NAZORAT TADBIRLARI OʻTKAZILMOQDA

Donishmandlar yurti tinchning oʻzi tinch, deb bekorga aytishmagan. Tinchlik, osoyishtalik hukm surgan joyda yuksalish, taraqqiyot boʻladi, mamlakat gullab-yashnaydi, odamlari tunlari bexavotir orom oladi, kunduzi ertagi kuniga ishonch bilan unumli mehnat qiladi.

Bugungi glaballashuv shiddat bilan kechayotgan murakkab sharoitda Yaratgan bizga inʼom etgan osoyishta hayotni qadrlashimiz, ogoh va sergak, hushyor yashashimiz lozimligini unutmasligimiz darkor.

Keyingi yillarda bu borada ichki ishlar organlarining jinoyatchilikka qarshi kurashida, huquqbuzarliklarning oldini olishga, jamoat tartibini saqlashida va fuqarolar xavfsizligini taʼminlashida aholining huquqiy ongi, savodxonligini oshirishga eʼtibor qaratilayotganligi muhim ahamiyat kasb etmoqda. Natijada tizim xodimlarining xalq bilan hamkorligi kuchaydi, elu yurt tinchligiga rahna soluvchi va jamiyat rivojiga salbiy taʼsir koʻrsatuvchi holatlarga qarshi keng jamoatchilik bilan birgalikda kurash olib borishga alohida eʼtibor qaratilmoqda.

Qoraqalpogʻiston Respublikasi Ichki ishlar vazirligining farmoyishiga koʻra tumanimizda oʻtkazilayotgan “Tozalash-Aptiterror” maxsus profilaktik tadbirlariga ham ovul va mahallalar yigʻinlari raislari, keng jamoatchilik vakillari jalb qilingan.

Ushbu tadbir boshlanishi oldidan tuman hokimligi binosi oldida yigʻilish oʻtkazildi va unda Qoraqalpogʻiston Respublikasi Ichki ishlar vazirligining terrorizm va ekstremizmga qarshi kurashish boshqarmasi boshligʻi, podpolkovnik Salomat Sariyev va tuman Ichki ishlar boʻlimi boshligʻi oʻrinbosarlari hamda chegara hududda joylashgan 16 ta ovul va mahallalar raislari, profilaktika inspektorlari qatnashdilar.

Yigʻilishda Salomat Sariyev ushbu tadbirni oʻtkazishdan maqsad tuman xalqining tinch-osoyishta hayoti bardavom boʻlishiga erishish, buningdek farovon kunlarga rahna solishga, yot gʻoyalarni targʻib etib,fuqarolarni, ayniqsa, yoshlarni toʻgʻri yoʻldan ozdirishga urinayotganlar tuzogʻidan asrash, shu aziz Vatanimizni koʻz qorachigʻiday himoya qilishga ragʻbatlantirishdir, deya taʼkidladi. Shuningdek, Yangi yil bayrami kunlari har qanday tartibsizliklar, huquqbuzarliklar kelib chiqishining oldin olish, odamlarimiz bayramni oʻz uylarida, oilasi davrasida xush kayfiyatda qarshi olishiga erishish ekanligini taʼkidladi.

Yigʻilishda belgilangan rejaga koʻra, 19-, 20-, 21-dekabr kunlarida chegara hududda joylashgan 16 ta ovul va mahallalarda tozalash tadbirlari oʻtkazildi. Tadbirga jami 88 nafar xodimlar jalb qilindi.

Tozalash tadbirlari davomida  jinoyat sodir etishga moyilligi boʻlgan 11 nafar fuqarolar bilan yakka  tartibda profilaktik suhbatlar olib borildi, spirtli ichimlikka  ruju qoʻygan 6 nafar shaxs aniqlanib, davolanishga jalb etildi.

Aholi orasida noqonuniy tarzda  ov qurollarini saqlash oqibatlari tushuntirilishi natijasida 1 nafar shaxs oʻz xohishi bilan oʻqotar qurolini Ichki ishlar boʻlimiga olib kelib topshirdi, 26 ta maktabda qorovullar tungi navbatchiligi nazorat qilinib, ular bilan profilaktik suhbatlar olib borildi, avtomashinasida turli qoidabuzarlik holatlari aniqlanib, jarimaga tortilgan haydovchilardan belgilangan muddatda jarima toʻlamay yurgan 26 nafariga choralar koʻrildi. Yaʼni avtomashinalari jarima maydonchasiga qoʻyildi.

Shuningdek, maʼmuriy huquqbuzarlik sodir etib, sud qaroriga koʻra, jarima jazosi tayinlanib, toʻlamay yurgan fuqarolar bilan profilaktik suhbatlar olib borildi.

Koʻrilayotgan buningdek chora-tadbirlardan koʻzlangan maqsad xalqimizning tinch, farovon hayotini taʼminlashga qaratilgandir

Oygul RAJABOVA.