VARIATIV OʻQUV-REJA ASOSIDAGI MAShGʻULOTLAR TAʼLIM SAMARASINI OShIRADI

Yosh avlodni yurtga munosib, jamiyat kelajagiga daxldor, komil insonlar qilib tarbiyalash bugungi kundagi dolzarb vazifa sanaladi. Shu bois, taʼlim-tarbiya tizimi tubdan isloh qilinib, sohada muhim oʻzgarishlar, keng qamrovli va samarali chora-tadbirlar amalga oshirilmoqda.

Tumandagi 36-sonli umumiy oʻrta taʼlim maktabida ham mazkur oʻquv yilidan boshlab, 10-11-sinflar oʻquvchilari uchun variativ oʻquv-reja asosida darslar tashkil etildi. Kimyo-biologiya fanidan tashkil etilgan variativ oʻquv-reja asosidagi mashgʻulotlar maktabdagi tajribali, mahoratli, Oʻzbekiston va Qoraqalpogʻiston xalq taʼlimi aʼlochisi, talabchan oʻqituvchi Rayhon Qalandarova tomonidan olib borilmoqda.

Mazkur maktab tumanimizda 1974-yilda faoliyat boshlagan boʻlib, barcha davrlarda oʻquvchilarga koʻplab tajribali, yuksak saviyali ustoz-oʻqituvchilar taʼlim berishgan. Ushbu maktabdan yetishib chiqqan bilimli, iqtidorli insonlar turli jabhalarda xizmat qilib, jamiyat taraqqiyotiga hissa qoʻshib kelishmoqda.

Ayni paytda 560-oʻringa moʻljallangan taʼlim maskanida 30 ta sinfda 824 nafar oʻquvchi taʼlim-tarbiya olmoqda. Ularga 72 nafar pedagog-oʻqituvchilar yangi pedagogik texnologiyalar asosida taʼlim berishmoqda. Pedagoglarning 1 nafari oliy toifali, 7 nafari 1-toifali, 22 nafari 2-toifali, 42 nafari esa mutaxassis oʻqituvchilardir. Oʻquvchilarning boʻsh vaqtlarini mazmunli tashkil etish, unumli foydalanishlarini taʼminlash maqsadida 8 ta fan, 4 ta sport, 2 ta ijtimoiy-madaniy toʻgaraklar faoliyati yoʻlga qoʻyilgan. Shuningdek, oʻquvchi-yoshlar barcha imkoniyatlarga ega futbol, basketbol va voleybol maydonchalari hamda yopiq sport zalida sport bilan shugʻullanishadi. Maktab axborot kommunikatsiya vositalari bilan ham jihozlangan.

Oʻtgan oʻquv yilida maktabning 8-sinf oʻquvchisi B.Atamurodov  sportning   stol tennisi turi boʻyicha oʻtkazilgan musobaqada tumanda 1-oʻrinni egalladi. Kimyo fanidan fanlar  olimpiadasining tuman bosqichida  maktabning 10-sinf oʻquvchisi  N.Yodgorova 1-oʻrin gʻolibi boʻldi. Ona tili va adabiyot fani boʻyicha fanlar olimpiadasining tuman bosqichida qatnashgan 10-sinf oʻquvchisi  M.Oʻrozimbetova 3-oʻrinni qoʻlga kiritdi. Shuningdek, 11-sinf oʻquvchisi T.Fayzullayev ingliz tili fani boʻyicha  fanlar olimpiadasining tuman bosqichida  3-oʻrinni egalladi.

2019-2021 oʻquv yilida maktab bitiruvchilarini oliy taʼlimga qamrab olish koʻrsatkichi 18 foizni tashkil qilgan boʻlsa, mazkur oʻquv yilida 26 foizga yetkazildi. Maktabda joriy oʻquv yilida oʻquvchilarning qiziqishlariga koʻra tashkil etilayotgan variativ oʻquv-reja asosidagi mashgʻulotlar orqali taʼlim oluvchilarning bilimlari yanada boyitilib, bu boradagi koʻrsatkichni yuqori koʻtarish maqsad qilingan. Mashgʻulotlarda oʻquvchilarga taʼlim berayotgan R.Qalandarova nafaqat 36-sonli umumtaʼlim maktabida, balki tuman miqyosida namunali, bilimdon oʻqituvchi sifatida hurmat-eʼtiborga ega. U taʼlim sohasidagi samarali  mehnatlari va namunali pedagogik faoliyati uchun 2005-yilda “Qoraqalpogʻiston Respublikasi xalq taʼlimi aʼlochisi” hamda 2019-yilda “Oʻzbekiston Respublikasi xalq taʼlimi aʼlochisi”  koʻkrak nishonlari bilan taqdirlangan. Tajribali pedagog 2018-2019 oʻquv yilida “Yilning eng yaxshi fan oʻqituvchisi” koʻrik-tanlovida qatnashib, tuman va Qoraqalpogʻiston Respublikasi bosqichlarida faxrli 1-oʻrinni egalladi va Oʻzbekiston bosqichida muvaffaqiyatli ishtirok etdi.

Joriy yilda R.Qalandarovaning yana bir oʻquvchisi Nukus shahrida oʻquvchi-yoshlar oʻrtasida oʻtkazilgan tabiiy fanlar boʻyicha olimpiadaning Qoraqalpogʻiston bosqichida muvaffaqiyatli ishtirok etib, eng yuqori ballni qoʻlga kiritdi. Ustozidan chuqur bilim olgan maktabning 9-sinf oʻquvchisi S.Najmiddinova mazkur olimpiadaning 1-oʻrin gʻolibi sifatida Fargʻona shahrida oʻtkaziladigan mamlakat bosqichida qatnashish baxtiga musharraf boʻldi.

Tajribali, bilimdon va mahoratli oʻqituvchidan taʼlim olgan oʻquvchilar, albatta, ertaga chuqur bilimli, tafakkuri keng va komil insonlar boʻlib ulgʻayadi. Ulugʻ ajdodlarimizga munosib tarzda kamol topgan yoshlar Vatanimizni taraqqiyot sari yetaklab, buyuk kelajak yaratadi.

Sahifani O.Xudoyberganova tayyorladi.