Ovullar obod boʻlmoqda

Inson zoti borki, xushmanzara, obod elda, koʻrkam hovlilarda farovon yashagisi keladi. Mustaqilligimiz sharofati bilan oʻzligimizga qaytganimiz buningdek orzu-intilishlarimizni yanada boyitmoqda.

"Eng namunali oila”, "Eng yaxshi koʻchaboshchisi”, "Eng ozoda xonadon”, "Engnamunali ovul fuqarolar yigʻini” kabi koʻrik-tanlovlarning muntazam oʻtkazilib kelinayotgani ham sarajanjom-sarishtalikka, farovonlikka intilib yashayotgan kishilarning hayotini ommaga targʻib etish, bu boradagi muvaffaqiyatlarni ragʻbatlantirish va pirovardida buningdek ezgu amallarning ommalashuviga, turmushimiz madaniyatining yuksalishiga erishishdir. Fuqarolar yigʻinlari vakillari bilan bugungi suhbatimiz mavzusi shu haqda:

Murodboy Soburov, Bobur nomli ovul fuqarolar yigʻini raisi: - Ozodalik, orastalik bizning xalqimizning milliy qadriyatlaridandir. Chunki xonadoni, koʻchasi orasta, shinam kishining koʻngli toza boʻladi. U yerda dunyoga kelgan avlod ham buningdek ezgu sifatlarni qadrlab ulgʻayadi. Avvalo har bir kishi hovlisini ixcham, qulay qurishi, sanitariya-gigiyena qoidalariga amal qilib yashashi, atrofiga mevali, manzarali daraxtlar, gullar ekib xushmanzara, koʻrkam makonga aylantirishi oila aʼzolarining sogʻlom, bardam boʻlishini taʼminlashi xususida yigʻin masʼul xodimlari va hamkor tashkilotlar bilan yetarlicha targʻibot ishlarini olib borayapmiz. Hududimizdagi 685 ta xonadonlarning barchasida "Xonadonlarni oʻrganish daftari” yuritilmoqda va aniqlangan muammo va kamchiliklar tezda bartaraf etilmoqda. Joriy yil koʻklamida keng miqyosda koʻkalamzorlashtirish va obodonlashtirish ishlari olib borildi.

Xalqimiz turmush farovonligiga erishish maqsadida tomorqa yerlardan unumli foydalanishiga, ularning yerlaridan yuqori hosil olishi uchun qulay sharoitlar yaratishga harakat qilayapmiz.

Shuningdek, hududimiz aholisining ish bilan bandligiga erishish, yangi ish oʻrinlarini yaratishga alohida eʼtibor berilayapti. Shu yilning oʻzida 5 nafar kishiga tadbirkorlik faoliyatini boshlash uchun yer maydoni ajratildi. 3 kishiga imtiyozli kredit olish uchun tavsiyanoma berildi. "Faol mehnat” xususiy korxonasi koʻptarmoqli masʼuliyati cheklangan jamiyatiga aylantirildi, aholiga transport xizmati koʻrsatuvchi masʼuliyati cheklangan jamiyati tashkil etildi.

Amalga oshirilayotgan ishlarimiz hududimiz aholisi turmushining farovonlashuviga muhim zamin yaratmoqda.

Bogʻdagul Shukurullayeva, "Oq oltin” ovul fuqarolar yigʻini diniy maʼrifat va maʼnaviy axloqiy tarbiya masalalari boʻyicha maslahatchisi: – Yigʻinimiz qoshida tashkil etilgan "Salomatlik” sektori aʼzolari bilan hududimiz aholisining tibbiy madaniyatini oshirish borasida keng tushuntirish-targʻibot ishlarini olib borayapmiz. Chunki amalga oshirilayotgan jamiki ezgu ishlarimiz xalqimizning sogʻ-salomat, baxtiyor yashashi uchundir.

Shunisi quvonchliki, bugungi kunda aholining oʻzi har bir qarich yerdan unumli foydalanishga, chor-atrofni obodonlashtirib, koʻkalamzor bogʻlar barpo etishga intilmoqda, yerdan samarali foydalanish oila maʼmurchiligini taʼminlashini dildan his qilmoqda. Shu boisdan-da joriy yil koʻklamida ovulimizda keng miqyosda obodonlashtirish, koʻkalamzorlashtirish ishlari amalga oshirildi, yangi mevali, manzarali daraxtlar, gullar koʻchatlari oʻtqazildi. Mavjud daraxtlarga shakl berilib, ohaklandi.

Ovulimizda mavjud 5 ta maktabda sogʻlom turmush tarziga amal qilishning ahamiyati, tibbiy madaniyatga oid davra suhbatlari oʻtkazib turibmiz. Bunda bizga tibbiyot xodimlari, oʻqituvchilar yaqindan yordam berishayapti.

Shuningdek, xonadonlarni oʻrganish jarayonida ozodalikka, gigiyena qoidalariga rioya qilishga doir bergan tavsiyalarimiz ham yaxshi natija berayapti.

Aholimiz orasida farovonlikka intilish, tadbirkorlikning rivojlanayotgani bizni juda quvontiradi. Joriy yilning oʻzida ovulimizda "Mohinur” oilaviy tikuvchilik korxonasi, aholiga mineral oʻgʻitsotish shoxobchasi, avtomobillarga texnik xizmat koʻrsatish shoxobchasi, toʻyxona, maishiy xizmat koʻrsatish majmuasi, oziq-ovqat doʻkoni ishga tushirildi va koʻplab ovulyoshlari doimiy ishbilan band boʻlishdi.

Xullas, bugungi kunda ovulimiz kundan-kunga obod boʻlib bormoqda.

Suhbatdosh: Oygul RAJABOVA.