TABIIY FANLAR OYLIGI DOIRASIDA TADBIRLAR OʻTKAZILDI

Oʻzbekiston Respublikasi Xalq taʼlimi vazirligining tegishli buyrugʻiga asosan respublikamizning barcha umumiy oʻrta taʼlim maktablarida oʻquv yilining har oyi maʼlum fanlar oyligi sifatida belgilangan. Fan oyliklarini oʻtkazishda umumiy oʻrta taʼlim maktablarini toʻla qamrab olish, oʻqituvchilarning ijodiy faolligini oshirish, isteʼdodli, ijodkor oʻqituvchilarni aniqlash, ularning tajribalarini ommalashtirish va targʻib etish, taʼlim sifatini oshirish hamda taʼlim jarayonida qoʻllanilayotgan uslublarni takomillashtirish nazarda tutilgan.

30-yanvar kuni tabiiy fanlar oyligi munosabati bilan 30-sonli umumiy oʻrta taʼlim maktabida fizika fani oʻqituvchisi Adolat Masharipova oʻzi taʼlim berayotgan 3 ta 7-sinflar oʻquvchilari oʻrtasida bellashuv oʻtkazdi. Unda  oʻquvchilar butun olamni anglashga  xizmat qiluvchi fizika fanidan olgan bilimlarini namoyish etdilar.

Bellashuv 5 ta shart asosida, nazariy bilimlar hamda amaliy mashqlar boʻyicha oʻtkazildi. Unda uchta sinflar oʻquvchilari ham berilgan savollarga puxta va aniq javob berishga, gʻolib boʻlishga intildilar. Oʻquvchilarning bilimlarini tabiiy fanlar oʻquvchilaridan iborat hakamlar hayʼati aʼzolari odilona baholab bordilar va bellashuv soʻngida 7 v sinf oʻquvchilarini gʻolib deb eʼlon qildilar.

Maktablarda oʻqitiladigan umumiy taʼlim fanlarining har birining oʻziga xos oʻrni bor. Biroq tabiiy fanlarning biri – kimyo fani biroz murakkabroqday tuyulsa-da oʻqituvchi mahorati tufayli  oʻquvchilariga fan asoslarini puxta oʻrgata oladi, hatto qiziqarli fanga aylantirishi ham mumkin.

Shu kuni maktabda boʻlib oʻtgan fan oyligining yana bir tadbiri - “Sehrli kimyo” bunga misol boʻla oladi.

Maktabning kimyo fani oʻqituvchisi Baxtiyor Qurbonboyev dars berayotgan 8-sinflar oʻquvchilari ijrosida bajarilgan laboratoriya mashgʻulotlari oʻquvchilargagina emas, oʻqituvchilarga ham juda qiziqarli boʻldi.

Fanni chuqur oʻzlashtirishga intilayotgan oʻquvchilarning bajarayotgan laboratoriya ishlarini Baxtiyor Qurbonboyev sharhlab bordi.

Aytaylik hayotda biron kiyimimizga, yo xonadonimizga toʻshalgan gilamlarimizga yod yoki zelyonka  toʻkilib ketdi. Shunday vaqtda endi bundan hosil boʻlgan dogʻni ketkazishning iloji boʻlmasa, albatta aziyat chekkan  boʻlar edik. Kimyo fanini yaxshi oʻqigan oʻquvchi bunday rangli dogʻni qanday ketkazish yoʻlini biladi. Anor suvi darmon baxsh etuvchi, shifobaxsh xususiyatlari bilan birga indikatorlik vazifasini ham bajara oladi. Bularni oʻquvchilar “Sehrli kimyo” tadbiri davomida laboratoriya mashgʻulotlarida amalda koʻrsatib berishdi.

Maktabda oylik doirasida oʻtkazilgan ikkala tadbir ham barcha oʻquvchilarda ulkan qiziqish uygʻotdi. Tadbirlar maktab oʻqituvchilarining kasb mahoratini, oʻz darslarini oʻquvchilarga qay darajada yetkaza olayotganingina emas, oʻquvchilarning fanlarni qanday oʻzlashtirayotganini ham koʻrsatib berdi. Chunki oʻqituvchi mehnati samarasi oʻquvchilar egallagan bilim darajasida aks etadi.

Oygul RAJABOVA.