XALQQA KOʻMAKChI BOʻLAYoTGAN FAOL DEPUTAT

Elimizdagi taniqli shifokor, “IFTIXOR DENT” xususiy klinikasi rahbari Adilboy Yusupov 2014-yilda boʻlib oʻtgan saylovlarda 25-Toʻlqin saylov okrugidan, 2019-yil dekabr oyida boʻlib oʻtgan saylovlarda esa 28-Daryo boʻyi saylov okrugidan Xalq deputatlari tuman Kengashi deputatligiga saylanganidan soʻng, xayrli ishlarni yanada koʻproq amalga oshirib, aholining dard-u tashvishini, muammolarini hal etishga koʻmaklasha boshladi.
Darhaqiqat, har bir deputat faoliyatining asosiy yoʻnalishi saylovchilar bilan ishlashish hamda odamlarning turmush tarzi yaxshilanishiga, mavjud kamchiliklarni bartaraf etishda yordam koʻrsatishdir. Adilboy Yusupov ham shu maqsadda oʻzining deputatlik vakolati doirasida shaxsiy ish rejasini ishlab chiqib, mazkur ish rejaning bandlarida belgilangan vazifalarni toʻliq bajarmoqda.   Faol deputat  partiyaning “Uyma-uy” loyihasi doirasida olib borayotgan amaliy saʼyi-harakatlari natijasida aholining ijtimoiy himoyaga muhtoj, kam taʼminlangan oila vakillaridan jami 25 nafariga oʻzining homiylik yordamlarini koʻrsatdi.
Koronavirus pandemiyasi sababli joriy etilgan karantin davrida Adilboy Yusupov oʻz saylov okrugidagi ijtimoiy himoyaga muhtoj 30 ta xonadonga homiylik qilib, tibbiy niqoblar va oziq-ovqat mahsulotlarini tarqatdi. Shuningdek, tumanda yashovchi 5 ta kam taʼminlangan oilani otaliqqa olib, oʻtgan davr mobaynida ularni 2,5 mln. soʻmlik 10 xil turdagi oziq-ovqat mahsulotlari bilan taʼminladi. Bu oilalarga yana 2 oy davomida uzluksiz homiylik yordamlari bilan koʻmak berishni oʻz zimmasiga olgan deputat muntazam ravishda ularning holidan xabar olmoqda va karantindan qiyinchiliksiz oʻtib olishlariga yordamlashmoqda.

Oʻtgan davr mobaynida Adilboy Yusupov saylovchilar bilan oʻtkazilgan uchrashuvlar davomida aholi tomonidan bildirilgan taklif va istaklari asosida oʻrganishlar olib bordi. Oʻz joyida tegishli masʼul tashkilotlar rahbarlari koʻmagida ijrosini  taʼminlash choralarini koʻrib,  mavjud muammolarni tegishli tashkilotlarga 3 ta deputatlik soʻrovi orqali murojaat etdi va hal qilinishga koʻmaklashdi. Shuningdek, qonun va hukumat qarorlarining joylardagi ijrosi boʻyicha deputatlik nazoratini amalga oshirish hamda mavjud muammolar, yaʼni kommunal masalalarda, tabiiy gaz, toza ichimlik suvi, yoʻl qurilishi, asfalt yotqizish, maktab, bogʻcha va aholi yashash joylarini obodonlashtirish hamda boshqa masalalarning hal etilib, aholining turmush tarzi farovonlashishiga munosib hissa qoʻshishga harakat qildi.
U oʻz saylov okrugidagi fuqarolarning murojaatlarni koʻrib chiqishda, hududning rivojlanishiga toʻsqinlik qilayotgan muammolarni bartaraf qilishda, fuqarolarning buzilgan huquq va qonuniy manfaatlarini tiklashda deputatlik nazoratidan keng foydalanib, amaliy natijalarga erishib kelmoqda. Shuningdek, u Xalq deputatlari tuman Kengashining mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari boʻyicha doimiy komissiyasi aʼzosi sifatida doimiy komissiya majlislarida, tuman kengashi sessiyalarida koʻrilayotgan masalalar yuzasidan oʻzining fikr-mulohazalari bilan faol ishtirok etib, ularning yechimi topilishiga oʻz hissasini qoʻshib kelmoqda.

Koʻp yillar davomida tuman stomatologiya poliklinikasida shifokor boʻlgan Adilboy Yusupov ayni paytda oʻzi rahbarlik qilayotgan “IFTIXOR DENT” klinkasini yanada kengaytirib, yangi ish oʻrinlarini yaratdi. Zamonaviy stomatologik jihozlar va tibbiy texnikalar keltirib, xizmat koʻrsatish sifatini yaxshiladi.  U sohani rivojlantirish, tuman tibbiyotiga yangiliklarni tatbiq etish maqsadida qator chet davlatlarda boʻlib, malakasini oshirishga ham alohida eʼtibor qaratdi. Ayni paytda 12 nafar tibbiyot xodimi ish bilan band qilingan klinikada 8 ta zamonaviy stomatologik apparatura mavjud. U yerda koʻrsatilayotgan tibbiy xizmatdan foydalanayotgan tumanimiz aholisi juda mamnun.
Malakali shifokor, ishbilarmon tadbirkor va faol deputatning xizmatlari davlatimiz tomonidan munosib baholandi. U 2016-yilda mustaqilligimizning 25 yilligi munosabati bilan koʻkrak nishon hamda 2018-yilda Xalq deputatlari tuman Kengashining “Xalqparvar deputat” sertifikati bilan taqdirlandi.

Elini chin dildan sevgan insonni xalq ham hurmat qiladi. Bunday fidoyilar har ovulda, har mahallada topiladi. Yurtning yanada farovon boʻlishida, aholining turmush tarzi yaxshilanishida ana shunday faol deputatlarning ham munosib hissalari bor.

 Ozoda XUDOYBERGANOVA.