“TOZA HUDUD” DAVLAT UNITAR KORXONASI ChOR-ATROF TOZALIGINI TAʼMINLAYaPTI

Qoraqalpogʻiston Respublikasi “Toza hudud” davlat unitar korxonasining tumanimizdagi filiali zimmasiga tuman hududidagi asosiy maydon va koʻchalar, yoʻlakchalar qismlarida toʻplanib qolgan chiqindilarni olib tashlash, irrigatsiya tizimlarini tozalash vazifalari yuklangan. Shuningdek, xususiy uy-joy mulkdorlarining shirkatlari, ularning tasarrufida boʻlgan koʻp qavatli uy-joylar atroflarini tozalash ham belgilangan.

Buningdek xizmatlarni bajarishda “Toza hudud” davlat unitar korxonasi tomonidan qattiq maishiy chiqindilarni tashib ketish xizmatini koʻrsatishning tarif miqdorlari Qoraqalpogʻiston Respublikasi Vazirlar Kengashining 2019-yil 7-yanvardagi 1-sonli Qaroriga asosan belgilangan. Bunda aholi jon boshiga jismoniy shaxslarga 2100 soʻm, yuridik tashkilotlarga 1 metr kub chiqindi uchun 46 000 soʻm belgilangan.

Korxonada bu kabi xizmatlarni bajarishga 12 ta maxsus texnikalar, 39 nafar ishchilar jalb qilingan.

Tumanimiz hududi ozoda-orasta boʻlishiga, chiqindilar yigʻilib qolishining oldini olishga qaratilgan saʼy-harakatlarimiz 17 ta ovul, mahallalar hududini qamrab oldi. Yaʼni Chordara, Boyovul, Durunki, Olmazor, Gulzor, Oybek, Beruniy, Boʻston, Doʻstlik, Yangiobod, Farovon, Choykoʻl, Bosuv, Toshyop, Oʻrta qalʼa, Arna boʻyi kabi ovul va mahallalar fuqarolar yigʻinlari bilan ommaviy shartnomalar tuzilib, 42 mingdan ziyod aholiga xizmat koʻrsatilmoqda.

Kelgusida qamrovni yana ham kengaytirish niyatidamiz.

Oʻtgan 2019-yilda 7  ta mahallalardagi koʻp qavatli uylar yoniga filialimiz buyurtmasiga asosan “Gul diyorim” masʼuliyati cheklangan jamiyati tomonidan 9 ta chiqindi yigʻish maydonchalari qurilib, foydalanishga topshirildi va koʻp qavatli uylarda yashovchi aholi foydalanib kelayapti. Kelgusida chiqindi yigʻish maydonchalarini koʻpaytirishni rejalashtirayapmiz.

Joriy yil uchun yuridik tashkilotlar bilan qattiq maishiy chiqindilarni tashib ketish yuzasidan 164 ta shartnomalar imzolandi va xizmat koʻrsatilmoqda.

Chor-atrof chiqindilardan xoli, ozoda, goʻzal boʻlib turishini kim ham istamaydi deysiz?

Ayniqsa, koʻklamda hammayoqni sarishta, obod, koʻkalamzor qilish uchun harakat avj oladi. Bu xalqimizning qon-qoniga singib ketgan azaliy odatlaridan desak, xato boʻlmas. Korxonamiz faoliyati shunday ezgu maqsadga qaratilgani bizga doimo kuch-quvvat bagʻishlaydi. Barchaga Navroʻzi olam muborak boʻlsin!

Shukurullo ShERIMBETOV,
“Toza hudud” DUK tuman filiali boshligʻi.