49-sonli maktabda xorijiy tillar fan oyligi doirasida bir qator tadbirlar oʻtkazildi

Umumiy oʻrta taʼlim maktablarida oʻquvchilarga qay darajada bilim berilayotganligi, oʻquvchilarning Davlat taʼlim standartlarida belgilangan bilim, koʻnikma va malakalarni qay darajada oʻzlashtirilayotganligini baholab borishda, taʼlim sifat va samaradorligini oshirishda fan oyliklari muhim ahamiyat kasb etadi. Shu bilan bir qatorda fan oyliklari iqtidorli oʻquvchilarning qobiliyatlarini maʼlum bir maqsadga yoʻnaltirish, isteʼdodli, izlanuvchan, ijodkor oʻqituvchilarni aniqlash, ularning tajribalarini ommalashtirish, taʼlim-tarbiya jarayonida qoʻllanilayotgan uslublarni takomillashtirishga ham xizmat qiladi.

Shu boisdan ham tumanimiz maktablarida oʻquv yilining har bir oyida maʼlum fanlar oyliklarini yuksak saviyada oʻtkazishga harakat qilinadi. Xususan, noyabr oyi xorijiy tillar fan oyligi, deya belgilanganligi munosabati bilan maktablarda fan oʻqituvchilari yosh avlodga chuqur bilim berish bilan birga, koʻpgina maʼnaviy, maʼrifiy tadbirlar oʻtkazishib, butun salohiyatini namoyish etishmoqda, ijodkor oʻquvchilarga alohida eʼtibor qaratilmoqda.

49-sonli umumiy oʻrta taʼlim maktabida ham noyabr oyi boshida oylik doirasida amalga oshiriladigan ishlar rejasi tasdiqlanib, shu asosda har bir xorijiy tillar oʻqituvchilari oʻzlari  dars berayotgan sinflar oʻquvchilari  bilan darsdan tashqari mashgʻulotlar, savol-javob kechalari, adabiy suhbatlar tashkillashtirmoqdalar.

Shunday tadbirlardan biri shu yil.... noyabr kuni boʻlib oʻtdi. Fan oyligi doirasida boʻlib oʻtgan maʼnaviy-maʼrifiy tadbirda maktabning nemis tili fani oʻqituvchisi Gulchehra Sadatova oʻzi taʼlim berayotgan sinfda oʻquv rejaga asosan, axborot kommunikatsion vositalar asosida dars oʻtdi. U darsida oʻquvchilarning joriy oʻquv yili davomida olgan bilim va koʻnikmalarini namoyish qilish maqsadida avvalgi darslarda olgan bilimlarini takrorlash savol-javoblari orqali koʻrsatib berdi. Shuningdek, uyga berilgan topshiriq ijrosini ham nazorat qildi. shu kungi dars mashgʻuloti mavzusi tushuntirilib, oʻquvchilar bilimini mustahkamlash uchun savol javoblarga ham oʻrin berildi. Oʻquvchilar oʻzlar olgan nemis tilidagi sheʼrlaridan namunalar ham oʻqidilar.

Shu kuni fan oyligi doirasidagi tadbirda maktabning rus tili fani oʻqituvchilari Roza Yernazarova, Oʻrozboy Aliyevlar ham oʻquvchilarining olgan bilimlarini namoyish etdilar. Oʻquvchilar ijro etgan sheʼrlar, rus xalq qoʻshiqlari, raqslari ularning ijodiy qobiliyatlari ham yuqori ekanligini koʻrsatdi.

Navbat ingilz tili fani oʻqituvchilari Goʻzal Safarboyeva, Osiyo Sobirovalarga berildi. Ular oʻquvchilarga ingliz tilini oʻqitishi borasida oʻz tajribalari, erishayotgan yutuqlari xususida gapirdilar. Ulardan taʼlim olayotgan oʻquvchilarning ingliz tilida ijro etgan qoʻshiqlari, sheʼrlari barchaning havasini keltirdi.

Tadbirda faol qatnashib, oʻz iqtidorlarini namoyish etgan oʻquvchilar maktab maʼmuriyati tomonidan ragʻbatlantirildi. Maktab direktorining maʼnaviy-maʼrifiy ishlari boʻyicha oʻrinbosari Ramatilla Ortiqov tadbirni namuna tashkil etganlari uchun tashkilotchilar – xorijiy tillar oʻqituvchilariga minnatdorchilik bildirdi.

Tadbir oʻquvchilarning xorijiy tillarni oʻrganishga qiziqishlarini oshirdi. Axir til bilgan – el biladi.