TOR YoP MAHALLASIDA JINOYaT MUHOKAMASIGA BAGʻIShLANGAN YIGʻILISh BOʻLIB OʻTDI

Tor yop mahalla fuqarolar yigʻinida mahalla faollari va keng jamoatchilik ishtirokida muhokama yigʻilishi oʻtkazildi. Yigʻilishda Qoraqalpogʻiston Respublikasi Ichki ishlar vazirining birinchi oʻrinbosari Baxtiyor Rajabov, tuman Ichki ishlar boʻlimi boshligʻi Ulugʻbek Xudoyberganov, Mahalla va oilani qoʻllab-quvvatlash boʻlimi boshligʻi Alisher Yoʻldoshev va boshqa masʼullar qatnashishdi.

Mazkur yigʻilishda mahalla hududida sodir etilgan mudhish jinoyat, uning kelib chiqishiga sabab boʻlgan holatlar atroflicha muhokama qilindi. Yigʻilishda dastlab ushbu noxush hodisa va uning oqibatlari toʻgʻrisida tuman Ichki ishlar boʻlimi boshligʻi Ulugʻbek Xudoyberganov tomonidan batafsil maʼlumot berildi.

Sodir etilgan jinoyat tafsilotlariga koʻra, joriy yilning 26-yanvar kunidan 27-yanvar kuniga oʻtar kechasi boshqa viloyat fuqarosi boʻlgan ayol turmush oʻrtogʻi bilan yaqin qarindoshining uyiga mehmonga kelgan. Ayol oʻsha yaqin qarindoshi boʻlgan uy egasi bilan oʻrtalaridagi oldi-berdi masalasi boʻyicha qattiq tortishib qolishgan. Oʻzaro nizodan kelib chiqqan janjal borgan sari kattalashib, erkaklar aralashuviga sabab boʻlgan. Janjal vaqtida bir-birlarini qattiq haqorat qilib, qoʻl koʻtarishgacha borishgan. Qattiq gʻazablangan mehmon ayol va erkak qoʻliga tushib qolgan xoʻjalik pichogʻini olib, qarshisidagilarning tana qismiga koʻp marotaba sanchib, jarohat yetkazishgan va nomaʼlum tomonga qochib ketishgan. Pichoqdan jarohatlangan uy egalari ogʻir ahvolda shifoxonaga yotqizilgan.

Olib borilgan tezkor-qidiruv tadbirlari natijasida ushbu jinoyatni sodir etishda gumon qilinayotgan ayol va erkak Respublikamiz tumanlaridan biridagi yoʻl-patrul xizmati maskanida qoʻlga olingan. Mazkur holat yuzasidan shu kunning oʻzida jinoyat ishi qoʻzgʻatilib, tergov harakatlari boshlab yuborilgan.  

Yigʻilishda soʻzga chiqqan masʼullar, ushbu jinoyatning sodir etilishiga asosan loqaydlik, befarqlik sabab boʻlganligini taʼkidlashdi. Atrof-muhitga loqayd va beparvo munosabat tufayli shunday mudhish jinoyat sodir etilganligi toʻgʻrisida soʻz yuritilib, boshqa hudud fuqarosi kelgan paytda hujjat va boshqa masalalari aniqlashtirilishiga eʼtiborsiz boʻlmaslik kerakligi aytildi. Shuningdek, kichik nizolarga va oʻzaro tortishuvlarga guvoh boʻlayotgan paytda atrofdagilarning majburiyatlari, tinchlikni saqlash oldidagi vazifalari, zudlik bilan  oʻsha hududda xizmat olib borayotgan profilaktika inspektoriga xabar qilish hamda boshqa bir qancha mavzularda soʻz bordi.

Shuningdek, har bir fuqaro bunday salbiy holatlar sodir boʻlishini tomoshabin boʻlib kuzatib turishi emas, balki uning oldini olishga harakat qilishi shartligi, shunday holatlarda beparvolik bilan qaramasdan, oʻzini masʼul deb bilishi kerakligi taʼkidlab oʻtildi.

Bundan tashqari, mahalla raisi, nuroniylar va mahalla faollari ham ushbu holat borasida oʻzlarining fikr-mulohazalarini bildirishib, kelgusida bunday holatlar takrorlanmasligi uchun doim hamjihatlikda harakat qilishlarini taʼkidlab oʻtishdi.

Muhokama yakunida  yigʻilishda ishtirok etganlarning barchasi oila aʼzolari, qarindosh-urugʻlari hamda tanish-bilishlariga ularni ibrat olishga chaqirish maqsadida mazkur jinoyatning kelib chiqish sabablari va uning salbiy oqibatlarini yetkazishlari kerakligi aytildi. Shuningdek, bu borada tegishli mutasaddilarga ham muhim chora-tadbirlar belgilab berilib, tegishli vazifalar topshirildi.

Sultan Jarilkaganov, tuman Ichki ishlar boʻlimi boshligʻi oʻrinbosari.