MINI FUTBOL BOʻYIChA OʻZBEKISTON RESPUBLIKASI DXX QORAQALPOGʻISTON RESPUBLIKASI BOʻYIChA BOShQARMASI BOShLIGʻI KUBOGI MUSOBAQALARI OʻTKAZILDI

Futbol – millionlar oʻyini, shu bilan birga mazkur sport turi bilan shugʻullanuvchilar uchun ommaviy jismoniy chiniqish vositasi hamdir. Shu bois, futbol bilan shugʻullanuvchilar orasida turli yosh toifasidagi sportchilar, ayniqsa, yoshlar koʻpchilikni tashkil etadi. Tumanimizda ham futbol sporti bilan shugʻullanuvchilar safi yil sayin oshib bormoqda. Buni turli sanalar munosabati bilan oʻtkazilayotgan futbol musobaqalarining tobora ommaviylashib borayotganidan ham bilish mumkin.

Joriy yilning 27-28-may kunlari yoshlar oʻrtasida oʻtkazilgan mini futbol musobaqalarida tumanimizdagi 49 ta ovul va mahalla fuqarolar yigʻinlarining barchasidan futbolchilar jamoalari faol ishtirok etishdi.

Oʻzbekiston Respublikasi Davlat xavfsizlik xizmati Qoraqalpogʻiston Respublikasi boshqarmasi boshligʻi kubogi uchun boʻlib oʻtgan mini futbol musobaqalarida  tumanimizning 8 ta hududida tuzilgan sportchilar jamoalari oʻzaro kuch sinashdilar.

Tumanda sportning mini futbol turini rivojlantirish, ushbu sport turi boʻyicha kuchli sportchilarni aniqlash, ovul va mahallalardagi yoshlarni sportga jalb qilish, ularning boʻsh vaqtlarini mazmunli oʻtkazish, oʻsib kelayotgan yosh avlodni vatanparvarlik ruhida tarbiyalash, aholi oʻrtasida sogʻlom turmush tarzini targʻib qilish orqali aholining madaniy dam olishini taʼminlash maqsadida tashkil qilingan musobaqaning 27-may kuni hududiy bosqichi oʻtkazildi. Unda tumanimizning 8 ta  hududi  boʻyicha tuzilgan mini futbol jamoalari qatashdilar.

Musobaqalarning shaffofligini taʼminlash maqsadida tuman Jismoniy tarbiya va sport boʻlimi tomonidan tajribali hakamlar guruhi shakllantirilib. Musobaqalar Xalqaro sport Federatsiyasi qoidalari asosida olib borildi va har biri 15 daqiqadan iborat ikkita boʻlimda sportchilar toʻp  surdilar.

Qiziqarli taassurotlarga boy tarzda oʻtgan hududiy bosqichda 49 ta  minifutbol jamoalari orasidan eng kuchlilari musobaqaning tuman bosqichida ishtirok etish huquqini qoʻlga kiritishdi. Unga koʻra  1-hududda Beshovul mahallasi, 2-hudud boʻyicha Toʻlqin ovuli, 3-hududda Oʻrta qalʼa ovuli, 4-hududda Kuyuk koʻpir ovullari, 5-, 6-, 7-, 8-hududlar boʻyicha Uyshin, Durunki, Beruniy nomli va Boʻston mahallalari jamoalari oʻzlarining hamjihatliklari, chiroyli oʻyin koʻrsatganliklari bilan musobaqa hakami hamda tomoshabinlar olqishlariga sazovor boʻlishdi va musobaqaning tuman bosqichida ishtirok etish huquqini qoʻlga kiritishdi.

28-may kuni mazkur musobaqaning tuman bosqichi Chordara mahallasi hududidagi sunʼiy qoplamali mini futbol maydonida oʻtkazildi. Birdamlik va oʻzaro hurmat, samimiyat asosida oʻtgan musobaqalarda birinchi bosqichda gʻoliblikka erishgan Boʻston, Beruniy nomli, Beshovul, Uyshin, Durunki mahallalari va Toʻlqin, Oʻrta qalʼa, Kuyuk koʻpir ovullari mini futbol jamoalari oʻzaro bellashdilar.

Musobaqa yakunida Oʻzbekiston  Respublikasi Davlat xavfsizlik xizmati Qoraqalpogʻiston Respublikasi boshqarmasi boshligʻi kubogi musobaqasining tuman boʻyicha gʻolib va sovrindorlari aniqlandi. Unga koʻra, 1-oʻrinni Oʻrta qalʼa ovuli, 2-oʻrinni Durunki, 3-oʻrinni Beruniy nomli mahalla jamoalari egalladilar va Davlat xavfsizlik xizmati tomonidan 1-, 2-, 3- darajali Diplom hamda qimmatbaho sovgʻalar bilan taqdirlandilar hamda mazkur musobaqaning Qoraqalpogʻiston Respublikasi bosqichiga yoʻllanma oldilar.

Robiya YOʻLDOShEVA.