“YaShIL MAKON” LOYIHASI TUFAYLI YaShIL MAYDONLAR KENGAYaDI

Prezidentimiz tomonidan respublikamiz boʻylab “Yashil makon” umummilliy loyihasi doirasida daraxt va buta koʻchatlarini ekish hamda yashil maydonlarni koʻpaytirish dolzarb vazifa qilib belgilab berildi. Loyiha asosida eʼlon qilingan “Dolzarb 40 kunlik” tadbiri doirasida Amudaryo tumanida ham keng koʻlamli ishlar amalga oshirilmoqda. Dastlabki lavhamiz shu xususida.

Daraxtlar havodagi zararli karbonat angidridni yutib, kislorodga aylantiradi va havo  musaffoligini saqlab turadi. Yashil daraxtlar bahor, yoz, kuz fasllarida chor-atrofga fayz bagʻishlab, oftob tigʻidan, chang toʻgʻonlardan asraydi. Biroq, daraxtlarni ekib koʻpaytirishga, borini parvarishlab, avaylashga  doimo ham eʼtibor beravermaymiz. Aksincha, oʻz nafsini oʻylagan baʼzilar ehtiyoj uchun daraxtlarni kesishdan ham, oʻrmonlarga zarar yetkazishdan ham toyishmayapti. Bu hol faqat bizning yurtimizga xos emas. Maʼlumotlarga koʻra, hozirgi kunda dunyo boʻyicha 3 trln. atrofida daraxt mavjud, biroq har bir daqiqada ularning 24 ta futbol maydoniga teng qismi kesilmoqda.

Agar ahvol shu zaylda davom etsa, yozda issiqdan, qishda sovuqdan pana qiladigan, chor-atrofimizdagi shovqin-surondan himoya qiladigan, rizqimiz yetiladigan mevali daraxtlarga, atrofga fayz berib turgan manzarali daraxtlarga qiron keltiraversak, oxiri nima boʻladi?

Buningdek ayanchli oqibatning oldini olish yuzasidan barcha mamlakatlarda boʻlgani kabi bizning yurtimizda ham koʻpgina amaliy ishlar qilinayapti.

Prezidentimiz tashabbusi eʼlon qilingan “Yashil makon” umummilliy loyihasi ham bu boradagi ezgu qadamlardan biridir. Loyiha  doirasida har yili 200 million tup daraxt va buta koʻchatlarini ekish rejalashtirilgan. Natijada yashil makonlar kengayadi. Bunda har bir hududning tabiatiga mos, odamlarda allergiyalar keltirib chiqarmaydigan manzarali, mevali daraxtlar va butalarni ekish koʻzda tutilganligi ayniqsa ahamiyatlidir.

Tumanimizda ham “Yashil makon” umummilliy loyihasi doirasida koʻchat ekish ishlari qizgʻin davom etmoqda. Korxona,  tashkilotlar, oʻquv muassasalari, xodimlari, ovul va mahallalar aholisi bu harakatda  faol ishtirok etmoqdalar. Shuningdek, tuman Obodonlashtirish boshqarmasi, fermer xoʻjaliklar ishchilari ham jalb etilgan.

2021-yil kuz, 2022-yil bahor mavsumida tumanimiz ovul va mahallalari hududlariga 271 ming 500 tup manzarali, mevali  daraxtlar, butalar ekilishi rejalashtirilgan. Shu kungacha esa 47 ming tupdan ortiq koʻchatlar oʻtqazildi.

Tumanimizdagi fermer xoʻjaliklari ekin yer maydonlari chetlariga, ariqlar boʻylariga 2021-yil kuz va 2022-yil bahor mavsumlarida 43 million 618 ming tup virgen archasi, jiyda, tut, terak, yongʻoq, uzum kabi mevali va manzarali daraxtlar, butalar ekilishi rejalashtirilgan edi.

Ayni kunlarda bu borada qizgʻin ishlar olib borilayapti. Tuman miqyosida korxona, tashkilotlar, davlat idoralari xodimlari, umumiy oʻrta taʼlim muassasalari oʻqituvchi va oʻquvchilari oʻz hududlarini yashil maydonga aylantirish maqsadida koʻchat ekish ishlarini  uyushqoqlik bilan olib bormoqdalar.

“Yashil makon” – bu shunchaki loyiha emas. Yaqin yillar ichida ekologik muammolar tobora avj olayotgan yurtimiz yashil qiyofa kasb etadi, osmonimiz musaffo, chor-atrof yanada fayzli boʻladi.

Buning uchun esa har bir yurtdoshimizni loyiha doirasidagi tadbirlarda faol ishtirok etib, mevali va manzarali daraxt koʻchatlarini ekkan holda xayrli ishga hissa qoʻshishga chaqirib qolamiz.

Oygul RAJABOVA.