BOʻZSOLMA MAHALLASIDA TOMORQAChILIKNI RIVOJLANTIRISh BOʻYIChA SEMINAR OʻTKAZILDI

Yurtimizda har bir hududning oʻziga xos xususiyati hisobga olinib, joylarda «bir mahalla – bir mahsulot» tamoyili asosida har bir mahalla meva-sabzavot yetishtirish, kichik issiqxonalar tashkil etish, chorvachilik, parrandachilik, asalarichilik kabi yoʻnalishlarga ixtisoslashtirilmoqda. Respublika boʻylab barcha hududlarda har bir mahalla kesimida tomorqaga ajratilgan yerlardan samarali foydalanish yuzasidan tegishli masʼullar ishtirokida tushuntirish-targʻibot ishlari olib borilmoqda.

Tumanimizda ham aholining asosiy qismi qishloq xoʻjaligi orqali daromad topib, oʻz oilasi farovonligiga va iqtisodiyot rivojiga hissa qoʻshib kelmoqda. Tomorqasidan unumli foydalanib, daromad orttirayotganlar atrofdagilarga ham namuna boʻlishmoqda va oʻz tajribalari boʻyicha tavsiyalar berib, tomorqachilikni yoʻlga qoʻyishlariga koʻmaklashishmoqda.

Shu yil 3-iyul kuni tumanimizning chekka hududida joylashgan Boʻz solma mahallasida namunali tomorqa egalarining faoliyatini keng aholi oʻrtasida targʻib etish maqsadida “Tomorqadan unumli foydalanaylik” shiori ostida “Tomorqa daromad – manbai”, “Bir mahalla – bir mahsulot” dasturi doirasida koʻrgazmali seminar tashkil etildi. Seminarda tuman Mahalla va oilani qoʻllab-quvvatlash boʻlimi, Boʻz solma mahalla fuqarolar yigʻini masʼullari, yigʻin raisining tomorqa, obodonlashtirish, bandlik va tadbirkorlik masalalari boʻyicha oʻrinbosari Sanʼat Abdullayev hamda mahallaning tomorqachilikni tashkil etish istagida boʻlgan fuqarolari ishtirok etdilar.

Mahalla hududidagi “Xivali ovul” aholi punktida yashovchi Reymboy ota Qurbonboyev xonadonida tashkil etilgan ushbu koʻrgazmali seminarda xonadon egalari tomorqadan samarali va unumli foydalanish sirlari haqida soʻzlab berdilar. Shuningdek, tomorqa yerining unumdorligini oshirish, barakali moʻl hosil olish hamda katta daromad qilish yoʻllarini tushuntirdilar. Tomorqa egalari yerni bahorgi ekish mavsumiga tayyorlash, urugʻlik saralash, ekinlarni ekish, koʻchatlarni oʻtqazish boʻyicha ham oʻz tajribalarini oʻrtoqlashdilar.

Reymboy ota Qurbonboyevning tomorqa maydoni 78 sotixdan iborat. Bunday katta maydonda qishloq xoʻjaligi mahsulotlarini yetishtirish katta maʼsuliyat va mehnat talab qiladi. U oʻz tomorqasida karam, piyoz, kartoshka, rediska, bodring, pomidor, sarimsoq piyoz, bulgʻor qalampiri, koʻkatlar, joʻxori va boshqa bir qator ekinlarni parvarish qilib kelayotganini, hatto turfa xil gullar oʻstirib, ulardan ham daromad koʻrayotganini taʼkidlab oʻtdi.

Ushbu xonadon tomorqasidagi har biri 154 kvadrat metr maydonda tashkil etilgan 2 ta issiqxonada ertaki, takroriy ekinlar yetishtirilib kelinmoqda. Undan tashqari, xonadon egalari chorvachilik, parrandachilik, asalarichilik faoliyati bilan ham shugʻullanib, daromad manbalarini koʻpaytirishmoqda. Bu orqali Reymboy otaning oilasida oʻgʻli Hamidjon Qurbonboyev, kelini Havojon Sobirova, nevarasi Avazbek Rahimboyevlarning bandligi taʼminlanganligi, ayniqsa, diqqatga sazovor.

Seminar davomida tomorqa egalari asalari parvarishi, dexqonchilik va bogʻdorchilik boʻyicha tajribalari haqida batafsil maʼlumot berdilar. Parvarish qilinayotgan meva va sabzavotlar navlari, uning turlari, hosil qilish vaqtiga qarab, ularni parvarish qilish boʻyicha tavsiyalar berib oʻtdilar.

Seminar soʻnggida xonadon egalariga homiylar tomonidan tayyorlangan esdalik sovgʻalari taqdim qilindi.

R.Bobojonov, tuman Mahalla va oilani qoʻllab-quvvatlash boʻlimi mutaxassisi.