«BARKAMOL AVLOD» BOLALAR MAKTABIDA IQTIDORLI YoShLAR TARBIYaLANMOQDA

Oʻzbekiston Respublikasi Prezidentining 2019-yil 30-sentyabrdagi 4467-sonli «Xalq taʼlimi tizimidagi maktabdan tashqari taʼlim samaradorligini tubdan oshirish chora-tadbirlari toʻgʻrisida»gi qaroriga muvofiq tuman «Barkamol avlod» markazi negizida 2020-yilning yanvaridan oʻz faoliyatini boshlagan «Barkamol avlod» bolalar maktabida 44 nafar pedagog xodimlar 1188 nafar bolalarga mashgʻulotlar olib borishmoqda.

Maktabda jami 45 ta, shundan «Texnik ijodiyoti» yoʻnalishida 6 ta toʻgarakka 108 nafar, «Badiiy ijodiyot» yoʻnalishida 31 ta toʻgarakda 792 nafar, «Oʻlkashunoslik va ekologiya» yoʻnalishida 4 ta toʻgarakda 120 nafar, «Chet tili» yoʻnalishida 2 ta toʻgarakda 72 nafar, sport yoʻnalishida 4 ta toʻgarakda 96 nafar bolajonlarga taʼlim-tarbiya berilib, iqtidori yuksaltirilmoqda. Bolalarga taʼlim-tarbiya berish, kasbga yoʻnaltirish, oʻzlari qiziqqan yoʻnalishlarda qobiliyatlarini namoyon etishida toʻgarak rahbarlarining mahorati, kasbiga sadoqati va bilimi muhim oʻrin tutadi.

Shu maqsadda maktab toʻgarak rahbarlarining malakalarini oshirishga yoʻnaltirishga alohida eʼtibor qaratilmoqda. Shuningdek, har oyda ochiq darslar, seminarlarda toʻgarak rahbarlari mahorati, oʻquvchilarni oʻz mashgʻulotlariga qiziqtira olishi va qay darajada kasbga ilk koʻnikma shakllantira olishga erishayotganliklari namoyon boʻlmoqda. Ochiq darslarga, seminarlarda barcha toʻgarak rahbarlari kuzatuvchi sifatida ishtirok etib, hamkasbi ishiga baho beradi va oʻziga xos tajribalarini oʻrganib ham oladi.

Yakunlangan yil maktab maʼmuriyati, toʻgarak rahbarlari uchun ham oʻziga xos sinov yili boʻldi. Boisi koronavirus pandemiyasi tarqalishi munosabati bilan oʻrnatilgan cheklovlarga koʻra, barcha taʼlim, maktabdan tashqari taʼlim muassasalari faoliyati onlayn ishlash rejimiga oʻtdi.

Tumanimizdagi «Barkamol avlod» bolalar maktabidagi toʻgaraklarda ham mashgʻulotlar onlayn tarzda tashkil etildi. Mashgʻulotlarni  tasvirga olish, montaj qilish va uzatishda maktabning monitoring yurituvchi va madaniy-ommaviy tadbirlar tashkilotchisi Gʻayrat Jumaniyozovning xizmatlari eʼtiborga sazovor boʻldi. Ushbu mashgʻulotlarni oʻquvchilar bilan birga barcha ota-onalar ham kuzatib borishdi va toʻgaraklar rahbarlarining ishiga yuqori baho berishdi.

2020-yil oktyabridan KOVID-19 pandemiyasi davrida umumiy oʻrta taʼlim maktablari va oʻrta maxsus maktab internatlarining faoliyatini tashkillashtirish boʻyicha vaqtinchalik qabul qilingan sanitariya epidemiologik talablarga muvofiq mashugʻlotlar yana anʼanaviy tarzda davom ettirila boshladi. Karantin qoidalariga toʻla rioya qilingan holda boshlangan mashgʻulotlardagi oʻquvchilar faolligi oʻzbek tiliga davlat tili maqomi berilgan kun munosabati bilan oʻtkazilgan «Ona tilim – qalbim quyoshi» nomli tadbirdayoq yaqqol sezildi. Shuningdek yangi oʻquv yili boshlanishi munosabati bilan va oʻquvchi yoshlarni «Barkamol avlod» bolalar maktabi toʻgaraklariga jalb qilish maqsadida oʻtkazilgan «Ochiq eshiklar kuni» tadbiri ham koʻpchilikning eʼtiborini tortdi.

Mamlakatimizda olib borilayotgan keng koʻlamli islohotlarni aholi orasida keng targʻib qilish, islohotlarning mazmun-mohiyati va ahamiyatini keng jamoatchilikka yetkazish maqsadida butun respublikamiz boʻylab «Yangi Oʻzbekiston – yangicha dunyoqarash» shiori ostida oʻtkazilgan targʻibot tadbirlarining  tumanimizda oʻtkazilgan uchrashuv, sport bayramlari, kontsert dasturlarida oʻquvchilarimiz munosib ishtirok etib, koʻpchilik eʼtiroflariga sazovor boʻlishdi. Shuningdek tumanimizda muhim sanalar munosabati bilan oʻtkazilayotgan tadbirlarda ham oʻquvchilar oʻz iqtidorlarini namoyish etishayapti.

Maktab rahbariyati oʻz kasbiga sadoqat bilan ishlab, oʻquvchilarda kasb-hunarga boshlangʻich koʻnikmalarni shakllantirayotgan, sanʼat, musiqa, sport, fanlar boʻyicha iqtidorini yuksaltirishga erishayotgan va oʻquvchilari turli koʻrik-tanlovlarda tuman, respublika, mamlakat miqyosida sovrinli oʻrinlarni egallayotgan toʻgaraklar rahbarlarini ragʻbatlantirib borishga ham alohida eʼtibor qaratadi. Bu esa kelgusida ularning faoliyati yana ham samarali boʻlishini taʼminlashi tabiiy.

Qobiliyatsiz bolaning oʻzi boʻlmaydi. Yosh oʻgʻil-qizlarning iqtidorini aniqlab, toʻgarak mashgʻulotlari orqali rivojlantirishga erishayotgan maktab oʻqituvchilar jamoasining kelgusi ishlarida ham muvaffaqiyatlar tilab qolamiz.

Oygul RAJABOVA.