DAVLAT XIZMATLARI MARKAZIDA ELEKTRON DAVLAT XIZMATLARIDAN FOYDALANISh AFZALLIKLARI BOʻYIChA TAQDIMOT OʻTKAZILDI

7-yanvar kuni tuman Davlat xizmatlari markazida elektron davlat xizmatlaridan foydalanish afzalliklari va qulayliklarini batafsil tushuntirish maqsadida taqdimot oʻtkazildi.

Mamlakatimizda davlat xizmatlarini koʻrsatish tizimi bosqichma-bosqich takomillashtirilib borilmoqda. “Fuqarolar emas, hujjatlar harakatlanadi” tamoyilini amalda roʻyobga chiqarish, xalqimizning davlat organlari va ular tomonidan koʻrsatiladigan xizmatlarga boʻlgan ishonchini qozonish, Davlat xizmatlari markazlarida xizmat koʻrsatishning milliy tizimini sifat jihatidan yangi darajaga oʻtkazish borasida jadal surʼatlardagi islohotlar amalga oshirilmoqda.

Amudaryo tumani aholisiga tez va sifatli xizmat koʻrsatib kelayotgan Davlat xizmatlari markazida bugungi kunda 150 ga yaqin turdagi xizmat koʻrsatilishi uchun barcha sharoit yaratilgan. Aholining ogʻirini-yengil uzogʻini yaqin qilish hamda moddiy xarajatlarini tejash maqsadida yildan-yilga davlat xizmatlari oson, qulay va shaffof tarzda amalga oshirilmoqda.

Joriy yil 7-yanvar kuni tuman Davlat xizmatlari markazida elektron davlat xizmatlaridan foydalanish afzalliklari va qulayliklarini batafsil tushuntirish maqsadida taqdimot oʻtkazildi. Taqdimotda Oʻzbekiston Respublikasi Davlat xizmatlari Agentligi direktori oʻrinbosari Nuʼmon Muhammadiyev hamda Agentlik matbuot xizmati xodimlari, Davlat xizmatlari agentligi Qoraqalpogʻiston Respublikasi boshqarmasi boshligʻi Kazbek Artikov va Agentlikning boshqa masʼullari, tuman Davlat xizmatlari markazi xodimlari, mahalla fuqarolar yigʻinlari raislari, maktab oʻqituvchilari va oʻquvchilari, fuqarolar ishtirok etdilar.

Oʻzbekiston Respublikasi Davlat xizmatlari Agentligi direktori oʻrinbosari Nuʼmon Muhammadiyev taqdimot davomida elektron davlat xizmatlaridan foydalanish koʻnikmalari toʻgʻrisida soʻz yuritib,  undan foydalanish tartibi va qoidalarini batafsil tushuntirib berdi. Taqdimotda ishtirok etayotgan boshqa masʼullar tomonidan Davlat xizmatlari koʻrsatish sohasidagi yangiliklar, amalga oshirilayotgan islohotlar, yengilliklar boʻyicha huquqiy tushuntirishlar berildi.

Shuningdek, shu kunning oʻzida Davlat xizmatlarini sayyor tartibda koʻrsatish amaliyotini keng jamoatchilik ishtirokida amalga oshirish maqsadida tumandagi Tosh-yop ovul fuqarolar yigʻini hududida  sayyor qabul tashkil qilindi. Sayyor qabulda hududda istiqomat qiluvchi fuqarolarga davlat xizmatlaridan elektron shaklda foydalanish va uning qulayliklari boʻyicha keng tushunchalar berildi. Shundan soʻng, ovul aholisiga sayyor tartibda davlat xizmatlarini koʻrsatish maqsadida fuqarolardan arizalar qabul qilindi. 

Markaz xodimlari tomonidan olis hududlarda istiqomat qiluvchi fuqarolarga ovul va mahallalarga borgan holda davlat xizmatlari koʻrsatilishi ularning moddiy sarf-xarajatlarining tejalishiga olib kelmoqda. Bu kabi tadbirlar Davlat xizmatlari markazlarida har yili olib borilishi yoʻlga qoʻyilgan.

Oʻtgan 2020-yil davomida tuman Davlat xizmatlari markazlari tomonidan 61 ming 883 davlat xizmati koʻrsatildi. Markazda 856 tadbirkorlik subektlari davlat roʻyxatidan oʻtkazildi. Shuningdek, 768 nafar fuqaro tomonidan elektron davlat xizmatlaridan erkin foydalangan holda hujjatlashtirish ishlari amalga oshirildi.

Markaz tomonidan sayyor tartibda 3978 davlat xizmati koʻrsatilib, chekka hududlarda yashovchi aholiga qulaylik yaratildi. Bugunga kelib aholining barcha qatlami hujjatlar borasidagi muammolariga Davlat xizmatlari markazlari orqali yechim topmoqda. Agentlik faoliyati yoʻlga qoʻyilgan dastlabki paytda Markazlar tomonidan 33 turdagi davlat xizmatlari koʻrsatila boshlagan boʻlsa, hozirgi kunda xizmat turlari 100 tadan oʻtdi. Yurtdoshlarimiz ushbu xizmatlardan turli byurokratik toʻsiqlar, ovoragarchiliklarsiz bahramand boʻlishmoqda.

Davlat xizmatlari markazi tom maʼnoda qulayliklar maskaniga aylandi. Fuqarolar bu joyda bir vaqtning oʻzida bir necha turdagi davlat xizmatlaridan foydalanish imkoniyatiga ega. Taʼkidlash joizki, bugunga kelib ushbu tizim butun xalqimizning ishonchli va tezkor koʻmakchisiga aylandi.

Umida Saparboyeva, tuman Davlat xizmatlari markazi boʻlim boshligʻi.