Taʼlim jarayonida zamonaviy texnologiyalarni qoʻllash ijobiy samara beradi.

Mamlakatimizda yosh avlod taʼlim-tabiyasiga qaratilayotgan yuksak eʼtibor va gʻamxoʻrlik tufayli bugun farzandlarimiz zamon talablari asosida, barcha shart-sharoitlar muhayyo qilingan taʼlim maskanlarida bilim olmoqdalar. Tajribali oʻqituvchilar qoʻllayotgan  ilgʻor tajriba va pedagogik texnologiyalar oʻquvchilarning sifatli taʼlim olishiga  sharoit  yaratmoqda.  
Maktab  oʻquvchisini oq  qogʻozga  oʻxshatish mumkin.  Unda nimani  yozsak,  shuni oʻqiymiz, koʻramiz.  Shu sababli oʻqituvchilar oʻquvchilarni  bilimsizlikda  ayblash emas, balki  oʻz  ustida  ishlashlari kerak. Tajribalar  shuni  koʻrsatadiki, oʻquvchisi  bilan  muntazam  shugʻullangan ustozlarning mohirligi  va  salohiyati oʻquvchi   yutugʻida  namoyon boʻladi.
Tizimga  yangi  innovatsiyalar,  ilgʻor metodlar, zamonaviy  axborot-kommunikatsiya  texnologiyalari  kirib  kelgani darslarning yanada mazmunli, qiziqarli  hamda  sifatli  taʼlim  tashkil etilishida  muhim  omil  boʻlmoqda. Hozirda  mamlakatimizda  taʼlim  sifatini  oshirish  maqsadida  ilgʻor  pedagogik va axborot-kommunikatsiya  texnologiyalarini  qoʻllash,  oʻquv jarayonida  multimediya vositalaridan  foydalanish,  yangi elektron darsliklardan  foydalanish oʻqituvchilarning   mahoratini    oshirishga  yordam beradi, oʻquvchilar bilimini mustahkamlaydi.
Noanʼanaviy   usullar  bilan  oʻtilgan  darslar  kuzatilganida   oʻquvchilar  murakkab  mavzularni  ham  aniq  tushunib  boradilar.   Astoydil  bilim  berilsa, maktablarda taʼlim olayotgan oʻquvchilar bir kun kelib, oʻz bilimi, yutuqlari bilan Vatanimiz dovrugʻini olamga yoyadi. Bu  haqiqat mohiyatini chuqur anglagan oʻqituvchilar oʻquvchilarning intellektual rivojlanishiga alohida eʼtibor qaratib ijobiy natijaga erishishi mumkin. Pedagoglar  “Dars – muqaddas”, “Oʻrgan-oʻrgat”, “Yaxshi  muallim – sifatli taʼlim”,  “Sogʻlom muhit – sogʻlom jamoa” singari innovatsiyalarga tayanib faoliyat olib borayotganliklari yuqori samara bermoqda. Dars  jarayonida  video  va  audiomatnlardan foydalanish, tinglab tushunish, oʻqish, soʻzlash, yozish  koʻnikmasini kengroq oʻzlashtirish imkonini beradi.
Davlatimizda oʻqituvchi shaxsining oʻrni salohiyati yuksak, tafakkuri teran, zakovatli yoshlarni tarbiyalayotganida bilinadi. Farzandlarimizni  ertangi kunimizning munosib egalari qilib tarbiyalashda  kasbiy burchimizni esdan chiqarmasak,  davlatimizda  oʻqituvchi  maqomi  darz ketmaydi.

                                               
 G.Yusupova, 62-son maktab oʻqituvchisi.