Xalqaro bolalarni himoya qilish kuni munosabati bilan bolajonlarga bayram sovgʻalari ulashildi

Yurtimizda 1-iyun Xalqaro bolalarni himoya qilish kuni har yili keng nishonlanib kelinadi. Bugungi kunda bolalarni himoya qilish, ularni milliy va umuminsoniy qadriyatlar ruhida tarbiyalash masalasi davlat siyosati darajasiga koʻtarilgan. Farzandlarimizni har tomonlama sogʻlom, baxtiyor oʻsib-ulgʻayishlari uchun barcha imkoniyatlar yaratilgan. Ularning kelgusida komil inson boʻlib yetishishlari uchun sifatli taʼlim-tarbiya olishlariga katta eʼtibor qaratilmoqda.

Har yili ushbu bayram kunlari arafasida ertamiz kelajagi boʻlgan bolajonlarimiz uchun istirohat bogʻlari, xiyobonlarda, bolalar maydonchalarida turli xil bayram tantanalari tashkil qilinib, ularga sovgʻalar ulashiladi. Bayramni karantin sababli har safargidek nishonlash imkoni boʻlmadi. Shunday boʻlsa-da, tumanimizning saxovatli tadbirkorlari 1-iyun Xalqaro bolalarni himoya qilish kunida jajji farzandlarimizni tabriklab, sovgʻalar bilan xursand qilishdi.

Xususan, tumanimizda bugungi kunda samarali faoliyat olib borayotgan “Mangʻit-milk” oilaviy korxonasi, tuman Mahalla va oilani qoʻllab-quvvatlash boʻlimi hamda “Yoshlar – kelajagimiz” jamgʻarmasi tuman boʻlimi birgalikda Xalqaro bolalarni himoya qilish kuni munosabati bilan tumandagi kam taʼminlangan ehtiyojmand oilalar farzandlariga bayram sovgʻalari ulashdilar. Mutasaddilar tumandagi 13 ta mahallalarning har birida toʻrttadan ehtiyojmand oila farzandlariga sovgʻa qutilariga qadoqlangan sut mahsulotlarini tarqatdilar. “Mangʻit-milk” oilaviy korxonasi tomonidan ishlab chiqarilayotgan turli xildagi sut mahsulotlari bolajonlar uchun haqiqiy bayram sovgʻasi boʻldi.

Taʼkidlash kerakki, bugungi kunda tumanimizda tadbirkorlik faoliyatiga qaratilayotgan eʼtibor, tadbirkorlik bilan shugʻullanish uchun yaratilayotgan imkoniyat va shart-sharoitlardan oqilona foydalanib, oʻzining yangi loyihalari bilan tadbirkorlik faoliyatini olib borayotgan yoshlarimiz talaygina. 2018-yilda shunday tashabbuskor yoshlarimizdan Nazokat Ollaberganovaning yangi tadbirkorlik loyihasi uchun “Yoshlar – kelajagimiz” jamgʻarmasi tuman boʻlimi tomonidan 200 mln. kredit mablagʻi ajratilib, sut mahsulotlatlarini ishlab chiqarishga ixtisoslashgan “Mangʻit-milk” oilaviy korxonasi tashkil qilindi. Oilaviy korxona tomonidan 10 ta yangi ish oʻrni yaratilib, yoshlar bandligi taʼminlandi.

Tumandagi kichik sanoat zonasida tashkil qilingan “Mang’it-milk” sutni qayta ishlash korxonasida hozir 8 turdagi mahsulotlar ishlab chiqarilmoqda. Oilaviy korxona yangi zamonaviy uskunalar bilan jihozlangan boʻlib, bir smenada 1 tonna sutni qayta ishlash quvvatiga ega. Tuman ichki bozorini, shuningdek, shartnoma asosida tumandagi MTTlarni pasterlangan sut, kefir, smetana, qaymoq, tvorog, ayron, yogurt, suzma, chakki, qatiq mahsulotlari bilan taʼminlaydi. Korxona sutni asosan aholidan qabul qiladi hamda qayta ishlaydi. Shuningdek, “Mang’it-milk” oilaviy korxonasida kelgusida konditer mahsulotlari va muzqaymoq mahsulotlarini ishlab chiqarish yoʻlga qoʻyilib, yana 15 nafar yoshlarni ish bilan taʼminlash rejalashtirilmoqda.

Bayram kunlarida oilaviy korxona tomonidan amalga oshirilgan xayr-saxovatdan nafaqat bolajonlar, balki ota-onalar ham juda xursand boʻldi. Ular mutasaddilarga oʻzlarining samimiy minnatdorchiliklarini bildirdilar.

Aytish joizki, bugungi kunda oʻsib kelayotgan yosh avlodni himoya qilish zamirida hayotni, uning davomiyligini asrab-avaylash mohiyati yotadi. Kelajak avlodning maʼnaviy barkamol avlod boʻlib shakllanishidagi har qanday gʻamxoʻrlik esa yurt ravnaqi uchun qoʻyilayotgan mustahkam poydevor demakdir.

Bugun ertamiz egalariga koʻrsatilayotgan eʼtibor kelajakda ularning Vataniga sadoqatli, jismonan va maʼnan barkamol boʻlib yetishishida muhim omil hisoblanadi.

Charos Arslonova, tuman hokimligining Axborot xizmati.