IXChAM, KULAY, KOʻRKAM UY-JOYLAR yurtimiz chiroyiga-chiroy qoʻshmoqda

Bugungi kunda mamlakatimizning barcha hududlarida yangidan qurilgan, biri-biridan koʻrkam uy-joylarni koʻrib, xalqimiz turmushi tobora farovonlashib borayotganiga guvoh boʻlasiz. Amalga oshirilayotgan jami bunyodkorliklar, obodonchiliklar xalqimizning ezgulikka, yaratuvchanlikka intilishini, mamlakatimizdagi barqaror tinchlik, osoyishtalik bu harakatlarga zamin boʻlayotganini anglash qiyin emas.

Ayniqsa, mamlakatimiz Prezidentining 2009-yil 3-avgustdagi "Qishloq joylarda uy-joy qurilishi koʻlamini kengaytirishga oid qoʻshimcha chora-tadbirlar toʻgʻrisida”gi Qaroriga muvofiq namunaviy loyiha asosida qurilib, foydalanishga topshirilgan 217 ta ixcham, koʻrkam va barcha qulayliklarga ega uy-joylar tumanimiz koʻrkiga-koʻrk qoʻshib turibdi.

Namunaviy loyiha asosida uy-joylar qurilishi boshlangan dastlabki 2010-yilda tumanimizda 60 ta hovli qurilib, foydalanishga topshirilgan boʻlsa, qishloq aholisining uy-joyga, ayniqsa, namunaviy loyiha asosida qurilayotgan uylarga talabining koʻpligi inobatga olingan holda 2011-yilda "Taqirqalʼa” aholi punktida 25 ta, Qilichboy ovulining "Olmazor” mahallasida 17 ta, "Toʻlqin” ovulining "Bagʻanali” aholi punktida 8 ta, tuman boʻyicha jami 50 ta turar joylar qurilib, foydalanishga topshirildi. 2012-yilda 37 ta, 2013-yilda esa 70 ta har biri 12 sotix yer maydoniga ega bir necha xil hajmdagi uylar qurildi.

Namunaviy loyihalar asosida qurilayotgan uy-joylarga talab katta ekanligi inobatga olingan holda joriy yilda tumanimizning "Taqirqalʼa”, "Olmazor”, "Vaxum” aholi punktlarida 70 ta uy-joylar barpo etish rejalashtirilib, yil boshidanoq qurilishi boshlab yuborildi. Jami 10879,2 mln. soʻmlik qurilish ishlarining yilning 1-may holatiga 5428,6 mln. soʻmlik hajmi bajarildi.

Jumladan, yer ishlari 100 foiz, fundament ishlari 100 foiz, gʻisht terish ishlari 70 foiz, elektr montaj ishlari 38,6 foiz, tom yopish ishlari 34,3 foiz, ichki suvoq ishlari 34,3 foiz, ihota devorlari fundamenti ishlari 68,7 foiz va boshqada ishlar bajarildi. Qisqa qilib aytganda rejadagi ish hajmining 50 foizdan ortigʻi ado etildi. Bu raqamlar 1-sentyabrga qadar tumanimizda 70 ta oila barcha qulayliklar yaratilgan chiroyli va obod hovlilarga ega boʻlishidan dalolat beradi.

Mazkur uy-joylarning tashqi muhandislik tarmoqlari boʻyicha 136.0 mln. soʻmlik, jami uzunligi 2,219 km. suv tarmogʻi qurilishi ishlari, 278 km. gaz tarmogʻi qurilishi ishlari amalga oshiriladi.

Shuningdek, 1,382 km. uzunlikda elektr tarmoqlari, 2,415 km. masofada yoʻl qurilishi rejalashtirilgan boʻlib, bu yoʻnalishlar boʻyicha ham ishlar olib borilayapti.

Shunisi eʼtiborliki, barpo etilayotgan yangi aholi punktlarida bolalar maydonchalari ham oʻrin olgan. Shuningdek, mahalla guzari, madaniy-maishiy obʼektlar qurish ham rejalashtirilgan. Masalan, "Taqirqalʼa” mavzesida 76-umumtaʼlim maktabi, "Olmazor” qishloq vrachlik punkti qurilib, foydalanishga topshirildi. Qisqa qilib aytganda, namunaviy loyiha asosida qurilib, foydalanishga topshirilayotgan uy-joylarga ixcham, koʻrkam, barcha qulayliklarga ega boʻlgani uchun ham talab ortmoqda. 2015-yil uchun ham yangidan quriladigan "Choykoʻl” ovulining "Bosuv” mahallasida 42 ta, A.Temur nomli ovulning "Taqirqalʼa” aholi punktida 15 ta, "Oʻrta qalʼa” ovulining "Vaxum” aholi punktida 25 ta, jami 80 ta uy-joy uchun talabgorlar roʻyxati shakllantirilmoqda. Hozirgi kunda 30 nafardan ortiq fuqaro roʻyxatga olingan. 80 ta uy-joy oluvchilar shakllantirilgandan keyin sentyabr oyidan keyingi yil uchun uy-joy qurilishi boshlab yuboriladi. Bu hovli-joylarni qurish uchun uzoq muddatli imtiyozli kredit ajratilayotgani aholiga yana bir qulaylikdir. Shuningdek, toʻlov shakli xohlagan turda amalga oshiriladi, kredit rasmiylashtirilganidan keyin 6 oy davomida faqat kredit foizi toʻlanadi, Soliq Kodeksining "Jismoniy shaxslarning soliq solinmaydigan daromadlari toʻgʻrisida”gi 179-moddasi 30-bandiga asosan uy egasi va uning yordamchi toʻlovchisining daromadlari yakka tartibda uy-joyni qurish va sotib olish uchun olingan ipoteka kreditlarini hamda ular boʻyicha hisoblangan foizlarni qoplash uchun yoʻnaltirilganida daromad soligʻidan ozod qilinadigan imtiyozlar ham mavjud.

Bu esa xalqimiz turmushi obodligiga xizmat qiladi.

Oygul RAJABOVA.

M.ShOMURODOV olgan surat.