SAYLOVOLDI TARGʻIBOT-TAShVIQOT UChRAShUVI OʻTKAZILDI

Mamlakatimizda Oʻzbekiston Respublikasi Prezideni saylovi kuni tobora yaqinlashmoqda. Ayni kunlarda Prezidentlikka nomzodlarning ishonchli vakillari joylarda uchrashuvlar oʻtkazib, targʻibot-tashviqot ishlarini olib bormoqda.

24-oktyabr Oʻzbekiston Respublikasi Prezideni saylovi kuni. Ayni kunlarda davom etayotgan saylovoldi tashviqoti davomida prezidentlikka siyosiy partiyalardan koʻrsatilgan nomzodlarning dasturlari bilan saylovchilar yaqindan tanishtirilmoqda. Saylovchilarning oʻzi xohlagan nomzodga ovoz berishlarini tashkil qilish maqsadida barcha saylov uchastkalarida zarur shart-sharoitlar yaratilib, saylovga taxt qilib qoʻyildi.

Amudaryo tumanida ham prezidentlikka nomzodlarning ishonchli vakillari saylovoldi targʻibot-tashviqot uchrashuvlarida ishtirok etishmoqda.

Ana shunday saylovoldi targʻibot-tashviqot uchrashuvi tumandagi Qipchoq ovul fuqarolar yigʻinida ham oʻtkazildi. Unda Qipchoq ovul fuqarolar yigʻinining saylovchilar vakillari hamda yoshlar, Ekologik partiya aʼzolari ishtirok etdilar.

Uchrashuvda Oʻzbekiston Ekologik partiyasidan prezidentlikka nomzod Narzullo Oblomurodovning ishonchli vakili Berdax Jiyenbayev nomzodning tarjimai holi, mehnat faoliyati va saylovoldi dasturi mazmun-mohiyati bilan saylovchilarni batafsil tanishtirdi.

Saylovoldi targʻibot-tashviqot uchrashuvi davomida Berdax Jiyenbayev “Biz kelajak uchun javobgarmiz” gʻoyasini oʻzida mujassam etgan Oʻzbekiston Respublikasi prezidentligiga nomzod Narzullo Oblomurodovning saylovoldi dasturida ilgari surilgan yettita asosiy ustuvor vazifaga batafsil toʻxtaldi. Yaʼni, partiyaning dasturi, ekologik muvozanatni taʼminlash, tabiiy resurslardan oqilona foydalanish hamda “yashil iqtisodiyot” tushunchalari haqida soʻz yuritib, prezidentlikka nomzodning oʻz oldiga qoʻygan katta maqsadlari, mamlakatni dunyoning eng rivojlangan davlatlari qatoriga qoʻshish borasidagi shaxsiy tashabbuslari, fikr va gʻoyalari haqida saylovchilarga batafsil maʼlumotlar berdi.

Xususan, nomzodning ishonchli vakili global ahamiyatga ega boʻlgan iqlim oʻzgarishi bilan bogʻliq ekologik xavf-xatarlar ichki migratsiyani harakatga keltirishi mumkinligi va oʻz navbatida xalqning daromad manbalariga, shuningdek isteʼmol mahsulotlari ishlab chiqarish hamda ularning narx-navosiga keskin taʼsir koʻrsatishi bilan bogʻliq ijtimoiy-iqtisodiy masalalarni ijobiy hal etishga qaratilgan nomzodning fikrlari, aniq va puxta ishlab chiqilgan iqtisodiy mexanizm, rejalari haqida soʻz yuritdi.

Shundan soʻng, Qipchoq ovul fuqarolar yigʻini saylovchilar vakillari, ekologik partiya aʼzolari boʻlgan yoshlar nomzodning saylovoldi dasturida ilgari surilgan tashabbuslar, nomzodning shaxsiy fikr va gʻoyalari boʻyicha oʻzlarini qiziqtirgan savollar bilan murojaat qildilar.

Barcha savollarga prezidentlikka nomzodning ishonchli vakili Berdax Jiyenbayev batafsil javob berdi va barchani 24-oktyabr kuni Oʻzbekiston Respublikasi prezidentligiga Oʻzbekiston Ekologik partiyasidan koʻrsatilgan nomzod Narzullo Oblomurodov nomzodini yoqlab ovoz berishga chaqirdi.

Boʻlib oʻtgan saylovoldi targʻibot-tashviqot uchrashuvi demokratik tamoyillar asosida, oshkoralik va shaffoflik ruhida oʻtdi.

Robiya YOʻLDOShEVA.