Qilichboy ovulida bogʻdorchilik sohasi rivojiga bagʻishlangan seminar boʻlib oʻtdi

Mamlakatimizda qishloq xoʻjaligining barcha sohalarini, shu jumladan, mevachilikni jadal rivojlantirish, tuproq unumdorligini, meva hosildorligini oshirish, mahsulot sifatini yaxshilash hamda ulardan qayta ishlash sanoatida tayyorlanadigan mahsulotlarni koʻpaytirishga, xalqimizning mevaga boʻlgan talabini toʻla qondirishiga alohida eʼtibor qaratilib, bu borada tizimli ishlar amalga oshirilmoqda.

Sohadagi samarali ishlar natijasida mamlakatimizda bogʻdorchilikka ixtisoslashgan fermer xoʻjaliklari soni yanada ortib, aholining mevaga boʻlgan talabi va ehtiyojlari toʻliq qondirilmoqda. Shuningdek, mevalarning hosildorligini oshirish, mahsulot sifatini koʻtarish hamda meva mahsulotini qayta ishlab, ularni chet mamlakatlarga eksport qilish borasida keng imkoniyatlar yaratilmoqda.

Bogʻbon fermerlar meva yetishtirishda uning hosildorligini keskin koʻtarish, mahsulot sifatini yaxshilash, quruq meva tayyorlash hajmini oshirish, aholini hamda qayta ishlash sanoatini xomashyo bilan toʻliq taʼminlab, yuqori sifatli mahsulotni chetga chiqarishda tinimsiz mehnat qilmoqdalar.

Aytish kerakki, bogʻdorchilikni yuqori pogʻonaga koʻtarishda fermerlarimiz ilm-fan yutuqlari va tavsiya etilgan texnologiyalarni oʻz vaqtida va yuqori agrotexnika darajasida amalga oshirishlari muhim ahamiyatga ega. Amudaryo tumani Qilichboy ovulida tashkil etilgan seminar ham bogʻdorchilikni yanada rivojlantirish maqsadiga yoʻnaltirildi.

9-oktyabr kuni tuman fermer, dehqon xoʻjaliklari hamda tomorqa yer egalari kengashi tashabbusi Qilichboy ovul fuqarolar yigʻini binosida tashkil etilgan seminarda intensiv bogʻlar uchun ilgʻor texnologiyalar asosida mevali koʻchatlar yetishtiruvchi “Mevali Prants” – Oʻzbekiston hududidagi ilk oʻzbek-turk qoʻshma kompaniyasi ijrochi direktori Mansur Rahimov ishtirok etdi. Shuningdek, seminarda tumandagi namunali tomorqa yer egalari, mehnatkash dehqonlar, fermer xoʻjaliklari rahbarlari qatnashdilar.

Seminarda mamlakatimizda oziq-ovqat xavfsizligini taʼminlash, aholining qishloq xoʻjaligi, ayniqsa, bogʻdorchilik mahsulotlariga boʻlgan ehtiyojini qondirish masalasiga alohida eʼtibor qaratilayotgani taʼkidlandi. Bogʻlarni ilmiy-agrotexnik tadbirlar asosida parvarishlash, yangilash, intensiv bogʻlar barpo etish, serhosil, ertapishar meva navlarini yaratish har tomonlama qoʻllab-quvvatlanib, keng imkoniyat va imtiyozlar yaratilayotganligi qayd etildi.

 Shuningdek, bogʻdorchilik sohasida amalga oshirilayotgan ilgʻor texnologiyalar, yangi navlar, sohani yanada rivojlantirishning asosiy omillari haqida keng koʻlamli maʼlumotlar berildi.

 Taʼkidlanishicha, bogʻlardan moʻl hosil olishda zarur boʻlgan agrotexnik tadbirlarni oʻz vaqtida yuqori darajada bajarilishi ustuvor ahamiyat kasb etadi. Tuproq-iqlim sharoitlarining qulayligi, meva turlari va ajoyib navlarining mavjudligi, ulardan yuqori, moʻl va sifatli hosil olish imkoniyatini beradi.

Charos Arslonova.