TUMANIMIZ MAKTABLARIDA OʻQUV YILI YaKUNLANMOQDA, YaKUNIY DAVLAT IMTIHONLARI OʻTKAZILMAYDI

Butun Respublikamizda kabi tumanimiz umumtaʼlim maktablarida ham 2019-2020 oʻquv yilida aprel-may oylarida oʻquvchilar oʻz uylarida turib, teledarslar orqali oʻqishini yakunlashmoqda. Oʻquvchilarning teledarslar boʻyicha olgan bilimlari fan oʻqituvchilari tomonidan internet tarmogʻi, ijtimoiy tarmoqlar, telefon orqali baholab borildi. Maktab taʼlimi jarayoniga internet tarmogʻining kirib kelishi yana ham tezlashdi.
Joriy yilning may oyidan boshlab tumandagi 40-sonli umumtaʼlim maktabi oʻquvchilar davomatini va bilimini elektron qayd qilish tizimi, kundalik.kom dasturida ishlay boshladi. Bunda barcha fan oʻqituvchilari, oʻquvchilar va ota-onalarga kundalik.kom tizimida maxsus login parollar orqali darslar, uy vazifalari, oʻquvchilar javoblarini baholash, kuzatish va nazorat qilish imkoni paydo boʻldi. Yangi 2020-2021 oʻquv yilidan boshlab 40-sonli umumtaʼlim maktabida darslar jadvali, davomat, baholash, jurnal yuritish ishlari toʻliq tarzda elektron tizimga oʻtadi.
Tuman Xalq taʼlimi tizimidagi umumtaʼlim maktablarini 2020-yilda 3157 nafar 11-sinf bitiruvchilari tamomlaydi. 9-sinflarni esa 3016 nafar oʻquvchi tugatmoqda.
Yakuniy davlat imtihonlari oʻtkazilmagan holda ham 2019-2021-yildagi 1-, 2-, 3-chorak baholari asosida oʻquvchilar sinfdan-sinfga koʻchirilib, bitiruvchilarga attestat (shahodatnoma) beriladi. Hozirgi vaziyatdan kelib chiqib, 2019-2020 oʻquv yilidagi umumiy oʻrta taʼlim muassasalari bitiruvchilariga davlat namunasidagi attestat (shahodatnoma)larni elektron shaklda (skaner) bitiruvchilarga yetkaziladi.
Attestat (shahodatnoma) blankalari respublikamizda karantin muddati tugagunga qadar taʼlim muassasalarida saqlanadi. Karantin davri yakunlanganidan soʻng ular oʻz egalariga topshiriladi.
Umumtaʼlim maktablari 11-sinf bitiruvchilari oliy taʼlim muassasalariga abitur.dtm.uz sayti orqali hujjatlarni qoʻl  telefon orqali topshirish repetitsiyasi olib borilmoqda. Bunda oʻquvchilar uyida turib qoʻl telefoni orqali hujjat topshirish imkoniga ega.
Mamlakatimizda koronavirus infektsiyasi tarqalishining oldini olish va jilovlash maqsadida joriy  qilingan karantin tartib-qoidalariga koʻra umumtaʼlim maktablari oʻquvchilari maktabga bormasdan masofadan turib oʻqitilgani – bu taʼlim-tarbiya susayishiga olib kelmaydi, aksincha, oʻquvchi yoshlar zamonaviy axborot kommunikatsion texnologiyalarni puxta egalladilar, ulardan foydalanish koʻnikmasiga ega boʻldilar.
Bu sinovli kunlar ham oʻtib ketadi. Yangi 2020-2021 oʻquv yilini oʻquvchilar jonajon maktablarida, doʻstlari bilan oʻz sinflarida davom ettirishiga umid qilib qolamiz.

Rahmatilla MATQURBONOV, tuman Xalq taʼlimi boʻlimi mudiri oʻrinbosari.