“MATEMATIKA – FANLAR ShOHI” TADBIRIDA BILIMLAR YaNADA BOYITILDI

 Matematikaga fanlar shohi deb taʼrif berilishi bejiz emas. Boisi ushbu fan jamiyatdagi har bir yoʻnalishda, sohalardagi rivojlanishlarda muhim oʻrin tutadi. Yurtimizda matematika fani nufuzini koʻtarish va uni ommalashtirish maqsadida taʼlim maskanlari oʻquvchilari oʻrtasida turli olimpiadalar, oʻqituvchilar uchun tanlovlar oʻtkaziladi. Shuningdek, maktablarda fan oyliklari tashkil etilib, oʻquvchilarning qiziqishlari oshiriladi, bilimlari boyitiladi.
Tumanimizdagi 36-sonli umutaʼlim maktabida ham boshlangʻich taʼlim fan oyligi doirasida 4-“A” sinf oʻquvchilari ishtirokida “Matematika – fanlar shohi” deb nomlangan tadbir oʻtkazildi. Ushbu tadbir bolalarning matematikaga muhabbatini oshirish, fan boʻyicha mashgʻulotlarni qiziqarli tarzda oʻtkazish va oʻrgatish uslublarini namoyish etish maqsadida maktabning boshlangʻich taʼlim fani oʻqituvchisi Nasiba Bobojonova tomonidan tashkil etildi.
Tadbirni maktab direktorining maʼnaviy-maʼrifiy ishlar boʻyicha oʻrinbosari Rasul Xolmurodov ochib berdi. U matematikaning ahamiyati haqida soʻzlab, atrof-olamdagi barcha narsalarning shakl va arifmetik jihatdan mutanosibligini, bugun texnologiyalar rivojlangan davrda har bir insonda matematik bilimlarga zarurat sezilishini, bu fundamental hayotiy fan atrof-olam bilan bogʻliqligini taʼkidlab oʻtdi. Matematika eng koʻhna va qadimgi fanlardan biri ekanligini aytib, asosiy tushunchalari  natural  sonlar  va  arifmetik  amallar  insoniyat  tarixining  ilk davrlaridayoq  paydo  boʻlganligini, fanning asoschisi bobokalonimiz, ulugʻ ajdodimiz Al-Xorazmiy ekanligini, uning tadqiqotlari haliga qadar ulkan ahamiyat kasb etayotganini faxr bilan tilga oldi.
Bu qadimiy va uzoq rivojlanish yoʻlini bosib oʻtgan fan aniq mantiqiy mushohadalarga asoslangan fan hisoblanadi. Matematika fanini oʻrganayotgan yoshlarda mantiqiy fikrlash rivojlanadi, insonni tartibga oʻrgatib, faoliyatning har xil jabhalarida vujudga keluvchi murakkab masalalarni tushunish uchun zarur boʻladigan tushunchalar hamda ular orasidagi bogʻliqliklarni koʻra olish hamda tahlil qilish xususiyatlari shakllanadi, kelajakda iqtisodiyotning istalgan tarmogʻida malakali kadr boʻlib yetishishiga yordam beradi. Shu oʻrinda Prezidentimizning “Matematika hamma aniq fanlarga asos. Bu fanni yaxshi bilgan bola aqlli, keng tafakkurli boʻlib oʻsadi, istalgan sohada muvaffaqiyatli ishlab ketadi”, – degan teran maʼnoli fikrlari orqali iqtisodiyotning barcha soha va tarmoqlarining rivojlanishi uchun eng kerakli boʻlgan yuqori malakali mutaxassislar tayorlashda matematika fani taʼlimini va ilmiy-tadqiqot ishlari samaradorligini rivojlantirish naqadar katta ahamiyatga ega ekanligini anglash mumkin.
Tadbir davomida oʻquvchilar ham maʼruzalar qilib,  ulugʻ olim Al-Xorazmiy va uning ilmiy manbalari, arifmetik amallar, geometrik shakllar haqida qiziqarli maʼlumotlar berishdi. Mantiqan fikrlashga undovchi savol va topishmoqlar, maqollar aytib, sahna koʻrinishlarini namoyish etishdi. Undan tashqari, oʻquvchilarning matematik bilimini sinash va ragʻbatlantirish maqsadida viktorinalar oʻtkazildi. Unda oʻquvchilar bilimga chan¬qoqligi, intellektual salohiyati yuqoriligini namo¬yish etishdi.
Maktab oʻqituvchilari va ota-onalar tashrif buyurgan ushbu tadbirga oʻquvchilar tomonidan ijro etilgan musiqiy chiqishlar, qoʻshiq va raqslar yanda fayz kiritdi.

Ozoda Xudoyberganova, 36-sonli maktabning

ijodiy-madaniy masalalar boʻyicha targʻibotchisi.