Futbol boʻyicha Qoraqalpogʻiston Respublikasi chempionati oʻtkazilmoqda

Futbol bu chinakam atletik oʻyin. U tezkorlik, chaqqonlik, kuchlilik va sakrovchanlikni rivojlantirishga yordam beradi. Futbolchi oʻyin paytida haddan tashqari koʻp ish bajaradi. Bu esa odamning funktsional imkoniyatlari darajasini oshirishga, maʼnaviy, irodaviy xislatlarini tarbiyalashga yordam beradi. Futbol oʻynash umumiy jismoniy tayyorgarlik koʻrishda yaxshi vosita boʻlib xizmat qila oladi.

Inson salomatligini mustahkamlashda muhim ahamiyat kasb etadigan futbol sport turiga yoshlarning ham qiziqishlari tobora ortib bormoqda. Bunda ushbu sport turi boʻyicha tashkil etilayotgan musobaqalarning oʻrni beqiyos.

Joriy yilning 20-iyun sanasida Amudaryo tumanidagi Doʻstlik mahallasi hududidagi futbol maydonida futbol boʻyicha Qoraqalpogʻiston Respublikasi chempionati “KUSHMAG” 2-ligasi 1-tur musobaqasi boʻlib oʻtdi. Musobaqada Amudaryo tumanining “Amudaryo” jamoasi hamda Beruniy tumanining “Beruniy” jamoalari oʻzaro bellashdilar.

Musobaqa juda qizgʻin, baxs-munozaraga boy tarzda oʻtdi. Har ikkala jamoalar aʼzolari gʻoliblikni qoʻldan boy bermaslik uchun bor imkoniyatlarini ishga soldilar. Bellashuvning birinchi qismida kuchlar teng kelib, darvozlarga gol kiritilmadi. Murosasiz kechgan musobaqaning ikkinchi qismida “Amudaryo” jamoasi tomonidan darvozaga kiritilgan yagona gol musobaqa taqdirini hal qildi. Oʻziga xos tarzda kechgan baxslarning yakuniy natijalariga koʻra “Amudaryo” jamoasi 1:0 hisobi bilan gʻoliblikni egalladi.  

Ushbu gʻalaba bilan tumanimiz futbol termajamoasi chempionatda 3 ochkoni qoʻlga kiritdi. “Amudaryo” jamoasining keyingi uchrashuvlari mehmonda joriy yilning 27-iyun kuni Toʻrkoʻl tumanining “Toʻrtkoʻl” jamoasi bilan oʻtkazilishi rejalashtirilgan.

Qayd etish joizki, bugun mamlakatimizda jismoniy tarbiya va sportga boʻlgan eʼtibor tobora ortib bormoqda. Aholi salomatligi toʻgʻrisida gʻamxoʻrlik qilish, maʼnaviy va jismoniy barkamol avlodni shakllantirish, millionlar oʻyini boʻlgan va mamlakatimizda alohida oʻrin tutadigan sportning futbol turiga aholini, ayniqsa yoshlarni keng jalb etish boʻyicha bir qator chora-tadbirlar amalga oshirilib kelinmoqda.

Oʻzbekiston Respublikasi Prezidentining “Futbolni yanada rivojlantirish chora-tadbirlari toʻgʻrisida”gi qarori hamda “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari toʻgʻrisida”gi va “Oʻzbekistonda futbolni rivojlantirishni mutlaqo yangi bosqichga olib chiqish chora-tadbirlari toʻgʻrisida”gi farmonlari yurtimizda sportning, ayniqsa, futbol sport turini rivojlantirishda muhim hujjat boʻlib xizmat qilmoqda.

Shu bilan birga, yurtimizda futbol sport turini yanada rivojlantirish maqsadida yuqori iqtidorga ega boʻlgan yosh futbolchilarni tanlash, saralab olish tizimi va futbol infratuzilmasini yanada rivojlantirish, futbol boʻyicha sport maktablari faoliyatini yangi bosqichga koʻtarish, soha mutaxassislarini tayyorlash va ularni moddiy ragʻbatlantirish tizimini yaxshilash, oʻtkazilayotgan musobaqalar saviyasini yuksaltirish kabi dolzarb vazifalarni amalga oshirishga alohida eʼtibor qaratilmoqda.

Shu oʻrinda tumanimiz futbol termajamoasiga kelgusidagi musobaqalarda zafarlar tilaymiz.

Charos Arslonova, tuman hokimligining Axborot xizmati rahbari.