“Sogʻlom hayot” dasturi doirasida targʻibot tadbiri oʻtkazildi

Joriy yilning 5-iyul kuni Amudaryo tumani Istirohat bogʻida tuman Mahalla va oilani qoʻllab-quvvatlash boʻlimi, tuman tibbiyot birlashmasi hamda ichki ishlar boʻlimi hamkorligida sogʻlom turmush tarzini keng tatbiq etish va ommaviy sportni yanada rivojlantirish maqsadida “Sogʻlom hayot” dasturi doirasida targʻibot tadbiri oʻtkazildi.

«Sogʻlom ayol — buyuk kelajak» gʻoyasini oʻzida mujassam etgan tadbir xotin-qizlar oʻrtasida sogʻlom turmush tarzini mustahkamlash, ularni jismoniy tarbiya va sport bilan ommaviy tarzda shugʻullanishga jalb qilish maqsadida ayol-qizlar ishtirokida sogʻlomlashtirish mashqlarini bajarish bilan boshlandi.

Tadbirda tuman Mahalla va oilani qoʻllab quvvatlash boʻlimi boshligʻining birinchi oʻrinbosari Muqaddas Beknazarova, tuman tibbiyot birlashmasi Aholi sogʻlom turmush tarzini qoʻllab-quvvatlash va jismoniy faolligini oshirish boʻlimi mudiri - Jumaboy Yavkashev, boʻlim shifokori - Tamara Saidova, narkolog shifokor – Sardor Madaminov, tuman tibbiyot birlashmasi tashkiliy boʻlim shifokori Karim Sobirov, Gulzor mahallasi oilaviy shifokori Mehri Husainova, tuman ichki ishlar boʻlimi boshligʻining huquqbuzarliklar profilaktikasi boʻyicha oʻrinbosari Baxtiyor Oʻrazovlar ishtirok etdilar.

Tadbirda taʼkidlanganidek, mamlakatimizda koronavirus pandemiyasiga qarshi kurashish borasida qator qonun hujjatlari, jumladan, Oʻzbekiston Respublikasi Prezidentining “Sogʻlom turmush tarzini keng tatbiq etish va ommaviy sportni yanada rivojlantirish chora-tadbirlari toʻgʻrisida”gi farmoni imzolandi. Mazkur farmon bilan jismoniy tarbiya va ommaviy sport bilan muntazam shugʻullanish hamda sogʻlom turmush tarzi boʻyicha hayotiy koʻnikmalarni shakllantirish orqali har bir fuqaroda kasallikka qarshi kuchli immun tizimi paydo boʻlishini taʼminlash, zararli odatlardan voz kechish, toʻgʻri ovqatlanish tamoyillariga amal qilish kabi koʻplab chora-tadbirlar amalga oshirilmoqda.

Shuningdek, tadbirda shifokorlar aholining sogʻlom ovqatlanishga boʻlgan ehtiyojlarini qondirishni taʼminlaydigan shart-sharoitlar yaratish zarurligini, tarkibida tuz, qand va yogʻ miqdori koʻp boʻlgan hamda xamirli taom va shirinliklarni, non mahsulotlarini isteʼmol qilishni qisqartirish lozimligini, zararli odatlardan, xususan, alkogol va tamaki mahsulotlarini isteʼmol qilishdan voz kechish yoʻli bilan kasallikka chalinish, ortiqcha vazn holatlari (semizlik) va bevaqt vafot etishni kamaytirish mumkinlini qayd etdilar.

Qolaversa, aholi oʻrtasida sogʻlom ovqatlanish madaniyatini keng targʻib qilish, shu jumladan, tartibsiz va kechki uyqu oldidan ovqatlanish odatlaridan voz kechish sogʻlom turmush tarzining asoslaridan biri ekanligi taʼkidlandi.

Shu bilan birga aholi oʻrtasida, ayniqsa, oilalar, mahallalar, maktabgacha taʼlim va umumtaʼlim muassasalarida sanitariya-gigiyena qoidalariga rioya etilishini sogʻlom turmush tarzining ajralmas qismi sifatida targʻib qilish eng asosiy vazifalardan biri etib belgilandi.

Tadbirda barcha taʼlim-tarbiya maskanlarida, korxona, tashkilot va boshqa turdagi barcha muassasalarda jismoniy tarbiya va sport bilan shugʻullanish uchun barcha shart-sharoitlar yaratish lozimligi kabi masalalar yuzasidan maʼruzalar qilindi.

Gavhar Chimbaychiyeva, tuman Mahalla va oilani qoʻllab-quvvatlash boʻlimi bosh mutaxassisi