Yoshlar festivali doirasida turli sport musobaqalari oʻtkazilmoqda

Bugungi kunda mamlakatimizda yoshlarning har tomonlama yetuk, barcha sohalarda ilgʻor, barkamol avlod boʻlib yetishishlariga katta eʼtibor qaratilib, ertamiz egalariga keng imkoniyat va sharoitlar yaratilmoqda. Ayniqsa, ularni jismoniy tarbiya va sport bilan shugʻullanishlari, ham jismonan va manan yetuk boʻlib yetishishlari yoʻlida qator samarali ishlar amalga oshirilmoqda.

“Yangi Oʻzbekiston yoshlari, birlashaylik!” shiori ostida Amudaryo tumanida “Yoshlar festivali” doirasida oʻtkazilayotgan sport musobaqalari ham shu maqsadlarga xizmat qilmoqda. Joriy yilning 3-8-iyun kunlari tumanimizdagi yoshlar oʻrtasida sportning shaxmat turi boʻyicha “Yoshlar shaxmat taxtasi” musobaqasi oʻtkazildi. 8-iyun sanasida esa mazkur musobaqaning tuman bosqichi boʻlib oʻtdi. Musobaqada tumanimizdagi 7 yoshdan 30 yoshgacha boʻlgan harbiy xizmatchilar, havaskor sportchilar, oʻquvchi talabalar, uyushmagan yoshlar ishtirok etdilar. Bellashuvlar Xalqaro shaxmat federatsiyasining qoidalari asosida oʻtkazildi.

Musobaqaning hududiy bosqichlarida 1-2-3-oʻrinni egallagan ishtirokchilarga tuman bosqichida qatnashishga ruxsat berildi. Musobaqalar juda qiziqarli baxs-munozaraga boy tarzda oʻtdi. Bellashuvlarning tuman bosqichi yakuniy natijalariga koʻra qizlar oʻrtasida Durunki mahallasida yashovchi 56-sonli maktabning 3-sinf oʻquvchisi Iroda Toʻliboyeva 3-oʻrinni, 6-sinf oʻquvchisi Umida Toʻliboyeva 2-oʻrinni, Oʻzbekiston mahallasida yashovchi 44-sonli maktabning 5-sinf oʻquvchisi Rayhona Shomuratova faxrli 1-oʻrinni egalladilar.

Oʻgʻil bolalar oʻrtasida ham bellashuvlar murosasiz tarzda oʻtdi. Yakuniy natijalarga koʻra Xitoy ovulida yashovchi, 2-sonli maktabning 7-sinf oʻquvchisi Murodbek Rajabov 3-oʻrinni, Qipchoq ovulida yashovchi 18-sonli maktabning 8-sinf oʻquvchisi Sherzod Saʼdullayev 2-oʻrinni, Durunki mahallasida yashovchi, 56-sonli maktabning 9-sinf oʻquvchisi Ogʻabek Toʻrayev faxrli 1-oʻrinni egalladilar.

Tuman bosqichida gʻolib boʻlgan ishtirokchilar tuman hokimligining I-II-III darajali diplomlari hamda qimmatbaho sovgʻalari bilan taqdirlandilar.

“Yangi Oʻzbekiston yoshlari, birlashaylik!” shiori ostida oʻtkazilayotgan festival doirasida sportning suzish turi boʻyicha ham musobaqalar tashkil qilindi. Suzish musobaqasida tumanimizda yashovchi 12 yosh va undan kichik yoshdagi yoshlar ishtirok etdilar. Suzish boʻyicha bellashuvlar qizlar va oʻgʻil bolalar oʻrtasida ham musobaqalar tashkil qilindi. Musobaqa 8-iyun sanasida tuman Bolalar va oʻsmirlar sport maktabining suzish basseynida oʻtkazildi.

Bu kabi sport musobaqalarini oʻtkazishdan asosiy maqsad – tumanda sportning barcha turlarini yanada rivojlantirish, sportning har bir turi boʻyicha kuchli sportchilarni aniqlash hamda tuman terma jamoasini shakllantirish, yoshlar oʻrtasida sogʻlom turmush tarzini targʻib qilishdan iboratdir.

Suzish boʻyicha oʻtkazilgan musobaqalarning yakuniy natijalariga koʻra oʻgʻil bolalar oʻrtasida har uchala oʻrinni ham 30-maktab oʻquvchilari, jumladan, Boʻston mahallasida yashovchi Arslonbek Xolboyev 3-oʻrinni, Beruniy mahallasida yashovchi Xudoyberdi Oʻtamuratov 2-oʻrinni, Boʻston mahallasida yashovchi Shohjahon Safarboyev faxrli 1-oʻrinni egalladilar.

Shuningdek, qizlar oʻrtasidagi baxslarda Xizr eli mahallasida yashovchi 46-sonli maktab oʻquvchisi Marjona Tozaboyeva 3-oʻrinni, Olmazor mahallasida yashovchi 31-maktab oʻquvchisi Aygerim Marksova 2-oʻrinni, Gulzor mahallasida yashovchi 55-maktab oʻquvchisi Diyora Jumamuratova faxrli 1-oʻrinni sovrindori boʻldilar.  Musobaqa gʻoliblari tuman hokimligining I-II-III darajali diplomlari hamda qimmatbaho sovgʻalari bilan taqdirlandilar.

“Yangi Oʻzbekiston yoshlari, birlashaylik!” shiori ostida oʻtkazilayotgan festival davom etmoqda.

Charos Arslonova, tuman hokimligining Axborot xizmati rahbari.