JUMURTOV ShAHARChASI OBOD MASKANGA AYLANMOQDA

“Obod qishloq” davlat dasturi doirasida Jumurtov shaharchasida ham keng koʻlamli qurilish va obodonlashtirish ishlari amalga oshirilmoqda. Ayni kunlarda ushbu maskanda qurilish va taʼmirlash ishlari jadallik bilan davom etmoqda.

17-fevral kuni tumanning eng chekka hududi boʻlgan ushbu shaharchada amalga oshirilayotgan ishlar bilan tanishish, duch kelayotgan muammolarni oʻrganib, bartaraf etilishiga koʻmaklashish maqsadida Prezidentning tumandagi Xalq qabulxonasi boshligʻi Erkin Rajabov, tuman hokimi oʻrinbosari Jasur Norimov, 3-sektor rahbari, tuman Ichki ishlar boʻlimi boshligʻi Ulugʻbek Xudoyberganovlar tashrif buyurdi. 

Jumurtov shaharchasida joylashgan ijtimoiy soha obʼektlari holatini yaxshilash maqsadida rejaga koʻra, hududdagi 43-, 63-, 72-sonli maktablar va shu maktab filiali binolarida mukammal taʼmirlash ishlari amalga oshiriladi. Aholiga qulaylik yaratish maqsadida ehtiyojga koʻra yangidan maktabgacha taʼlim tashkiloti binosi quriladi.

Shuningdek, shaharcha fuqarolar yigʻinining maʼmuriy binosida taʼmirlash ishlari amalga oshiriladi. Hududdagi infratuzilma obʼektlari holatini yaxshilash maqsadida esa avtomobil va ichki koʻcha yoʻllarida ham taʼmirlash ishlari bajariladi. Dastur doirasida shaharchada 5,35 km. uzunlikdagi ichki koʻcha yoʻllari hamda shaharchaga olib keluvchi asosiy 4r160 “Kuyuk koʻpir ovuli – Jumurtov karʼeri” avtomobil yoʻllari taʼmirlanadi.

Shuningdek, ushbu avtomobil yoʻllari boʻyiga 20 ta tungi koʻcha yoritish chiroqlarini oʻrnatish, 44 ta tayanch ustunlarini rekonstruktsiya qilish, 19,3 km uzunlikdagi elektr tarmoqlarini, 5 ta transformator punktlarini mukammal va joriy taʼmirlash ishlarini amalga oshirish koʻzda tutilgan.

Aholiga toza ichimlik suvini yetkazib berish maqsadida hududga yangidan 2 ta suv tarqatish shoxobchasi quriladi. Shaharcha hududidagi yakka tartibdagi turar joylar holatini yaxshilash maqsadida 38 ta uyning tom qismi taʼmirlanadi, 120 ta uyning fasad qismi, 14 ta uyning darvozasi qayta tuzatiladi. Shuningdek, 20 ta toʻsiq devorlar yangidan qurilib, 20 tasida taʼmirlash ishlari amalga oshiriladi.

Undan tashqari, shaharcha hududini obodonlashtirish, yanada fayzli maskanga aylantirish maqsadida manzarali va mevali daraxtlar, turli gullar koʻchatlari ekiladi. Mavjud daraxtlarga shakl berilib, hudud qiyofasi tubdan oʻzgartiriladi.

Aholining yashash sharoitini yaxshilash, qulaylik yaratish maqsadida hududda tadbirkorlikni rivojlantirishga ham eʼtibor qaratiladi. Dastur doirasida shaharchada 4 ta savdo majmuasi tashkil qilinib, yangi ish oʻrinlarini tashkil etish, kundalik roʻzgʻorda zarur boʻladigan mahsulotlarni arzon narxlarda shu yerdan xarid qilishlariga imkon yaratish moʻljallanmoqda.

Shaharchaga tashrif buyurgan masʼullar hududda amalga oshirilayotgan bunyodkorlik ishlari bilan tanishdilar. Har bir obʼektda bajarilayotgan qurilish, taʼmirlash ishlarini yaqindan oʻrgandilar. Mavjud va aniqlangan kamchiliklarni bartaraf etish boʻyicha mutasaddilarga tegishli topshiriqlar berib, hal etilishiga koʻmaklashdilar.

Ayni kunlarda Jumurtov shaharchasi aholisining kayfiyati baland. Shaharchaning obod goʻshaga aylanayotganidan mamnun boʻlgan holda har biri oʻz xonadoni, oʻz mahallasida koʻtarinki ruh bilan obodonlashtirish ishlarini amalga oshirishmoqda. Shu maskanning yanada farovon, goʻzal qiyofa kasb etishiga imkon boricha hissa qoʻshishga harakat qilishmoqda.

Ozoda Xudoyberganova.