NOGIRONLAR JAMIYaTI TOMONIDAN BOLALAR KUNIGA BAGʻIShLAB TADBIR OʻTKAZILDI

Ona aziz farzandi uchun yashaydi. Unga umrini baxshida etadi. Uning ulgʻayishi, voyaga yetishi uchun jon kuydiradi. Davlatimiz  ham bagʻrida oʻsayotgan yosh avlod uchun qaygʻuradi.

1-Iyun – Xalqaro bolalarni himoya qilish kuni sifatida keng nishonlanadi. Ushbu sana munosabati bilan har yili mamlakatimiz boʻylab turli tadbirlar oʻtkaziladi. Bu sanani  bayram sifatida nishonlash 1925-yili Jenevada bolalar farovonligi boʻyicha butunjahon konferentsiyasida eʼlon qilingan. Shundan buyon, jahonning koʻplab mamlakatlarida ushbu kunga bagʻishlab, keng miqyosdagi tadbirlar boʻlib oʻtadi.

Tumanimizda ham sana munosabati bilan turli tadbirlar oʻtkazilmoqda.

Shu yil 21-may kuni Oʻzbekiston nogironlari jamiyati Amudaryo tumani boʻlinmasi tomonidan Amudaryo muhandislik texnikumi binosida, 1-iyun – Xalqaro bolalarni himoya qilish kuniga bagʻishlab, imkoniyati cheklangan yoshlar oʻrtasida “Maftunkor ranglar jilosi” deb nomlangan koʻrik-tanlov oʻtkazildi.

Tadbirni Amudaryo muhandislik texnikumi direktori Maqsud Yoʻldoshev ochib berdi.  Mahalla va oilani qoʻllab-quvvatlash boʻlimi xodimi Gavhar Chimbaychiyeva, tuman Xalq taʼlimi boʻlimi Tatʼyana Pirlepesova, Yoshlar ishlari agentligi  mutaxassisi Abrorbek Haytboyevlar qatnashdilar.

Tadbirda taʼkidlanganidek, mazkur sanani mamlakatimizdagina emas, balki, dunyoning 50 ga yaqin davlatlarida bayram sifatida qabul qilishgan. Umumjahon bolalar kuni bu nafaqat bolalarning kimligini balki, dunyo boʻylab zoʻravonlikkka  duch kelgan, nogironligi bor bolalarning ham haq-huquqlari davlat himoyasida ekanligini anglash kuni sanaladi. Baʼzi davlatlarda bolalarni ishchi kuchi sifatida ishlatishadi, koʻchalarda och-nahor, boshpanasiz yashaydilar. Mamlakatimizda esa bolalar 7 yoshdan boshlab, qoʻliga kitob berib, oʻqishga, yozishga oʻrgatiladi.

Keng jamoatchilikning diqqatini bolalarning muammolariga, ularning huquqlarini himoya qilishga, baxtli bolalikka ega boʻlishlari va oʻz mamlakatining toʻla-toʻkis  fuqarosi boʻlib oʻsishlariga qaratish  “Bolalarni himoya qilish kuni” ning asosiy maqsadi hisoblanadi.

“Maftunkor ranglar jilosi” tanlovida ishtirok etgan bolajonlar turli ranglarda oʻz orzu-maqsadlari, musaffo osmon, goʻzal Vatan, tinchlik ramzlari aks etgan rasmlar chizib, hakamlar va tomoshabinlar eʼtiborini qozondilar. Tanlovda oʻz mahoratini namoyish etgan  69-sonli maktabning 7-sinf oʻquvchisi Zulayho Karimboyeva  tanlov gʻolibi deb topildi.

Tadbir davomida tuman Tibbiyot birlashmasi shifokori Roza Rajabova, hamshira Muqaddas Allabergenovalar nogiron bolalarni tibbiy koʻrikdan oʻtkazishdi va ularga tegishli, zarur maslahatlar, tavsiyalar berishdi. Shuningdek, tuman hokimligi, Xalq taʼlimi boʻlimi Kasaba uyushmasi tomonidan 22 nafar imkoniyati cheklangan bolalarga sovgʻalar, turli xil sharbatlar va shirinliklar tarqatildi. 

Shundan soʻng, tuman Madaniyat boʻlimi havaskorlari va 9-sonli  Bolalar musiqa va sanʼat maktabi oʻquvchilari tomonidan tayyorlangan kontsert dasturi namoyish etildi. Dasturdan oʻrin olgan baxtli bolalik, Vatan haqidagi xushnavo va shoʻx qoʻshiqlar, dilrabo raqslar barcha ishtirokchilarga oʻzgacha kayfiyat baxsh etdi. 

SEVARA ISMOILOVA, QDU talabasi.