Sohibaning yutugʻi

Mustaqillik yillarida yosh avlodni har jihatdan barkamol qilib tarbiyalash va voyaga yetkazish barchamizning asosiy vazifamizga aylangan. 55-sonli maktabning oʻqituvchilar jamoasi oʻz ustida doimiy ishlashga, zamonaviy pedtexnologiyalarni oʻzlashtirishga va shu asosda oʻquvchilarga bilim berishga astoydil harakat qilmoqdalar. Bu esa oʻzining natijasini bermoqda. Shu bois, oʻquvchilarning fanlarni oʻzlashtirish darajasi ham yuqori. Hozirgi kunda maktabimizda 560ga yaqin oʻquvchi taʼlim olmoqda. Maktabimizning yosh matematika va informatika fani oʻqituvchisi Rustam Rahmatullayev oʻzining tirishqoqligi bilan oʻqituvchilarga oʻrnak boʻlib kelmoqda. Fevral oyida boʻlib oʻtgan informatika-matematika fan oyliklarida oʻquvchilar bir-biriga bukletlar tayyorlashib, bayram sovgʻasi sifatida taqdim qilishdi.

8-9-sinflar oʻrtasida "Yosh matematiklar”, 5-6-sinflar oʻrtasida "Matematika - oʻyinlarda”, "Oʻyinlar-matematikada” mavzusi boʻyicha oʻquvchilar bellashgan edilar.

Maktab va tuman bosqichlarida yuqori natijalarga erishib, Respublika bosqichiga yoʻllanma olgan qizimiz, 8-sinf oʻquvchisi Sohiba Rajabboyeva matematika-informatika fanidan 24-25-mart kuni Nukus shahrida boʻlib oʻtgan "Bilimlar bellashuvi" Respublika bosqichida ham 1-oʻrinni egalladi.

Maktab direktori D.Arikov, oʻquv ishlari boʻyicha direktor oʻrinbosari D.Oʻrozboyeva, maʼnaviyat ishlari boʻyicha direktor oʻrinbosari D.Oʻrozboyev va sinf rahbari Sh.Berdiboyevalar Sohibani va uning ustozi Rustam Rahmatullayevni sovgʻa-salomlar bilan kutib oldilar.

Sohibaning yutugʻidan maktabimizning barcha oʻquvchilari ibrat olib, aʼlochi va dono, bilimdon boʻlgan bu qizdan har tomonlama oʻrnak olishga intilishmoqda. Sohiba Rajabboyevaning oʻzi esa shu kunlarda matematika-informatika fanini puxta oʻzlashtirish maqsadida ustozi R.Rahmatulleva bilan izlanishlar olib bormoqda.

- Maqsadim – informatika fanini puxta oʻrganish, Oʻzbekiston miqyosidagi bilimlar bellashuvida gʻolib boʻlish, - deydi Sohiba.

Maktabimizda informatika va matematika fanlariga qiziquvchi oʻquvchilar koʻpchilikni tashkil etadi. Informatika fani oʻqituvchisi Rustam Rahmatullayev har bir darsni innovatsion texnologiyalar asosida, qiziqarli savol-javoblar hamda amaliy va nazariy mashgʻulotlarning uzviyligi asosida olib boradi. Oʻquvchilarning yuqori natijalarga erishishining yana bir sababi, maktabda turli fan toʻgaraklarining hamda bilimlar boʻyicha har xil tanlovlarning oʻz vaqtida va toʻgʻri tashkil etilganligidir. Shu kunlarda maktabimizda "Mohir qoʻllar”, "Zulfiyaxonim izdoshlari”, "Yosh kimyogarlar”, "Ingliz tilini oʻrganamiz” kabi toʻgaraklar faoliyat koʻrsatmoqda. Jonkuyar oʻqituvchilarimiz tashabbusi bilan "Tarixni bilasizmi?”, "Prezident asarlarini oʻrganamiz”, "Kim chiroyli va bexato yozadi?” tanlovlari ham sinflararo oʻtkazilib kelinmoqda. Oʻquvchilarimiz orasida havaskor ijodkorlar ham bor. Ularning ijodiy mashqlari adabiyot oʻqituvchilari tomonidan tahlil qilib boriladi.

Zuhra AHMEDOVA,

shu maktabning kutubxona mudirasi.