Bolalar nafaqasini tayinlashdagi oʻzgarishlar tushuntirilmoqda
Mamlakatimiz Prezidenti Shavkat Mirziyoyev yurtimiz kelajagi hisoblanmish yosh avlod kamolotiga gʻamxoʻrlikni tobora kuchaytirmoqda. Ularning sogʻlom, barkamol boʻlib voyaga yetishlari, yurtimiz ravnaqiga munosib hissa qoʻshadigan, ilmli davrimizga munosib boʻlishlari uchun sharoitlarni yaratmoqda. Xususan, 2021-yilning 11-avgustida qabul qilgan “Kam taʼminlangan oilalarga moddiy yordam koʻrsatish hamda kambagʻallik bilan kurashish koʻlamini kengaytirish chora-tadbirlari toʻgʻrisida”gi Farmoni ham shu maqsadga qaratilganligi bilan ahamiyatlidir.
Bola tarbiyalayotgan oilalarni qoʻllab-quvvatlash tizimining samaradorligini oshirish, ijtimoiy himoya va koʻmakka muhtoj oilalar moddiy taʼminotini kuchaytirishga xizmat qiluvchi ushbu farmondagi oʻzgarishlarni aholiga keng targʻib qilish yuzasidan barcha ovul va mahallalar aholisi bilan Byudjetdan tashqari pensiya jamgʻarmasi tuman boʻlimi xodimlari uchrashuvlar oʻtkazishmoqda.
Shunday targʻibot tadbirlaridan biri Mangʻit shahridagi Doʻstlik mahallasida boʻlib oʻtdi. Mahalla fuqarolar yigʻini maʼmuriy binosida boʻlib oʻtgan uchrashuvda Byudjetdan tashqari pensiya jamgʻarmasi tuman boʻlimining masʼul xodimlari Azamat Kenjayev, Sirojiddin Jumaboyev, Sarvar Komiljonovlar yigʻilgan aholiga Prezidentimizning ushbu farmoniga koʻra yosh bolali oilalarni, moddiy yordamga muhtoj oilalarni qoʻllab-quvvatlash boʻyicha amaliyotga joriy qilingan oʻzgarishlar, ularning ahamiyati xususida batafsil tushuntirdilar.
Tadbirda taʼkidlandiki, shu yilning sentyabridan boshlab, 14 yoshgacha bolalari boʻlgan oilalarga nafaqa hamda bola 2 yoshga toʻlgunigacha uni parvarish qilish nafaqasi oʻrniga kam taʼminlangan oilalarga bolalar nafaqasi joriy etildi. Bunda inobatga olinadigan bolalar yoshi 14 yoshdan 18 yoshga oshirildi. Toʻlov muddati esa avvalgi 6 oy oʻrniga 12 oy qilib belgilandi. Nafaqa miqdorini esa oiladagi bolalar sonidan kelib chiqib belgilash tartibi oʻrnatildi.
Shuningdek, yakka-yolgʻiz boʻlgan fuqarolarga, farzandi boʻlmagan yoki barcha farzandlari 18 yoshdan katta boʻlgan kam taʼminlangan oilalarga oylik miqdori 380 ming soʻm moddiy yordam tayinlanadi.
2021-yil 1-sentyabrigacha tayinlangan 14 yoshgacha farzandlari boʻlgan kam taʼminlangan oilalarga nafaqa, esda tutish lozimki, bola 2 yoshga toʻlgunga qadar uni parvarish qilish nafaqasi hamda kam taʼminlangan muhtoj oilalarga moddiy yordam pullari muddatlari tugaguniga qadar avvalgi tartibda saqlanib qoladi.
Tadbirda ishtirok etgan mahalla aholisi vakillari maʼullarga oʻzlarini qiziqtirgan savollarni berib, atroflicha javoblar oldilar va Yurtboshimizning 2021-yil 11-avgustda qabul qilgan 6277-sonli Farmoniga muvofiq joriy etilgan oʻzgarishlar xususida chuqur bilimga ega boʻldilar.
Doʻstlik mahalla fuqarolar yigʻini masʼullari buning uchun Byudjetdan tashqari pensiya jamgʻarmasi boʻlimi xodimlariga minnatdorchilik bildirdilar
Oygul Rajabova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
