KORONAVIRUS ORAMIZDA YuRIBDI, OGOH BOʻLING!

Oʻzbekiston Respublikasiga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash boʻyicha Respublika komissiyasining bayonnomasiga asosan tashkilot, muassasalar va aholi koʻp toʻplanadigan jamoat joylari, shu jumladan, dehqon bozorlari, savdo majmualarida, umumiy ovqatlanish shoxobchalarida tibbiy niqobdan va antiseptik vositalardan foydalangan holda harakatlanish boʻyicha sanitariya-gigiyena talablariga qatʼiy rioya etilishi yuzasidan doimiy reydlar tashkil etilishi va oʻtkaziladigan reydlarning natijadorligini taʼminlash maqsadida tumanlardagi Sanitariya-epidemiologik osoyishtalik markazi xodimlariga zarur topshiriqlar berilgan edi.

30-mart kuni tumanimizning aholi koʻp toʻplanadigan jamoat joylarida, jumladan, dehqon bozorlari, umumiy ovqatlanish shoxobchalari, savdo majmualari, dorixonalar, toʻyxonalarda tuman ichki ishlar boʻlimi, milliy gvardiya va sanitariya-epidemiologik osoyishtalik markazi va jamoat salomatligi boʻlimi xodimlari bilan hamkorlikda karantin qoidalariga amal qilish boʻyicha reyd oʻtkazildi. Oʻtkazilgan reyd natijasida ayrim fuqarolarning jamoat joylarida niqobsiz yurganliklari aniqlandi. Bu fuqarolarga eslatmalar berilib, tushuntirish ishlari olib borildi.

Bundan tashqari, umumiy ovqatlanish shoxobchalari, savdo majmualari, idora, korxona, tashkilot hamda muassasalarga karantin qoidalariga rioya qilish boʻyicha bukletlar, eslatmalar tarqatilib, tushuntirish ishlari olib borildi.

Joriy yilning 1-aprelidan eʼtiboran toʻyxonalarda oilaviy tantana, toʻy-maʼraka va marosimlarni oʻtkazish 100 kishidan koʻp boʻlmagantartibda, sanitariya-gigiyena talablariga qatʼiy rioya etgan holda oʻtkazilishi toʻgʻrisida tavsiyalar berilib, tushuntirish va targʻibot-tashviqot ishlari oʻtkazildi.

Bunday reydlarning oʻtkazilishi faqatgina xalqimizning sogʻligi yoʻlida olib borilayotgan ezgu maqsadlar uchun qilinayotgan ishlardir. Zero, har bir fuqaro oʻzining, qarindoshlarining yon-atrofdagilar sogʻligi uchun masʼul ekanligini unutmasligi kerak.

Koʻrilayotgan chora-tadbirlarga qaramasdan soʻnggi oylarda karantin qoidalari biroz yumshatilgani, oilaviy marosimlarni, jamoat tadbirlarini karantin qoidalariga amal  qilgan holda, ixcham tarzda oʻtkazishga ruxsat berilganiga qaramasdan ayrim yurtdoshlarimiz yuzlab odamlar ishtirokida toʻy-marosimlar oʻtkazishni boshlab yuborishdi. Niqob taqish, masofa saqlash qoidalarini, koʻpchilik yurtdoshlarimiz unutib qoʻyishdi. Karantin qoidalari yumshatildi, degani virusni toʻla-toʻkis yengdik, degani emas. Chunki koronavirus hali oramizda yuribdi.

Mamlakatimizda virus bilan zararlanganlar soni kun sayin oshib borayotganidan ayonki, karantin qoidalariga qatʼiy amal qilishga, oraliq masofani saqlashga har birimiz burchlimiz. Chunki xalqimizning, har birimizning, yaqin insonlarimizning sogʻligi bugungi qatʼiyatimizga, birdamligimizga va ogohligimizga bogʻliq.

Qadrli yurtdoshlar, biz barchamiz birdam, ahil va jips boʻlib, karantin qoidalariga qatʼiy amal qilsak, albatta koronavirus balosini batamom yengamiz. Zarurat boʻlmasa koʻchaga chiqmang, niqob taqishni unutmang va oʻzingizning, oila aʼzolaringizning hayotini xavf-xatarga qoʻymang!

Robiya YOʻLDOShEVA.