KASABA UYuShMASIDA HISOBOT-SAYLOV KONFERENTsIYaSI BOʻLIB OʻTDI

3-iyul kuni tuman hokimligining majlislar zalida Oʻzbekiston davlat muassasalari va jamoat xizmati xodimlari kasaba uyushmasi Amudaryo tuman Kengashining hisobot - saylov konferentsiyasi boʻlib oʻtdi.

Konferentsiyada Oʻzbekiston davlat muassasalari va jamoat xizmati xodimlari kasaba uyushmasi Markaziy Kengashining Qoraqalpogʻiston Respublikasi boʻyicha masʼul tashkilotchisi Raxmon Madreimov, kasaba uyushmasining Nukus shahar Kengashi raisi Muslima Atamuratova hamda tumandagi boshlangʻich tashkilotlardan saylangan delegatlar, Xalq deputatlari tuman Kengashi deputatlari hamda ommaviy axborot vositalari vakillari ishtirok etdilar. Konferentsiya ishini tuman hokimligi tashkiliy-nazorat guruhi rahbari Gʻulomjon Duysenboyev ochdi hamda olib bordi.

Konferentsiya kun tartibida qator masalalar yuzasidan tegishli mutasaddilarning hisobotlari tinglanib, muhokama qilindi. Xususan, kun tartibidagi Oʻzbekiston davlat muassasalari va jamoat xizmati xodimlari kasaba uyushmasi Amudaryo tuman Kengashining 2015-yil maydan 2020-yil iyulgacha boʻlgan davr mobaynidagi faoliyati yakunlari toʻgʻrisidagi masala yuzasidan tashkilotning tuman Kengashi raisi Azat Almuratovning hisoboti tinglandi.

Hisobotda taʼkidlanganidek, shu davr oraligʻida tumanda bandlik, mehnat munosabatlari, mehnatga haq toʻlash, adolatli mehnat sharoitlarini yaratish, mehnatni muhofaza qilish va ijtimoiy kafolatlarga rioya qilish masalalarida xodimlarning yakka va jamoaviy ijtimoiy-mehnat huquqlarini ifoda etish va himoya qilish borasida bir qancha ijobiy ishlar amalga oshirilgan. Kasaba uyushmasi tumanda aholi turmush darajasini oshirish, iqtisodiyotni yanada yuksaltirish, fuqarolik jamiyatini shakllantirish sohasida amalga oshirilgan keng koʻlamli oʻzgarishlarning amalga oshishiga oʻz hissasini qoʻshib kelmoqda.

Maʼlumki, joriy yilning mart oyidan “Kasaba uyushmalari toʻgʻrisida”gi qonun bilan kasaba uyushmalariga xodimlarning mehnat huquqini himoya qilish va ish beruvchilar tomonidan mehnat qonunchiligiga rioya etilishi ustidan jamoatchilik nazoratini amalga oshirish huquqiga ega boʻlgan mehnat inspektsiyalarini tuzish huquqi berildi. Shu bilan birga kasaba uyushmalari davlat hokimiyati va boshqaruvi organlaridan mustaqilligi, ular oldida hisobdor emasligi mustahkamlab qoʻyildi.

Konferentsiya kun tartibidagi Oʻzbekiston davlat muassasalari va jamoat xizmati xodimlari kasaba uyushmasi Amudaryo tuman Kengashi tarkibini hamda Kengash raisini saylash toʻgʻrisidagi, taftish komissiyasi tarkibini hamda komissiya raisini saylash toʻgʻrisidagi, qolaversa, Oʻzbekiston davlat muassasalari va jamoat xizmati xodimlari kasaba uyushmasi Qoraqalpogʻiston Respublikasi raislar Kengashi konferentsiyasiga delegat saylash toʻgʻrisidagi masalalar muhokama qilinib, tegishli qarorlar qabul qilindi.

Konferentsiya qaroriga muvofiq Oʻzbekiston davlat muassasalari va jamoat xizmati xodimlari kasaba uyushmasi Amudaryo tuman Kengashi raisi lavozimiga mazkur lavozimda shu paytgacha ishlab kelayotgan Almuratov Azat Nazarimbetovich saylandi.

Chindan ham, bugungi kunda mamlakatimizda kasaba uyushmalari faoliyatini yanada takomillashtirish borasida keng koʻlamli islohotlar amalga oshirilmoqda. Tizimda imtiyozli yoʻllanmalar olish davriyligi 5-yilda bir martadan 2-yilda bir martaga qisqartirilganligi, xodimlar tomonidan yoʻllanma uchun toʻlanadigan qisman qiymat miqdori 50 foizdan 45 foizga tushirilganligi, sanatoriylarga yaqin qarindoshlari uchun ham yoʻllanmalar olish kabi imtiyoz joriy etilganligi ham fikrimizning dalilidir.

Kun tartibida muhokama etilgan masalalar xususida konferentsiya ishtirokchilari oʻzlarining fikr-mulohazalarini bildirdilar hamda mutasaddilarga oʻzlarini qiziqtirgan savollar bilan murojaat qildilar.

Tuman hokimligining Axborot xizmati.