“BU – MENING ONAM” TADBIPIDA AZIZ VA MUHTAPAMA ONAXONLAP ShAPAFLANDI

Bahor faslining ilk kunidanoq xalqimiz ajib orzular ogʻushiga chulgʻanadi. Yurtimizga bayramlar nafasini olib kelguvchi mart oyi – Oʻzbekning suyukli farzandi – baxt va bahor kuychisi, vafo va sadoqat malikasi Zulfiyaxonim dahosiga samimiy ehtirom tuygʻulariga yoʻgʻrilgan nafis tadbirlar bilan boshlanadi va ayolga, mangu tiriklik va goʻzallik tuygʻulariga toʻlib-toshadi. Ayniqsa, ayol-qizlar bayrami munosabati bilan mamlakatimizda aziz Ayollarni sharaflovchi dilbar davralar tuziladi, fayzli dasturxonlar atrofida bu zoti karimalar madhiga eng sara kuy-qoʻshiqlar jarang sochadi.

Tumanimizdagi 11-sonli umumtaʼlim maktabida boʻlib oʻtgan tadbirda ham munis va mehribon, fidoyi onajonlarga cheksiz ehtirom koʻrsatildi. Maktabning oʻzbek tili va adabiyoti fani oʻqituvchisi Barno Rajabova tomonidan tayyorlangan “Bu – mening onam” adabiy-musiqiy tadbirda 11-“A” va 11-“B” sinflarning 7 nafar zebo qizlari 5 ta shart asosida oʻzaro bellashdilar. Avvalo shuni alohida taʼkidlash kerakki, tadbirning “Bu – mening onam” deb nomlanishida oʻziga xos maʼno va mazmun mujassam: tadbir oʻtkazilgan joy sharqona bezatildi, gullar, 5 ta muhim tashabbusni oʻzida mujassam  etgan koʻrgazma, yashnash va yasharish fasli – bahorga monand tabiat manzaralari ishtirokchilarga xushnudlik bagʻishladi. Ishtirokchi qizlar Mahliyo Yalgʻasheva, Shoira Rajabova, Shahlo Kenjaboyeva, Dilshoda Qoʻshmonova, Komila Sobirova, Tursunoy Bektemirova, Ozoda Qoʻshmonovalar bellashuv shartlarini mahorat bilan bajarishdi. Birinchi shart boʻyicha har bir ishtirokchi oʻzini va albatta mehribon onajoni va oilasini tanishtirish marosimini oʻtkazishdi. Tanishtirishning nazmiy ifoda etilishi yanada hayajonli lahzalarga boy boʻldi. Ular oʻz onajonlariga, tadbir ishtirokchilariga bayram tabriklarini yoʻlladilar.

Ikkinchi shart – mantiqiy savollardan iborat boʻldi. Bu savollarga berilgan javoblar orqali ishtirokchi qizlarning aql-farosati, didi, muomala madaniyati va bilimdonligiga baho berildi.

Uchinchi shartda esa qizlarning sahna va nutqiy  madaniyati sinovdan oʻtkazildi. Bu shartda ishtirokchilar oʻzbek va jahon adabiyoti durdona asarlaridan foydalangan holda 5 ta muhim tashabbusning biri – kitobxonlik saviyasini namoyon etibgina qolmay, oʻzlari sevgan qahramonlar obrazlarini sahnada gavdalantirdilar. Xususan, Tursunoy Bektemirova, Chingiz Aytmatovning “Asrga tatigulik kun” romanidan ona obrazini ijro etib berdi. Komilaxon Sobirova esa Oʻtkir Hoshimovning “Dunyoning ishlari” asaridagi “Gilam paypoq” hikoyasi asosida ona siymosini gavdalantirdi. Mahliyo Yalgʻasheva va Dilshoda Qoʻshmonovalar esa birgalikda kelin salomlar ijro etishdi.

Ishtirokchi qizlarning barchasi bellashuv shartlarida  belgilangan talablar doirasida oʻz mahoratlarini koʻrsatishdi.

“Bu – mening onam” tadbirida ishtirok etgan oʻquvchilarning ota-onalari va tomoshabin oʻqituvchi hamda oʻquvchi-yoshlar qizlarning har bir chiqishini olqishlar bilan kutib oldilar. Boʻlib oʻtgan bayramona tadbir Ayolga – onaga yuksak ehtiromning munosib ifodasi boʻldi va barchada katta taassurot qoldirdi.

Robiya YOʻLDOShEVA.