TUMANIMIZDA SPORT YaNADA OMMALAShADI

Amudaryo tumani jismoniy tarbiya va sport boʻlimi 2018-yil 5-maydagi Prezidentimizning tegishli Farmoniga asosan tashkil etilgan boʻlib, tashkiliy tuzilmasida boʻlim boshligʻi, sportni rivojlantirish va saralash (selektsiya) boʻyicha bosh inspektor, ommaviy sportni rivojlantirish va jismoniy tarbiya-sport tadbirlarini tashkil etish boʻyicha bosh inspektor, boʻlim hisobchisi lavozimlari mavjud. Boʻlim tumanda sport sohasidagi davlat siyosatini amalga oshirish uchun masʼul boʻlgan vakolatli organ hisoblanadi.

Tuman Jismoniy tarbiya va sport boʻlimi tomonidan 2021-yilda aholining keng qatlamlarini sportga jalb qilish maqsadida musobaqalar  kalendar rejasi ishlab chiqildi va tuman hokimligi tomonidan tasdiqlandi.

Rejaga koʻra, har oyning birinchi haftasi “Yoshlar haftaligi”, ikkinchi haftasi “Xotin-qizlar haftaligi”,  uchinchi haftasi “Mahalla va nuroniylar haftaligi”, har oyning toʻrtinchi haftasi “Taʼlim muassasalari haftaligi” etib belgilangan.

Tumanning barcha hududlarida aholining keng qatlamlari oʻrtasida ommaviy badantarbiya mashgʻulotlarini oʻtkazish uchun mavjud 17 nafar xususiy tadbirkorlar tomonidan qurilgan sunʼiy qoplamali mini futbol maydonchalarning 10 tasida qoʻshimcha badantarbiya mashgʻulotlarini bajarish uchun turnik va bruslar qurildi.

“Sogʻlom hayot sari 5000 qadam” shiori ostida ommaviy yurish tadbirlarini tashkil etish reja –dasturi tuzildi hamda ushbu dastur asosida ommaviy yurish tadbirlari  oʻtkazilmoqda. Yurish tadbiridan keyin ommaviy badantarbiya mashgʻulotlari oʻtkazilmoqda.

Tumanimizda jami 19 ta sunʼiy qoplamali futbol maydonchalari mavjud boʻlib, 4 tasi 2020-yilda qurilib, foydalanishga topshirildi. Shundan 2 tasi idora va tashkilotlarga, 17 tasi xususiy tadbirkorlarga tegishli.

Sportning dzyu-do turi boʻyicha 2021-yil fevral oyida Isroilda oʻtkazilgan musobaqada yurtdoshimiz Sharofiddin Boltaboyev faxrli birinchi oʻrinni egallaganidan barchamiz faxrlandik.

Shuningdek, 2021-yil boshidan buyon tumanimiz sportchilari Oʻzbekiston chempionatlarida 2 ta oltin, 1 ta kumush, 3 ta bronza medallarini qoʻlga kiritib qaytishdi.

Tumanimizda  bitta Bolalar-oʻsmirlar sport maktabi mavjud boʻlib hozirgi kunda 142 guruhda  1494 oʻquvchi (254 nafari qizlar) qamrab olingan.

Tumanimizda aholining turli qatlamlari oʻrtasida sport musobaqalari tashkil qilinmoqda. Jumladan shu kungacha jami 117 musobaqa oʻtkazilib, 8174 nafar ishtirokchi (shundan 2900 nafari xotin-qizlar) qamrab olindi. Shuningdek, Farmonga muvofiq tumanimizdagi barcha mahallalarda 2021-2025-yillarda quriladigan badminton, stritbol, va “Workout” sport turlari uchun maxsus maydonchalarning manzilli roʻyxati ishlab chiqilmoqda. Tumanning aholi uchun qulay boʻlgan hududlarda zamonaviy yurish va yugurish uchun “Salomatlik yoʻlaklari“ hamda velosipedda harakatlanish uchun velosiped yoʻlaklarini tashkil etish (qurish) loyihasi ishlab chiqilmoqda. Albatta, amalga oshirilayotgan buningdek saʼy-harakatlar kelgusida tumanimiz sport sharafi yuksalishiga zamin boʻladi.

Gʻulomjon QURBONBOYeV, tuman Jismoniy tarbiya va sport boʻlimi boshligʻi.