15-may – Xalqaro oila kuni. OILA – MUQADDAS DARGOH

Kishi umrining asosiy qismi – uning dunyoga kelishi, oʻsib-ulgʻayishi, voyaga yetishi, turmushi oila bilan bogʻliq boʻlganligi uchun oilaviy hayot salomatlik bilan bevosita aloqador. Chunki, salomatlikning asoslari oilada va oilaviy muhitda yaratilib, shakllanadi.

Kishi oilasiz yashashi mumkin. Lekin, bunday hayot kemtik boʻlib, hech qachon toʻlaqonli boʻlmaydi. Har qanday oilaning asosi biologik va ijtimoiy qonunlarga borib taqaladi. Oilaning biologik asosi shundan iboratki, har bir jinsda qarama-qarshi jinsga hayotiy zarurat bor. Bu uning nasl-nasabini davom qildirish uchun zarurdir.

Oilaning ijtimoiy asosi esa shundan iboratki, hayot, turmush, tabiat  qiyinchiliklarining oʻzi kishilarni birlashishga, birlashib turib kurashishga majbur qilgan va hayotda yashab qolishi uchun zarur boʻlgan. Xuddi shu birlashish insonning hayotini, salomatligini, turmushining mazmunli va baxtli oʻtishiga xizmat qilgan. Hozirgi kunda oilaviy hayot kishilar umrini mazmunli oʻtishiga xizmat qilishi, salomatliklarini mustahkamlab, umrni uzaytiruvchi eng muhim omil ekanligi ham ilmiy, ham hayotiy jihatdan isbotlangan.

Oilada salomatlikka taʼsir etuvchi omillar, jamiyatda kishilar salomatligiga taʼsir qiluvchi omillarning kichik shakliga oʻxshaydi. Shuning uchun, oilaning hayoti xamda faoliyati bilan bogʻliq muammolarni hisobga olgan holda uning aʼzolari salomatligini taʼminlashda ahamiyatli boʻlgan talablar bu – oilani toʻgʻri va oqilona tashkil qilish, oilada sogʻlom turmush tarzini shakllantirish, oilaviy munosabatlarni toʻgʻri tashkil etish hisoblanadi.
Shuningdek, farzand koʻrishga tayyorgarlik koʻrish, homiladorlik va bu davrning oʻziga xos talablarini hisobga olish, dunyoga kelgan chaqaloqni kutib olish va uning parvarishida boʻlish hamda sharoitlarini taʼminlash kabilarga ham alohida ahamiyat berish kerak.

Undan tashqari, barvaqt va kutilmagan homiladorlikning oldini olish usullari haqida maʼlumotga ega boʻlish, abortning oqibatlariii anglash, oilaviy qoʻydi-chiqdilarni salomatlik nuqtai-nazaridan hal qilish, erkaklar va ayollarda uchrashi mumkin boʻlgan baʼzi bir tanosil kasalliklari haqida tushunchaga ega boʻlish, yosh oʻtishi bilan bogʻliq boʻlgan baʼzi bir kasalliklar va fiziologik muammolarni toʻgʻri hal qilishni bilish ham foydadan holi boʻlmaydi.
Oila hayotida muhim ahamiyatga ega boʻlgan talablar juda koʻp. Lekin yuqoridagi talablarni toʻgʻri hal qilishning oʻzi ham oila va uning har bir aʼzosining salomatligi hamda mazmunli hayotini taʼminlaydi.

T.Saidova, TTB Aholi sogʻlom turmush tarzini  qoʻllab quvvatlash va jismoniy faolligini oshirish  markazi shifokori.