MEHNAT FRONTI FAXRIYLARI – YuRTIMIZ FAYZI

Tinchliksevar oʻzbek xalqi 1941-1945-yillar oraligʻida davom etgan Ikkinchi jahon urushida fashizm ustidan qozonilgan Gʻalabaga munosib hissa qoʻshdi. Ularning koʻrsatgan fidoyiliklari, jasorati va mardligi biz uchun hamisha ibrat maktabidir. Shu boisdan ham Ikkinchi jahon urushida qozonilgan Gʻalaba rasman eʼlon qilingan, nemis bosqinchilar tor-mor etilgan kun – 9-may sanasi yurtimizda Xotira va qadrlash kuni sifatida keng miqyosda bayram qilinadi.

Mazkur urushda tumanimizning ham alp oʻgʻlonlari yurt tinchligi, ozodligi yoʻlida jon olib-jon berib, dushmanga qarshi kurashganlar. Necha minglab odamlar front orqasida frontdagilarni oziq-ovqat, kiyim-kechak, qurol-yarogʻ bilan taʼminlab turish uchun fidokorona mehnat qilib, gʻalabaga munosib hissa qoʻshdilar.

Hozir tumanimizda urush yillarida front orqasida mehnat qilgan 109 nafar yurt fidoyilari istiqomat qilishadi.

Ikkinchi jahon urushida qozonilgan Gʻalabaga 75-yil toʻlishini ular barcha yurtdoshlarimiz qatori munosib qarshi olayaptilar, yosh avlodning ota-bobolari jasoratiga munosib, bugungi tinch-osoyishta hayotni asrashga qodir boʻlib voyaga yetishiga munosib hissa qoʻshmoqdalar.

Mehnat fronti faxriylari yurtdoshlarimiz va davlatimizning hurmat-eʼtiborida, ardogʻidadir. Ularning sogʻliqlari muntazam nazorat qilinib, zarur hollarda tibbiy yordam koʻrsatilayotir. Shuningdek yoshga doir pensiyalariga har oyda qoʻshimcha kompensatsiya puli qoʻshib berilmoqda. Yiliga bir marta sogʻliklarini tiklashlari uchun sihatgohlarga imtiyozli yoʻllanma beriladi. Toshkent shahriga temir yoʻl va aviaqatnovlar chiptalarini olishlari uchun 50 foizlik chegirma mavjud. Front orqasida frontdagi askarlarga togʻday sulyanchiq boʻlib, qurol-yarogʻ ishlab chiqarish korxonalarida, turli zavod-fabrikalarda va qishloq xoʻjaligi sohasida tun-u kun halovat bilmay ishlagan tumanimiz mehnat fronti faxriylarini turli korxona-tashkilotlar otaliqqa olib, doimo holidan xabar olib turadilar. Ularga ovul va mahallalar fuqarolar yigʻinlari masʼullari qutlugʻ sanalarda, bayramlarda yoʻqlab, sovgʻa-salomlar topshiradilar. Duolarini oladilar, zahmatli hayot yoʻli haqidagi  xotiralarini tinglaydilar.

Davr yelkasiga yurt ozodligi uchun kurashishdek masʼuliyatli vazifani yuklagan fidoyilarning barchasi hozir nuroniy yoshda. Bu tabarruk insonlar yurtimiz fayzi, farishtalaridir.

Bugungiday baxtiyor, obod, toʻkin zamonga yetganlariga tinimsiz shukrona aytib, qoʻllari duoda, yurtimizga tinchlik, osoyishtalik tilab oʻtirgan nuroniylarimizni har qancha ardoqlasak, kamlik qiladi.

Ularni Ikkinchi jahon urushida qozonilgan Gʻalabaning 75 yilligi bilan qizgʻin qutlaymiz va bugungiday saodatli, ozod va farovon turmush zavqini surib, uzoq umr koʻrishlarini tilab qolamiz.

Oygul RAJABOVA.

(Foto - qashqadaryogz.uz)