“El desa Navoiyni...”

Xalqimiz buyuk olim, daho shoirlarni oftobga qiyoslashi bejiz emas. Oftob olamni oʻz nurlari ila yoritganiday, shoirlar ham, fozil-u fuzalolar ham odamlar koʻnglini ilm nuri bilan  charogʻon etadi.

Mumtoz adabiyotimizning buyuk namoyandalaridan biri, buyuk bobokalonimiz Alisher Navoiy oʻzining oʻlmas asarlari bilan xalqimiz qalbiga nur, ziyo bagʻishladi, mamlakat obod, xalq farovon boʻlmogʻi uchun kurashdi.

Navoiy asarlarining oʻquvchiga beradigan maʼnaviy quvvati shunchalik kuchliki, uni qayta-qayta oʻqigani sayin mazmun-mohiyatini chuqur anglayveradi, har safar xuddi yangi asar oʻqigandek taassurot olaveradi.

Mamlakatimizda har yili fevral oyida ulugʻ mutafakkir  shoir bobomiz tugʻilgan kuni munosabati bilan uning adabiy merosini targʻib etishga bagʻishlangan maʼnaviy-maʼrifiy tadbirlar, navoiyxonlik kechalari oʻtkaziladi.

Sana munosabati bilan Mangʻit shahridagi 36-sonli maktabda ham “Shams ul-millat”, yaʼni “Millat quyoshi” deya ardoqlanuvchi Alisher Navoiy hayoti va ijodiga bagʻishlangan “El desa Navoiyni...” deya nomlangan maʼnaviy-maʼrifiy kecha oʻtkazildi.

Maktab faollar zalida boʻlib oʻtgan ushbu tadbirni maktabning ona tili va adabiyoti fani oʻqituvchilari Umida Jumaniyozova, Saida Yusupova, Nargiza Oʻtalova, Eʼtibor Bobojonova, Dilnoza Qurboniyozova, Gulnora Sobirova, Muhayyo Karimova, Nasiba Karimovalar hamkorlikda tayyorlashdi.

Tadbirda maktabning ona tili va adabiyoti faniga qiziquvchi 3-11-sinflari oʻquvchilari ishtirok etishdi.

Buyuk mutafakkir shoir hayoti va ijodi, uning adabiy merosini oʻrganishning ahamiyati haqida maʼruza oʻqilganidan soʻng, sahnaga oʻquvchilar chiqib, shoir gʻazallari, ruboiylaridan namunalar ijro etishdi. Sahnada ikki oʻspirin yigit - mir Alisher va Husayn Bayqaro obrazlarining oʻquvchilar ijrosidagi talqini juda mahorat bilan ijro etildi. Biri endi shakllanib kelayotgan buyuk shoir, biri Xurosonning boʻlajak hukmdori Husayn Bayqaroning oʻzaro doʻstlik  munosabatlarini, Husayn Bayqaroning  doʻsti ijodiga nechogʻlik hurmat bilan qarashi va ijodini zavq bilan tinglashi, olqishlashi juda yorqin ifoda etib berildi. Shuningdek Alisher Navoiy asarlari asosida  tayyorlangan sahna koʻrinishlari ham tomoshabinlarga juda manzur boʻldi, oʻquvchilarni Navoiy ijodini yana ham chuqur oʻrganishga ragʻbatlantirdi.

Tadbir soʻngida maktab rahbariyati tomonidan faol qatnashgan oʻquvchilarga, oʻqituvchilarga minnatdorlik bildirildi.

Alisher Navoiyning boy va serqirra ijodi faqat oʻzbek adabiyotidagina emas, jahon adabiyotida ham salmoqli oʻrin tutadi. Uning lirik, epik va falsafiy asarlari XV asr adabiyotida chuqur iz qoldirdi, jahon madaniyatining mumtoz vakillari safidan joy oldi.

U oʻzi yaratgan asarlari bilan asrlar osha mangu yashayveradi.

Oygul RAJABOVA.