MEHNAT FAXRIYLARINING XONADONLARIGA MAXSUS BELGILAR OʻRNATILDI

Oʻzbekiston Respublikasi Prezidentining 2016-yil 28-dekabrdagi “Oʻzbekiston faxriylarini ijtimoiy qoʻllab-quvvatlash “Nuroniy” jamgʻarmasi faoliyatini yanada takomillashtirish chora-tadbirlari toʻgʻrisida”gi Farmoni hamda Prezidentimizning 2017-yil 14-iyuldagi “Mehnat “faxriysi” koʻkrak nishonini taʼsis etish toʻgʻrisida”gi  Qaroriga asosan mamlakatimizning iqtisodiyot, ishlab chiqarish, ilm-fan, madaniyat, taʼlim, sogʻlikni saqlash, yurisprudentsiya va boshqa sohalarida koʻp yillar davomida halol va samarali mehnat qilgan nafaqa yoshidagi yurtdoshlarimizni, shuningdek, hayotini oilalar mustahkamligini saqlash, farzandlarimizni jamiyat oldida yuksak masʼuliyat, milliy va umuminsoniy qadriyatlarga, kattalarga va yosh avlod vakillariga hurmat, ona-Vatanga muhabbat, istiqlol gʻoyalariga sadoqat ruhida tarbiyalash ishlariga bagʻishlab, jamiyatimizda hurmat qozongan bir guruh yurtdoshlarimiz “Mehnat faxriysi” koʻkrak nishonlari bilan taqdirlangan edilar.

“Mehnat faxriysi” koʻkrak nishoni toʻgʻrisida”gi Nizomga koʻra, 1-, 2-, 3-darajali “Mehnat faxriysi” koʻkrak nishonlari bilan taqdirlangan shaxslar yashaydigan xonadonlar va uy-joylar eshiklariga maxsus belgilar  oʻrnatish koʻzda tutilgan.

Tumanimizdan ham uch nafar el-yurt fidoyisi 2021-yil Navroʻz – umumxalq bayrami arafasida ushbu nufuzli mukofot bilan taqdirlangan edilar.

Ulardan biri, 1-darajali “Mehnat faxriysi” koʻkrak nishoni sohibi Ismoil ota Toʻrayev tumanimizning obod va farovon goʻshalaridan biri “Arna boʻyi” mahallasida istiqomat qiladi. Umrining 45-yilini halol va fidoyi mehnat bagʻrida oʻtkazgan Ismoil ota Toʻrayev to pensiyaga chiqquniga qadar tumanimiz qishloq xoʻjaligini mexanizatsiyalashtirish, irrigatsiya tizimlarini zamon talablari darajasida tartibga keltirish, irrigatsiya inshootlarini qurish-taʼmirlash boʻyicha juda katta koʻlamdagi ishlarga bosh-qosh boʻldi.

U nafaqat davlat va jamoat ishlarida, balki oilasida ham yuksak eʼtibor va hurmatga, ehtiromga munosib ibratli xonadon sohibi, el-yurt ardogʻidagi namunali ota sifatida mahalladoshlari orasida katta obroʻ qozondi.

 “2-darajali “Mehnat faxriysi” koʻkrak nishoni bilan taqdirlangan yurtdoshlarimiz orasida Qangli ovulida yashovchi, el-yurt hurmat va eʼtiborini qozongan fidoyi otaxon Jangaboy ota Rajabov ham bor.

U mehnat faoliyati davomida sobiq Qipchoq davlat xoʻjaligi direktori oʻrinbosari, Qipchoq panton koʻprigi boshligʻi, “Amudaryo” mashina-traktor parki direktori oʻrinbosari, xalq deputatlari tuman Kengashi raisining oʻrinbosari, “Xayrulla” fermer xoʻjaligi rahbari vazifalarida sidqidildan mehnat qildi.

Oilasida mehribon va hurmat-eʼtiborga munosib ota, el-yurtda yuksak obroʻ qozongan Jangaboy ota Rajabov hamon bardam-baquvvat. 75 yoshdan oshsalar-da qangliliklarning yaxshi-yomon kunlarida yelkadosh, toʻy-maʼrakalariga bosh-qosh va maslahatgoʻy.

2-darajali  “Mehnat faxriysi” koʻkrak nishoni sohibi Tursunboy ota Abdullayevni nafaqat oʻzi tugʻilib-oʻsgan Xitoy qishlogʻi xalqi, balki butun tumanimiz, Xorazm-u Qoraqalpogʻiston ahli taniydigina emas, hatto “oʻzimizning Tursunboy ogʻa!” deya hurmat va ehtirom koʻrsatishadi.

Hayotining qariyb 40-yilini yosh avlod taʼlim-tarbiyasiga bagʻishlagan Tursunboy ota Abdullayevning yoshlar maʼnaviyatini yuksaltirish, ijodkor-yoshlarni qoʻllab-quvvatlash, milliy-maʼnaviy qadriyatlarni asrab-avaylash hamda urf-odat va anʼanalarimizni yangicha mazmun bilan boyitish borasidagi beqiyos katta  xizmatlari eʼtibor va tahsinga munosib.

Serqirra faoliyat sohibi boʻlgan  Tursunboy ota Abdullayev oddiy oʻqituvchilikdan maktab direktori, oʻzi tashkil qilgan “Solmaboʻy” fermer xoʻjaligi rahbari vazifalarida  halol va samarali ish olib bordi.

Bir vaqtning oʻzida jamoatchilik faoli sifatida amudaryoliklarning toʻy-u tantanalariga bosh-qosh boʻldi. Pensiyaga chiqqach ham tinib-tinchimas Tursunboy ogʻa Abdullayev hamon el-yurt orasida Xitoy qishlogʻidan tortib, tumanimizning barcha hududlarida, hatto qoʻshni Xorazm viloyati tumanlarida boʻlib oʻtadigan maʼnaviy-maʼrifiy tadbirlarda hamisha faol.

Ayni paytda tumanimizning uch nafar fidoyi, pir-u davlat insonlari Ismoil ota Toʻrayev, Jangaboy ota Rajabov hamda Tursunboy  ota Abdullayevlar istiqomat qilayotgan xonadonlar peshtoqlariga va eshiklariga Amudaryo tumani Mahalla va oilani qoʻllab-quvvatlash boʻlimi boshligʻining oʻrinbosari Bahodir Boltaboyev boshchiligida “Bu yerda «Mehnat faxriysi» koʻkrak nishoni bilan taqdirlangan fuqaro istiqomat qiladi” mazmunida nishon sohiblarining ismi va familiyalari qayd qilingan belgilar oʻrnatildi.

Yillar davomida mamlakatimiz, qolaversa, tumanimiz taraqqiyotiga oʻzlarining halol va fidoyi mehnatlari  bilan munosib hissalarini qoʻshgan Ismoil ota Toʻrayev, Jangaboy ota Rajabov va Tursunboy ota Abdullayevlarga davlatimiz tomonidan koʻrsatilayotgan bu kabi yuksak hurmat va eʼtibordan nafaqat ularning oila aʼzolari va farzandlari, balki mahalladoshlari, bu fidoyi insonlarni yaxshi biladigan barcha yurtdoshlarimiz mamnun. Chunki insonning fidoyi va halol mehnati, inson qadri yuksak tutilgani bu xalqimizning qadr-qimmati ulugʻlanayotganidan dalolatdir.

Robiya YOʻLDOShEVA.