Xalq taʼlimi vazirligi tomonidan sayyor qabul oʻtkazildi

Joriy yilning  10-dekabr sanasidan 2021-yil 8-yanvargacha Qoraqalpogʻiston Respublikasi Xalq taʼlimi vazirligi tizimida ham sayyor qabullar kunlarini oʻtkazish rejalashtirilgan. Vazirlik tomonidan ishlab chiqilgan rejaviy jadvalga muvofiq Vazirlik hamda tuman Xalq taʼlimi boʻlimi masʼullari ishtirokida sayyor qabul oʻtkazildi.

11-dekabr sanasida tumanimizdagi 55-sonli umumtaʼlim maktabida oʻtkazilgan sayyor qabulda Qoraqalpogʻiston Respublikasi Xalq taʼlimi vazirligi huzuridagi oʻquv-metodika Markazi direktori oʻrinbosari Aybek Davletboyev, tuman Xalq taʼlimi boʻlimi mudiri  Rahmatilla Matqurbonov, Xalq taʼlimi boʻlimi bosh huquq-maslahatchisi Nilufar Jumaniyozova, tuman Aholi bandligiga koʻmaklashish markazi mehnat noziri Bahodir Kazakov hamda shoʻʼba rahbarlari ishtirok etdilar.

Sayyor qabul jarayonida tumanimizning turli hududlaridagi umumtaʼlim maktablari oʻqituvchilari oʻzlari mehnat qilayotgan taʼlim muassasalari faoliyatiga doir muammolar, yuzasidan murojaat qildilar. Xususan, Ergash Niyatboyev tumandagi 65-sonli umumtaʼlim maktabida sinfxonalari yetishmasligi, shu bilan birga maktab binosi taʼmirtalab ahvoldaligi, sport zali yoʻqligi uchun qish oylarida jismoniy tarbiya fanini oʻtishda qiyinchiliklar yuzaga  kelishi, maktab uchun qoʻshimcha bino va sport zali qurish zarurligi haqida oʻz taklifini bildirdi.

Shuningdek, 78-sonli maktabdan Farhod Avezov, 27-sonli maktabdan Shuhrat Saparboyevlar ham taʼlim-tarbiya jarayonini rivojlantirishga toʻsqinlik qilayotgan muammolar yuzasidan oʻz takliflarini oʻrtaga tashladilar.

Tumanimizdagi 14-sonli umumtaʼlim maktabi binosi 1970-yilda qurilgan boʻlib, ayni paytda maktabning mikrohududi ancha  kengayib, oʻquvchilar soni keskin oshgan. Natijada mazkur maktab bugungi talablar darajasiga javob bermaydi. Sinfxonalar yetishmaydi, sport zali, oshxona, kimyo, fizika fanlari xonalari va laboratoriya uchun qoʻshimcha bino zarur. Bu haqdagi Yesenboy Yeshimbetovning murojaati masʼullari eʼtiboriga havola etildi.

Sayyor qabul ishtirokchilaridan 55-sonli maktabning tarix fani oʻqituvchisi Bahodir Pirniyazov Oʻzbekiston va Qoraqalpogʻiston tarixi, dunyo dinlari tarixi fanlari boʻyicha dars yuklamalarini yarim soatdan 1 soatga yetkazish, Bahodir Oʻtaboyev  geografiya fani boʻyicha fanlar olimpiadasini 10-11-sinf oʻquvchilari oʻrtasida ham oʻtkazish, Husniddin Saparboyev 28-sonli maktab binosini joriy taʼmirlash boʻyicha takliflarini bildirishdi.

Shuningdek, Xurshida Oʻtamurodova, Ismatulla Qurbonboyev, Fozilbek Ismoilovlarning oʻz kasbiy faoliyatlari boʻyicha shaxsiy murojaatlari ham qabul qilinib, barcha bildirilgan takliflar va murojaatlarga masʼullar tomonidan atroflicha tushuntirishlar hamda tavsiyalar berildi. Shu bilan birga, sayyor qabul jarayonida murojaatlar va takliflar onlayn ravishda tuman Xalq taʼlimi boʻlimining mutaxassisi tomonidan Qoraqalpogʻiston Respublikasi Xalq taʼlimi vazirligining internetdagi manziliga joylashtirib borildi. Kelgusida ushbu taklif va murojaatlar vazirlik masʼullari tomonidan joylarga chiqib oʻrganilishi hamda zarur chora-tadbirlar ishlab chiqilishi qayd etildi.

Boʻlib oʻtgan sayyor qabul taʼlim-tarbiya tizimini zamon talablari darajasida rivojlantirish, sohaga  doir muammolarni tizimli hal etishda muhim ahamiyat kasb etadi.

Robiya YOʻLDOShEVA.