantirish toʻgʻrisida”gi bayoni ijrosini taʼminlash maqsadida Amudaryo tuman hokimi Sultonboy Yoʻldashev rahbarligida joriy yilning 15-noyabr sanasida tumandagi barcha korxona va tashkilotlar va tadbirkorlik  subʼektlari ishtirokida yigʻilish oʻtkazilib, tumanda 2021-yil  noyabr oyida “Sport – nafislik va salomatlik manbai” shiori ostida gimnastrada sport musobaqalarini  tashkil etish hamda ushbu musobaqalarga tumandagi barcha korxona va tashkilotlar, tadbirkorlik subʼektlarida faoliyat olib borayotgan xotin-qizlarni keng jalb qilish vazifasi topshirilgan edi.

Mazkur vazifaning amaliy ijrosini taʼminlash, gimnastrada sporti musobaqalarini yanada ommalashtirish maqsadida  tuman hokimining yoshlar masalalari boʻyicha oʻrinbosari M.Shermetov, tuman Mahalla va oilani qoʻllab-quvvatlash boʻlimi boshligʻi A.Yuldashev, Turizm va sport boʻlimi rahbari Gʻ.Qurbonboyevlar hamkorligida joriy yilning 25-26-noyabr kunlari “Sogʻlom ayol – buyuk kelajak” gʻoyasi asosida “Sport – nafislik va salomatlik manbai” shiori ostida keng qamrovli gimnastrada musobaqalari tashkil etildi.

Musobaqalarni yuksak saviyada oʻtkazishga qaratilgan chora-tadbirlarga koʻra, musobaqa oʻtkaziladigan joy gimnastrada sporti logotipi tushirilgan bannerlar bilan bezatilib, obodonlashtirish ishlari olib borildi. Musobaqa ishtirokchilarining xavfsizligini taʼminlashga qaratilgan chora-tadbirlarga muvofiq, tuman Tibbiyot birlashmasi, Sanitariya-epidemiologiya osoyishtalik va jamoat salomatligi boʻlimi tomonidan mutaxassis shifokorlar navbatchiligi tashkil etilib, tibbiy niqoblar, antiseptik vositalar hozirlab qoʻyildi. Musobaqaning ochilish marosimida tuman Madaniyat boʻlimi sanʼatkorlari tomonidan musiqiy chiqishlar tashkil etildi.

Yoshlar ishlari agentligi tuman boʻlimi tomonidan musobaqada ishtirok etishni xohlovchi yoshlar safini yanada kengaytirish maqsadida, avvalo har bir korxona va tashkilotda, taʼlim sohasida faoliyat yuritayotgan ayol-qizlarning roʻyxati shakllantirilgani musobaqaning yanada qiziqarli taassurotlarga boy tarzda oʻtishini taʼminladi.

Joriy 2021-yil 27-noyabr sanasida esa tumandagi korxona va tashkilotlar, tadbirkorlik subʼektlarida faoliyat olib borayotgan xotin-qizlar jamoalari oʻrtasida “Sport - nafislik va salomatlik manbai” shiori ostida gimnastrada sporti musobaqalari doʻstona va samimiy ruhda oʻtkazildi.

Tuman Mahalla va oilani qoʻllab-quvvatlash boʻlimi, yoshlar ishlari agentligi tuman boʻlimi, Turizm va sport boʻlimi, Madaniyat boʻlimi, Bolalar-oʻsmirlar sport maktabi va boshqa hamkor tashkilotlar hamkorligida Amudaryo tumani Bolalar-oʻsmirlar sport maktabi sport zalida boʻlib oʻtgan mazkur musobaqa tumanimizda ayol-qizlar oʻrtasida sogʻlom turmush tarzini qaror toptirish, gimnastrada sport turini qoʻllab-quvvatlash yanada rivojlantirish va ushbu sport turini ommalashtirish hamda yetuk sportchilarni yetishtirib chiqarishga qaratilgani bilan muhim ahamiyat kasb etdi.

Musobaqada jami 20 ta jamoadan 160 nafar ishtirokchilar qatnashdi.

Musobaqa yakunida I-oʻrinni 3-sonli maktabgacha taʼlim tashkiloti, 2-oʻrinni 6-sonli maktabgacha taʼlim tashkiloti, 3-oʻrinni 16-sonli ixtisoslashgan davlat umumtaʼlim maktabi jamoalari egallashdi.

Gʻoliblar tuman hokimligining qimmatbaho sovgʻalari, Turizm va sport boʻlimining I-II-III-darajali diplomlari va tashakkurnomalari bilan taqdirlanishdi.

Musobaqaning ommaviyligini oshirish va aholining keng qatlamlari orasida keng yoyish maqsadidagi targʻibot tadbirlari davom etmoqda.

Musobaqa yakunida tumanimizning taniqli sanʼatkorlari musobaqa gʻoliblariga musiqiy tabrik yoʻlladilar.

Robiya YOʻLDOShEVA.