BOLALAR-OʻSMIRLAR SPORT MAKTABIDA BUTUNJAHON DZYuDO KUNI TANTANA QILINDI

Dunyoda ommaviyligi boʻyicha futboldan soʻng ikkinchi oʻrinda turadigan dzyudo – yakka kurash sport turining vatani Yaponiyadir. Ushbu sport turi boʻyicha ilk maktab ochgan ushbu yakkakurash asoschisi Dzigoro Kano sharafiga bu oʻyin dzyudo deb nomlangan.

Yaponiyada ushbu milliy sport turi juda ommalashgan, hatto 1907-yildan boshlib u maktab dasturiga majburiy fan sifatida  kiritilgan. 1964-yildan xalqaro olimpiya oʻyinlari dasturiga kiritilgan dzyudoga mamlakatimizda ham ulkan eʼtibor qaratilmoqda. Bu qator olimpiya  va jahon chempionatlarida yurtdoshlarimiz, tumanimiz sportchilari qoʻlga kiritayotgan yutuqlarda ham namoyon boʻlmoqda.

Dzyudo asoschisi Dzigoro Kano tavallud topgan kun sharafiga butun dunyoda  28-oktyabrda  Butunjahon dzyudo kunini keng nishonlash anʼanaga aylanib qolgan. Shu munosabat  bilan tumanimizda ham har yili  sana ulkan tantana qilinadi. Bu bejiz emas. Chunki tumanimizdan ham dzyudo boʻyicha taniqli sportchilar, Yevropa, Osiyo chempionati, xalqaro turnirlar gʻolib va sovrindorlari, “Tokio - 2020” olimpiya oʻyinlari ishtirokchisi yetishib chiqqan.

2020-yilda Butunjahon dzyudo kuni “Daraxt ek” shiori ostida oʻtkazilgan boʻlsa, joriy yilda ushbu  sana “Birdamlik” shiori ostida  oʻtkazildi.

Shu munosabat bilan 28-oktyabr kuni tuman Bolalar-oʻsmirlar sport maktabida ham tantanali tadbir tashkil etildi.

Tadbirga sport maktab trenerlari, tarbiyalanuvchilari va koʻpgina xalqaro musobaqalar gʻolibi,  “Tokio - 2020” olimpiya oʻyinlari ishtirokchisi, ushbu maktabda ilk dzyudo saboqlarini olgan Sharofaddin Boltaboyev ishtirok etdi.

Butunjahon dzyudo kuniga bagʻishlangan tadbirni sport maktabi direktori Chorsham Tojimurodov ochdi va yigʻilganlarni bayram bilan qizgʻin qutladi, mahoratli dzyudochilarni tarbiyalab voyaga yetkazayotgan murabbiylarning mashaqqatli ishlarida muvaffqiyatlar tiladi.

Mamlakatimizda bugungi kunda sportning barcha turlarini rivojlantirish hamda uning ommaviyligini taʼminlash borasida salmoqli ishlar olib borilmoqda. Xususan, dzyudo bilan shugʻullanuvchi yoshlar safi ham tobora kengaymoqda. Tumanimizda faoliyat yuritayotgan Bolalar-oʻsmirlar sport maktabi ham umidli sportchilarni tarbiyalashga xizmat qilmoqda.

Shuni alohida taʼkidlash joizki, ushbu sport maktabida  1360 nafar oʻsmir oʻquvchilar sportning 17 turi bilan shugʻullanishayotgan boʻlsa, shuning 250 nafardan ziyodi aynan sportning dzyudo turini tanlashgan. Ularga 7 nafar tajribali murabbiylar mashgʻulotlar olib borishayapti.

Shu boisdan ham Butunjahon dzyudo kuni har yili sport maktabda ulkan bayram qilinadi. Joriy yilgi tantanali tadbir ham yosh dzyudochilar va murabbiylarga juda yuqori kayfiyat bagʻishladi.

Tadbir soʻngida Sharofiddin Boltaboyev sport maktabning  dzyudo bilan shugʻullanayotgan yosh sportchilariga mahorat darsi oʻtdi va oʻzining ushbu dargohda tarbiyalangan davrlari bosib oʻtgan shonli sport yoʻli haqida gapirib berib, ularni yangi-yangi gʻalabalar sari ruhlantirdi.

Oygul RAJABOVA.