QOʻRIQLASh XIZMATI XODIMLARI OʻRTASIDA SPORT MUSOBAQALARI OʻTKAZILDI

12-iyul kuni Amudaryo tumani Bolalar va oʻsmirlar sport maktabida tuman Qoʻriqlash boʻlimi shaxsiy tarkib xodimlari orasida sport musobaqasi tashkil etildi.

Sport – sogʻlom turmush, sogʻlik garovi hisoblanadi. Qaysi sohada xizmat qilishdan qatʼiy nazar sport bilan shugʻullanish inson salomatligi uchun katta ahamiyat kasb etadi. Shu sababli Prezidentimizning bu boradagi “Sogʻlom turmush tarzini keng tadbiq etish va ommaviy sportni yanada rivojlantirish chora-tadbirlari toʻgʻrisida”gi Farmoni va Vazirlar Mahkamasining “Aholining sogʻlom turmush tarzini qoʻllab-quvvatlash va jismoniy faolligini oshirishga doir qoʻshimcha chora-tadbirlar toʻgʻrisida”gi qarori asosida aholini sport bilan shugʻullanishga keng jalb etishga alohida eʼtibor qaratilmoqda.

12-iyul kuni tuman Bolalar va oʻsmirlar sport maktabida Amudaryo tumanidagi Qoʻriqlash boʻlimi shaxsiy tarkib xodimlari orasida sport turlarini keng targʻib qilish, xodimlarning jismoniy tayyorgarligini oshirish, ular oʻrtasidagi doʻstlik tuygʻularini mustahkamlash maqsadida sport musobaqasi tashkil etildi. Ushbu musobaqada xodimlar sportning koʻp kurash, yaʼni turnikda tortinish, yotgan holda tayanib qoʻllarni bukib-yozish, 100 va 400 metr masofaga yugurish turlari boʻyicha oʻzaro kuch sinashdilar.

Musobaqa boshlanishida mamlakatimizda sport sohasiga nafaqat mamlakatni dunyoga tanitish balki xalqimizning sogʻligʻini mustahkamlash, sogʻlom avlodni tarbiyalashning asosiy mezoni sifatida katta eʼtibor berilayotgani xususida soʻz yuritildi. Shuningdek, sport bilan doimiy shugʻullanish orqali insonda shaxs belgilari, tashabbuskorlik, kurashchanlik, chidamlilik sifatlari rivojlanib borishi, sport oʻyinlarini tomosha qilish jarayonida esa jamiyat qadriyatlari shaxs qadriyatlariga aylanib borishi taʼkidlandi. Shundan soʻng, sportning har bir turida muayyan qoidalar mavjud boʻlishi, ularga mos ravishda sportchilar harakatlanishi, sport kurashi olib borilishi, harakatga baho berilishi, natija va gʻolib aniqlanishi yana bir bor batafsil tushuntirildi va mazkur musobaqa ishtirokchilariga omad tilab, boshlashga start berildi.

Ishtirokchilar musobaqa boshlanishida barcha shartlar bilan tanishtirilganidan soʻng, bellashuvga kirishdilar. Oʻz mahoratini, chaqqonligini, abjirligini, tirishqoqligini namoyish etib, biri-biridan qolishmagan kasbdoshlar gʻoliblikka ega boʻlishga astoydil harakat qildilar. Qizgʻin oʻtgan musobaqa jarayonlari hakamlar hayʼati tomonidan odilona baholab borildi.

Musobaqaning 100 metrga yugurish sharti boʻyicha chaqqonlik qilib, belgilangan muddatdan oldin marraga yetib kelgan Qoʻriqlash xizmati qorovuli Davronbek Erkaboyev 1-oʻrin gʻolibi boʻldi. Ushbu shart boʻyicha safdor Dilmurod Xoʻjakov 2-oʻrin, safdor Muzaffar Yaxshimurodov 3-oʻrin gʻolibligini qoʻlga kiritdi. Shuningdek, 400 metrga yugurish sharti boʻyicha kuch sinashishlar davomida 1-oʻrinni xizmat xodimi Islombek Murodboyev, 2-oʻrinni Otabek Xudoyberganov, 3-oʻrinni Oybek Rahimov egalladi.

Turnikda tortinish sharti boʻyicha Ruslanbek Jumaniyozov 1-oʻrin, Ahmad Ismoilov 2-oʻrin, Otabek Sultonov 3-oʻrin gʻolibi deb topildi. Eng soʻnggi yotgan holda tayanib, qoʻllarni bukib-yozish shartini bajarish davomida 1-oʻringa Doniyor Matyoqubov, 2-oʻringa Jamol Aybusinov, 3-oʻringa Ravshanbek Saparboyev munosib koʻrildi. 

Qoʻriqlash xizmati shaxsiy tarkib xodimlarining jismoniy tayyorgarligini oshirish, ularning kundalik turmushiga jismoniy tarbiya va sportni keng tadbiq etish maqsad qilingan ushbu musobaqa yakunida gʻoliblar sovgʻalar va faxriy yorliqlar bilan taqdirlanishdi.  Soha xodimlari oʻrtasida oʻtkazilayotgan bu kabi sport musobaqalari kelgusida, albatta, oʻzining ijobiy natijasini koʻrsatadi.

Elyor Yusupov, tuman Qoʻriqlash boʻlimi guruh komandiri.