«Yashil makon» umummilliy loyihasi doirasida daraxt koʻchatlari ekilmoqda

Mamlakatimizda Prezident Shavkat Mirziyoyev tashabbusi bilan aholi yashash sharoitlarini yaxshilash, atrof-muhit musaffoligini taʼminlash masalalariga alohida eʼtibor qaratilmoqda. Ekologik vaziyatni inobatga olib, tabiatni asrash maqsadida daraxt ekish ishlari kun tartibidagi muhim masalaga aylanmoqda. Shu maqsadda davlatimiz rahbari “Yashil makon” umummilliy loyihasi va loyiha doirasida qator tadbirlarni amalga oshirish borasidagi ustuvor vazifalarni belgilab berdi.

4-noyabr kuni Amudaryo tumani hokimligida tumanda “Yashil makon” loyihasini amalga oshirish hamda bu boradagi vazifalar ijrosini taʼminlash maqsadida mutasaddi tashkilotlar rahbarlari ishtirokida yigʻilish oʻtkazildi.

Yigʻilishda Qoraqalpogʻiston Respublikasi Vazirlar Kengashi raisining maslahatchisi Nosir Eshonov, tuman hokimi Sultonboy Yoʻldashev, sektorlar rahbarlari, hokim oʻrinbosarlari, hokimlik masʼul xodimlari, korxona-tashkilotlar rahbarlari, mahalla va ovul fuqarolar yigʻinlari raislari hamda ommaviy axborot vositalari vakillari ishtirok etdilar.

Yigʻilishda tuman hokimi Sultonboy Yoʻldashev soʻzga chiqib, Prezident “Yashil makon” loyihasi doirasida yiliga 200 mln tup daraxt va buta koʻchatlarini ekish, shu orqali shaharlardagi yashil maydonlarni amaldagi 8 foizdan 30 foizga oshirish rejasini amalga oshirish maqsadida joriy yilning 2-noyabrdan 10-dekabrgacha boʻlgan vaqt oraligʻini  daraxt ekish boʻyicha “Dolzarb 40 kunlik” deya eʼlon qilgani haqida maʼlumot berib, tumanda ushbu umummilliy loyihani munosib tarzda oʻtkazish lozimligini, barcha birdam va hamjihat boʻlib, loyiha va uning doirasidagi tadbirlarda faol ishtirok etishi lozimligini taʼkidladi.

Shuningdek, yigʻilishda Qoraqalpogʻiston Respublikasi Vazirlar Kengashi raisining maslahatchisi Nosir Eshonov soʻzga chiqib, joriy yilning 2-noyabr sanasida Prezident Shavkat Mirziyoyev raisligida aholini uy-joy bilan taʼminlash hamda yashil maydonlarni kengaytirish chora-tadbirlari muhokamasi yuzasidan videoselektor yigʻilishida belgilab berilgan vazifalar xususida keng turda maʼlumot berdi.

Qayd etilishicha, davlatimiz rahbari Qoraqalpogʻiston Respublikasi, Navoiy, Sirdaryo, Xorazm  viloyatlarida “Dolzarb 40 kunlik” doirasida 14 mln tupdan mevali va manzarali daraxtlar, shuningdek tez oʻsuvchi va boshqa koʻchatlar ekilishi, ekologiya, daraxt ekish va parvarishlash masalalariga hokimlarning qurilish boʻyicha oʻrinbosari masʼul boʻlishi kabi qator vazifalarni belgilab bergan. Qolaversa, yigʻilishda ushbu loyihani amalga oshirishda Obodonlashtirish boʻlimlari maxsus texnika bilan taʼminlanib, zarur joylarda sugʻorish tarmoqlari barpo etilishi, muassasalar hovlisi, mahallalar, yoʻl va dala chetlariga daraxtlar ekish lozimligi taʼkidlandi.

Yigʻilish yakunlangandan soʻng mutasaddi rahbarlar koʻchat ekish ishlarini boshlab yubordilar. "Dolzarb 40 kunlik" doirasida koʻchat ekishning ikkinchi kuni uyushqoqlik bilan oʻtdi.

Tuman hokimi Sultonboy Yoʻldashev boshchiligida sektorlar rahbarlari, hokim oʻrinbosarlari, korxona-tashkilotlar rahbarlari, mahalla va ovul fuqarolar yigʻinlari masʼullari koʻchat ekishda faol ishtirok etdilar. 4-oktyabr kuni havo haroratining keskin pasayganiga qaramay, “Yashil makon” umummilliy harakati doirasidagi mevali va manzarali daraxtlar koʻchatlarini ekish ishlarida barcha masʼullar hamjihat boʻlib ishtirok etdilar.

Tadbir mobaynida tuman Favqulodda vaziyatlar boʻlimi, gaz va elektr tarmoqlari korxonalari masʼul xodimlariga havo hararati payishi sababli kelib chiqishi mumkin boʻlgan favqulodda holatlarning oldini olish borasida zarur topshiriqlar berildi. Aholining is gazidan zaharlanishing oldini olish, aholi oʻrtasida sovuq havo harorati kunlarida issiqlik va elektr energiyasidan toʻgʻri foydalanish yuzasidan tushuntirish-targʻibot ishlarini olib borish zarurligi taʼkidlandi.

 Tuman hokimligining Axborot xizmati.