1-sonli kasb-hunar maktabida yoshlarga kasb sirlari oʻrgatilmoqda

Mamlakatimizda keyingi yillarda kasb-hunar taʼlimi sohasidagi davlat siyosati tubdan oʻzgardi. Sohada tub islohotlarni amalga oshirish va zamonaviy professional taʼlim tizimini barpo etish maqsadida Prezidentimiz tomonidan 2019-yilda “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida”gi Farmoni qabul qilindi.

Mazkur Farmon Oʻzbekiston tarixida yangi professional taʼlim tizimini tashkil etishga asos boʻldi va yurtimizda kasb-hunar kollejlari negizida kasb-hunar maktablari faoliyati yoʻlga qoʻyildi. Amudaryo tumanida ham yangi oʻquv yilidan 2 ta kasb-hunar maktabida oʻquvchi-yoshlar kasb va hunarga oʻrgatila boshladi.

Qipchoq ovulida joylashgan Amudaryo agrobiznes kolleji negizida yangi tashkil etilgan 1-sonli kasb-hunar maktabiga mazkur oʻquv yilida 4 ta mutaxassislik boʻyicha umumtaʼlim maktablarining 9-sinfini tugatgan 122 nafar oʻquvchi qabul qilindi. 

Ayni paytda mazkur kasb-hunar maktabida taʼlim olayotgan oʻquvchilar avtomobillarni taʼmirlash chilangari, elektro gaz payvandchi, tikuvchilik, asalarichilik kabi kasb va hunarlarni oʻrganishmoqda. Ularga 26 nafar oʻqituvchi va 4 nafar ishlab chiqarish taʼlimi ustalari taʼlim-tarbiya berib, hunar oʻrgatishmoqda.

Taʼlim jarayonida yoshlarga taqdim etilayotgan bunday imkoniyatlar ertamiz egalari boʻlgan yosh avlodning oʻz salohiyatini toʻla namoyon etishi, oʻzi tanlagan kasb boʻyicha oʻqishi, ishlashi, hayotda oʻz oʻrnini topib olishi va jamiyat ravnaqiga munosib hissa qoʻshadigan mutaxassislar boʻlib yetishishi uchun mustahkam poydevor yaratadi. Shuni nazarda tutib, ushbu kasb-hunar maktabi maʼmuriyati, jamoasi ham tegishli yoʻriqnomalarda koʻrsatilgan meʼyoriy tartiblardan kelib chiqib kadrlar tayyorlash vazifasini oʻz faoliyatining bosh mezoni qilib belgilagan. Maktabda kadrlar tayyorlash 2021-2022 oʻquv yilida umumtaʼlim maktablarining 9-sinf bitiruvchilari hisobidan shakllantirilgan guruhlarda 2 yillik umumtaʼlim va mutaxassislik fanlarining integratsiyalashgan dasturlari asosida amalga oshiriladi.

Oʻquvchilarga 1-sonli kasb-hunar maktabida umumtaʼlim va maxsus fanlardan dars mashgʻulotlari oʻtkazilmoqda. Umutaʼlim fanlardan 20 nafar, maxsus fanlardan 6 nafar malakali oʻqituvchilar barcha dars mashgʻulotlarini zamonaviy pedagogik texnologiyalar boʻyicha tashkil etib, oʻquvchilarning qiziqishlarini oshirishmoqda. Ularga sifatli bilim berib, yetarli koʻnikmaga ega boʻlishlarini taʼminlash maqsadida barcha mashgʻulotlarni fan kabinetlari, laboratoriya xonalarida oʻtkazishmoqda. Bundan tashqari, maktabda taʼlim olayotgan oʻquvchilar Davlat byudjeti hisobidan bazaviy hisoblash miqdorining bir barobari miqdorida stipendiya va uch mahal ovqat bilan taʼminlanadi.

Oʻquvchilarning darsdan tashqari boʻsh vaqtlarini mazmunli oʻtkazish maqsadida umumtaʼlim fanlaridan 9 ta, maxsus fanlardan 4 ta dars toʻgaraklari tashkil etildi. Jumladan, Prezidentimizning 5 ta muhim tashabbusi doirasida ham 4 ta toʻgarak faoliyati yoʻlga qoʻyilgan boʻlib, oʻquvchilar ularga toʻliq qamrab olingan. Ushbu 5 ta tashabbus doirasidagi sport toʻgaragida oʻquvchilar oʻrtasida shaxmat-shashka, voleybol boʻyicha musobaqalar muntazam ravishda tashkil qilinadi.

Yoshlar oʻrtasida kitobxonlikni keng targʻib qilish, maʼnaviyatini yuksaltirish maqsadidagi “Yosh kitobxonlar” toʻgaragida ham kitobxonlar safi ortmoqda. Kasb-hunar maktabida 18 mingdan ziyod kitob fondiga ega boʻlgan kutubxona mavjud. Ushbu kutubxonadagi kitoblarning 9 mingdan ortigʻi umumtaʼlim, 4 mingdan ziyodi maxsus fanlar kitoblari, qolganlari ijtimoiy-siyosiy va badiiy adabiyotlardan iborat.

Jamiyatimizda bilimdon, mustaqil fikrlovchi, yuqori malakali, maʼnaviyatli, mohir kasb egalari tobora koʻproq talab qilinmoqda. Shu boisdan 1-sonli kasb-hunar maktabida oʻquvchilarga hunar, kasb oʻrgatish bilan birga bilimli qilib kamolga yetkazish eng asosiy maqsad qilib olingan. 

O. Xudoyberganova.