XALQIMIZ SOGʻLIGI UChUN MEN 400 MING SOʻM STIPENDIYaMNI “MEHR-ShAFQAT VA SALOMATLIK” JAMGʻARMASIGA OʻTKAZDIM
Zamonlar sinovini sindirgan mehr-oqibat va mehr-shafoat tuygʻusi hamon mudroq qalblarni uygʻotib, iroda va kuch-qudrat baxsh etib kelayotgani butun dunyoni qamrab olayotgan koronavirus pandemiyasi davrida yaqqol namoyon boʻlmoqda.
Butun Oʻzbekiston xalqi hukumat atrofida jipslashib, ushbu baloi-ofatga qarshi ham jismonan, ham maʼnan birlashgan holda kurash olib borishmoqda.
Prezidentimiz 26-mart kuni soha vazirliklari va mutasaddi tashkilotlar rahbarlari ishtirokidagi videoselektor yigʻilishida xalqimizga yana bir bor murojaat qildilar, bir maqsad yoʻlida birlashishga kun tartibiga qoʻyilayotgan taʼqiqlarga hamda tartib-qoidalarga rioya qilishga chaqirdilar. Maqsad esa bitta – xalqimizni koronavirus epidemiyasidan asrab-avaylash, virus yuqtirib olishlaridan himoya qilishdir.
Joriy yilning 16-mart sanasidan taʼtilga chiqarilgan oliy taʼlim dargohlari talabalari hamda umumtaʼlim maktablari oʻquvchilari uchun 30-martdan boshlab, maxsus teledasturlar orqali dars-mashgʻulotlari tashkil etilayotgani, “Uyda qoling!” aktsiyasida deyarli butun mamlakatimiz aholisi faollik koʻrsatishayotganidan ayonki, xalqimizning sogʻligi, osoyishtaligi hamma narsadan aziz. Ayniqsa, hamisha xayr-saxovatli xalqimiz himmati tufayli Oʻzbekiston Respublikasi Sogʻliqni saqlash Vazirligi huzuridagi “Mehr-shafqat va salomatlik” jamgʻarmasiga har kuni millionlab mablagʻ yigʻilayotgani esa uygʻoq vijdonlarni yanada saxovatli qildi, mudroq qalblarni esa ogohlikka chorladi, uygʻotdi! Mazkur jamgʻarmaga bir kunda 5 mlrd. soʻm mablagʻ yigʻilganini eshitib, men ham jim qarab tura olmadim. Axir davlat biz yoshlarni oʻqitayotir, barcha shart-sharoitlarni yaratib berayotir. Davlatimiz, xalqimiz boshiga ish tushganida biz – Oʻzbekiston farzandlari nima uchun jim turishimiz kerak?
Men Ajiniyoz nomidagi NDPIning matematika fakulteti 2-bosqichida, davlat granti asosida oʻqiyman. Davlat mening taʼlim olishim, ijtimoiy muhofazam uchun har oyda stipendiya beradi. Nima uchun men davlatimiz gʻamxoʻrligiga munosib ish qilmasligim kerak? Albatta, otalarcha gʻamxoʻrlikka farzandlik burchi va masʼuliyati bilan javob qaytarishni xohladim. Bugun, 27-mart sanasida mart oyi uchun plastik kartamga yoʻnaltirilgan 400 ming soʻm stipendiyamni “Mehr-shafqat va salomatlik” jamgʻarmasi hisobiga oʻtkazdim.
Istagim, xalqimiz tezroq koronavirus pandemiyasi asoratidan ozod, sogʻ-salomat boʻlishsin.
Risolat RAHIMBOYeVA,
NDPI matematika fakulteti 2-bosqich talabasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
