ChOYKOʻL OVULIDA QUTURISh KASALLIGINING OLDINI OLISh BOʻYIChA KOʻRGAZMALI SEMINAR TAShKIL ETILDI

Quturish kasalligi insoniyatni jiddiy tashvishga solayotgan muammolardan biri hisoblanadi. Ushbu kasallik 150 dan ortiq mamlakat va hududlarda uchraydi. Dunyoda har yili 55 ming nafar inson quturish kasalligidan jabr chekadilar. Ayniqsa, bahor mavsumida davosi hali topilmagan bu kasallikning yuqtirish xavfi ortadi.

Yurtimizda quturish kasalligining oldini olish va tarqalishiga qarshi kurashish maqsadida muntazam ravishda muhim chora-tadbirlar koʻrib boriladi.  Veterinariya va chorvachilikni rivojlantirish boʻlimi, Sanitariya-epidemiologik osoyishtalik va jamoat salomatligi xizmati, Obodonlashtirish boʻlimi hamda boshqa tegishli tashkilotlar hamkorligida tushuntirish-targʻibot ishlari amalga oshiriladi.

Mazkur yilda ham 20-yanvardan 1-martga qadar boʻlgan vaqt oraligʻi “Quturish kasalligiga qarshi kurashish oyligi” deb eʼlon qilindi va bu boʻyicha tegishli chora-tadbirlar ishlab chiqildi.

1-fevral kuni Choykoʻl ovulidagi 42-maktabda “Quturish kasalligiga qarshi kurashish oyligi” doirasida koʻrgazmali seminar oʻtkazilib, kasallikning oldini olish boʻyicha tushunchalar berildi. Oylik doirasida tuman Veterinariya va chorvachilikni rivojlantirish boʻlimi tomonidan tashkillashtirilgan ushbu seminarda tegishli tashkilotlar masʼullari ishtirok etdilar. Seminar davomida tuman Favqulodda vaziyatlar boʻlimi bilan hamkorlikda “Odamlar va hayvonlarda quturish kasalligining oldini olish borasida Favqulodda vaziyatlar xizmatlarining hamkorlikdagi harakatlari” mavzusida oʻquv mashgʻulot oʻtkazildi. Mashgʻulotga jami 4 ta texnika jalb qilinib, Favqulodda vaziyatlar boʻlimidan 78 nafar shaxsiy tarkib aʼzolari qatnashdi.

Oʻquv mashgʻulot davomida koʻrgazmali tarzda insonga it tajovuz qilgan paytda amalga oshiriladigan chora-tadbirlar koʻrsatib berildi. Tadbirning taʼsirchanligini oshirish maqsadida oʻtkazilgan amaliy mashgʻulot davomida jarohatlangan odamga zudlik bilan birinchi tibbiy yordam koʻrsatish, itning tekshirilishi uchun Obodonlashtirish boʻlimi xodimlari tomonidan olib ketilishi, voqea joyida Veterinariya xizmati tomonidan amalga oshirilishi lozim boʻlgan harakatlar barchasi koʻrsatib berilgani yanada maqsadga muvofiq boʻldi.

Shundan soʻng, veterinariya xizmati xodimlari bilan hamkorlikda olib borilayotgan keng qamrovli tadbirlar, aholi oʻrtasida kasallikdan himoyalanish boʻyicha koʻrilayotgan choralar, targʻibot va tashviqot ishlari toʻgʻrisidagi maʼruzalar tinglandi. Jumladan, tuman Veterinariya va chorvachilikni rivojlantirish boʻlimi tomonidan yanvar oyida 800 bosh it profilaktik emlangani, mutaxassislar tomonidan hududlarda emlash ishlari davom ettirilayotgani, emlashni uzluksiz olib borish uchun zahiralar yetarliligi toʻgʻrisida maʼlumot berildi. Shu oʻrinda har bir hududdagi fuqarolar yigʻinlari masʼullari xonadonlarda boqilayotgan uy hayvonlari, asosan it va mushuklar roʻyxatini shu hududga masʼul boʻlgan veterinariya xodimiga taqdim etishi kerakligini aytib oʻtildi. Fuqarolarning it saqlash qoidalariga rioya etmasliklari va hayvonlar bilan munosabatda ehtiyotsizlikka yoʻl qoʻyilishi oqibatida quturish kasalligi kelib chiqishi, beparvo boʻlmaslik kerakligi tushuntirildi.

Sanitariya-epidemiologik osoyishtalik va jamoat salomatligi xizmati xodimlari tomonidan quturish kasalligi – oʻtkir kechuvchi, oʻta xavfli zooantroponoz yuqumli kasallik ekanligi, oxiri oʻlim bilan tugashi toʻgʻrisida maʼlumot berildi. Bugungi kunda ushbu kasallikning davosi ishlab chiqilmaganligi, quturish kasalligining manbai, asosan kemiruvchilar, daydi va qarovsiz itlar, mushuklar hamda yovvoyi hayvonlar hisoblanishi taʼkidlandi. Ushbu kasallikni davolashdan koʻra, undan ehtiyot boʻlishga, himoyalanishga harakat qilish afzalligi aytilib, choralari toʻgʻrisida keng toʻxtalib oʻtildi.

Seminar davomida shu kabi targʻibot tadbirlarini barcha hududlarda keng miqyosda oʻtkazilishi kerakligi, aholini it va mushuklarni roʻyxatga olish, kasallikka qarshi emlatish choralarini koʻrib borishga ogohlantirish uchun muntazam ravishda tushuntirish ishlari tashkil etish choralari muhokama etildi. Shuningdek, ishtirokchilar tomonidan berilgan savollarga atroflicha javoblar berildi va keng tushunchalarga, maʼlumotlarga ega boʻlishlari taʼminlandi.

T.Abdullayev, tuman Veterinariya va chorvachilikni rivojlantirish boʻlimi mutaxassisi.