ЧОЙКЎЛ ОВУЛИДА ҚУТУРИШ КАСАЛЛИГИНИНГ ОЛДИНИ ОЛИШ БЎЙИЧА КЎРГАЗМАЛИ СЕМИНАР ТАШКИЛ ЭТИЛДИ

Қутуриш касаллиги инсониятни жиддий ташвишга солаётган муаммолардан бири ҳисобланади. Ушбу касаллик 150 дан ортиқ мамлакат ва ҳудудларда учрайди. Дунёда ҳар йили 55 минг нафар инсон қутуриш касаллигидан жабр чекадилар. Айниқса, баҳор мавсумида давоси ҳали топилмаган бу касалликнинг юқтириш хавфи ортади.

Юртимизда қутуриш касаллигининг олдини олиш ва тарқалишига қарши курашиш мақсадида мунтазам равишда муҳим чора-тадбирлар кўриб борилади.  Ветеринария ва чорвачиликни ривожлантириш бўлими, Санитария-эпидемиологик осойишталик ва жамоат саломатлиги хизмати, Ободонлаштириш бўлими ҳамда бошқа тегишли ташкилотлар ҳамкорлигида тушунтириш-тарғибот ишлари амалга оширилади.

Мазкур йилда ҳам 20 январдан 1 мартга қадар бўлган вақт оралиғи “Қутуриш касаллигига қарши курашиш ойлиги” деб эълон қилинди ва бу бўйича тегишли чора-тадбирлар ишлаб чиқилди.

1 февраль куни Чойкўл овулидаги 42-мактабда “Қутуриш касаллигига қарши курашиш ойлиги” доирасида кўргазмали семинар ўтказилиб, касалликнинг олдини олиш бўйича тушунчалар берилди. Ойлик доирасида туман Ветеринария ва чорвачиликни ривожлантириш бўлими томонидан ташкиллаштирилган ушбу семинарда тегишли ташкилотлар масъуллари иштирок этдилар. Семинар давомида туман Фавқулодда вазиятлар бўлими билан ҳамкорликда “Одамлар ва ҳайвонларда қутуриш касаллигининг олдини олиш борасида Фавқулодда вазиятлар хизматларининг ҳамкорликдаги ҳаракатлари” мавзусида ўқув машғулот ўтказилди. Машғулотга жами 4 та техника жалб қилиниб, Фавқулодда вазиятлар бўлимидан 78 нафар шахсий таркиб аъзолари қатнашди.

Ўқув машғулот давомида кўргазмали тарзда инсонга ит тажовуз қилган пайтда амалга ошириладиган чора-тадбирлар кўрсатиб берилди. Тадбирнинг таъсирчанлигини ошириш мақсадида ўтказилган амалий машғулот давомида жароҳатланган одамга зудлик билан биринчи тиббий ёрдам кўрсатиш, итнинг текширилиши учун Ободонлаштириш бўлими ходимлари томонидан олиб кетилиши, воқеа жойида Ветеринария хизмати томонидан амалга оширилиши лозим бўлган ҳаракатлар барчаси кўрсатиб берилгани янада мақсадга мувофиқ бўлди.

Шундан сўнг, ветеринария хизмати ходимлари билан ҳамкорликда олиб борилаётган кенг қамровли тадбирлар, аҳоли ўртасида касалликдан ҳимояланиш бўйича кўрилаётган чоралар, тарғибот ва ташвиқот ишлари тўғрисидаги маърузалар тингланди. Жумладан, туман Ветеринария ва чорвачиликни ривожлантириш бўлими томонидан январь ойида 800 бош ит профилактик эмлангани, мутахассислар томонидан ҳудудларда эмлаш ишлари давом эттирилаётгани, эмлашни узлуксиз олиб бориш учун заҳиралар етарлилиги тўғрисида маълумот берилди. Шу ўринда ҳар бир ҳудуддаги фуқаролар йиғинлари масъуллари хонадонларда боқилаётган уй ҳайвонлари, асосан ит ва мушуклар рўйхатини шу ҳудудга масъул бўлган ветеринария ходимига тақдим этиши кераклигини айтиб ўтилди. Фуқароларнинг ит сақлаш қоидаларига риоя этмасликлари ва ҳайвонлар билан муносабатда эҳтиётсизликка йўл қўйилиши оқибатида қутуриш касаллиги келиб чиқиши, бепарво бўлмаслик кераклиги тушунтирилди.

Санитария-эпидемиологик осойишталик ва жамоат саломатлиги хизмати ходимлари томонидан қутуриш касаллиги – ўткир кечувчи, ўта хавфли зооантропоноз юқумли касаллик эканлиги, охири ўлим билан тугаши тўғрисида маълумот берилди. Бугунги кунда ушбу касалликнинг давоси ишлаб чиқилмаганлиги, қутуриш касаллигининг манбаи, асосан кемирувчилар, дайди ва қаровсиз итлар, мушуклар ҳамда ёввойи ҳайвонлар ҳисобланиши таъкидланди. Ушбу касалликни даволашдан кўра, ундан эҳтиёт бўлишга, ҳимояланишга ҳаракат қилиш афзаллиги айтилиб, чоралари тўғрисида кенг тўхталиб ўтилди.

Семинар давомида шу каби тарғибот тадбирларини барча ҳудудларда кенг миқёсда ўтказилиши кераклиги, аҳолини ит ва мушукларни рўйхатга олиш, касалликка қарши эмлатиш чораларини кўриб боришга огоҳлантириш учун мунтазам равишда тушунтириш ишлари ташкил этиш чоралари муҳокама этилди. Шунингдек, иштирокчилар томонидан берилган саволларга атрофлича жавоблар берилди ва кенг тушунчаларга, маълумотларга эга бўлишлари таъминланди.

Т.Абдуллаев, туман Ветеринария ва чорвачиликни ривожлантириш бўлими мутахассиси.