Ovulga koʻrk boʻlgan kollej

Istiqlol yillarida bizning Xitoy ovulimiz yanada chiroy ochdi. Koʻchalar obod, fuqarolarning turmush tarzi kun sayin oʻsib, yangidan-yangi imoratlar, aholiga xizmat koʻrsatish shoxobchalari ish boshlamoqda. Buning barchasi bu hududda istiqomat qiluvchilarning hayotga va oʻz kelajaklariga endi boshqacha koʻz bilan qaray boshlaganliklaridan dalolat berib turibdi.

Oʻtgan 2013-yilning fevral oyidan boshlab ovulning qoq markazida yangi bino qurilishi boshlandi. Bu inshoot Amudaryo transport kasb-hunar kolleji binosi edi. "Qurilish xizmat” MChJ tomonidan yuqori surʼatlarda olib borilgan mehnatlar natijasida qisqa fursat ichida barpo etilgan kollej sentyabr oyida ish faoliyatini boshlab, hududdagi toʻqqizta umumtaʼlim maktablari bitiruvchilaridan 213 nafar yigit-qizni oʻz bagʻriga oldi. Joriy yilda oʻquvchilar besh xil taʼlim yoʻnalishi boʻyicha taʼlim olmoqdalar. Ularga yigirma bir nafar oliy maʼlumotli mutaxassis oʻqituvchilar taʼlim-tarbiya berib, ilm-hunar sirlarini oʻrgatmoqdalar.

Muhtaram Prezidentimiz I.A.Karimov koʻhna va navqiron Samarqand shahrida Oʻrta asrlar sharq allomalari tarixiy merosini oʻrganish boʻyicha oʻtkazilgan xalqaro ilmiy anjumanda taʼkidlaganlaridek "bugungi kunda yurtimizdagi ovul va qishloqlarda eng hashamatli va eng mahobatli binolar kasb-hunar kollejlari binolari boʻlib, jamiki hududlarga koʻrk bagʻishlab turibdi”. Zero, shu oʻrinda Sohibqiron bobomiz Amir Temurning "Agar bizning qudratimizga shak keltirsang, kelib biz qurgan imoratlarga boq” degan soʻzlarini keltirib oʻtish joiz. Bugungi kunda ovuldagi eng koʻrkam imoratga aylangan kollejimizda yosh-avlodning bilim olib, hunar oʻrganishlari uchun barcha sharoitlar va imkoniyatlar yaratilgan. Kollejda tashkil etilgan toʻrtta kafedrada faoliyat yuritayotgan oliy maʼlumotli pedagoglar oʻzlarida bor bilim va tajribalarni ishga solib, oʻquvchi-yoshlarga taʼlim, kasb-hunar sirlarini oʻrgatmoqdalar. Fan xonalari, ishlab chiqarish ustaxonasi, barcha jihatlari bilan jahon miqyosi talablariga javob beruvchi sport zali har kuni, ertadan kechgacha yoshlar ixtiyoriga berilgan. Oʻquvchilar belgilangan dars mashgʻulotlarini oʻtib boʻlgandan soʻng oʻn ikkita fan va oltita sport toʻgaraklarida oʻz bilim va mahoratlarini oshirish imkoniyatlaridan unumli foydalanmoqdalar. "Ingliz tili”, "Orasta qizlar”, "Muay-tay” toʻgaragi nafaqat kollejimiz oʻquvchilarini, balki hududda joylashgan umumtaʼlim maktablari oʻquvchi-yoshlarini ham oʻziga jalb etdi va natijada til oʻrganaman, orasta boʻlaman, sport bilan shugʻullanib, yuksak choʻqqilarni egallayman degan yoshlarning safi tobora koʻpayib bormoqda.

"Kamolot” YoIH tuman Kengashi tashabbusi va rahbarligida turli koʻrik-tanlovlar va sport musobaqalarida kollejimiz yoshlari muntazam ishtirok qilib, munosib oʻrinlarga ega boʻlmoqdalar.

Azaldan mehnatkash, koʻngli ochiq, mehmondoʻst boʻlgan Xitoy ovuli aholisi kollej faoliyatiga yaqindan yordam berib, obodonlashtirish va koʻkalamzorlashtirish ishlarida oʻz farzandlari bilan bab-baravar qatnashmoqdalar. Ayni kunlarda esa oʻquv maskanimiz atrofini yanada obodonlashtirish, Mustaqillikning 23 yillik qutlugʻ sanasiga ovulimizni bundan ham goʻzal va obod manzilga aylantirish maqsadida oʻquvchi-yoshlar va ovulimiz ahli fidoyilik bilan mehnat qilishmoqda. Zero, "Obod manzillarda sogʻlom avlod dunyoga keladi”, deb bejiz aytilmagan. Bu eldan yetishib chiqqan olim va allomalarni butun dunyo ahli tanishi hech kimga sir emas. Buyuk fizik olim Eynshteynning: "Dunyoni hech qanday yovuz kuch, hech qanday qurol-yaroq yoʻqotolmaydi, lekin sening beparvoliging yoʻqotishi mumkin”, degan hikmatli soʻzlariga amal qilgan bu yurtning fidoyi xalqi hech qachon oʻz farzandlarining taqdiriga befarq boʻlmagan. Har doim yuqori marralarni koʻzlaydigan bobodehqonlarimizning farzandlarini tarbiyalab, ularga kasb-hunar sirlarini oʻrgatishni biz taʼlim sohasi xodimlari oʻzimizning muqaddas burchimiz deb bilamiz, yosh avlodni tarbiyalashdek sharafli kasb egasi boʻlganimizdan hamisha faxrlanib yashaymiz. Shu oʻrinda ustoz-murabbiy Tursunboy Abdullayev qalamiga mansub quyidagi misralarni fikrim yakunida keltirib oʻtishni lozim topdim:

Dostonga arzigulik fazilatga boy,

Qadimiy, navqiron qishlogʻim Xitoy.

Bir yoni Xorazm, Mangʻit orasi,

Yer-suvi pokiza, elning sarasi.

Oʻrtada hayqirib oqar Qorakoʻz,

Koʻp erur u haqda rivoyat ham soʻz.

Yashnayver, kundan-kun ochib koʻrk-chiroy,

Qadimiy navqiron qishlogʻim Xitoy.

Bahodir Shomurodov,

Amudaryo transport kasb-hunar kolleji direktorining maʼnaviy va maʼrifiy ishlar boʻyicha oʻrinbosari.

(Suratda: Amudaryo melioratsiya kasb-hunar kolleji (illyustratsiya uchun)