PARTIYa FAOLLARI VA YoShLAR IShTIROKIDA OBODONLAShTIRISh AKTsIYaSI OʻTKAZILDI

Yurtimizda turli bayramlar, muhim sanalar oldidan  xududlarni obodonlashtirish, ozoda-orasta qilishga intilish yaxshi anʼanaga aylangan. Chunki umumiy uyimiz – yurtimizning obodligi, koʻrkamligi, fayzu tarovati har birimizning intilishimizga bogʻliq. Ayniqsa, bunday ezgu ishlarni hamjihatlikda, birdamlikda bajarish koʻngillarni, maqsadlarni birlashtiribgina qolmasdan ish unumini ham oshiradi. Aytish joizki, bu borada hamkorlikda ish olib borish koʻp ming yillik anʼanalarimizdan biridir.

U nafaqat bir yumushni koʻpchilik boʻlib tez va oson bajarish imkonini berishi, shu bilan bir qatorda, insonlarni birdamlikka, ahillikka va mehr-oqibatga undashi bilan ham muhim ahamiyatga ega.

Joylarda tashkil etilayotgan bunday obodonlashtirish, koʻkalamzorlashtirish, tozalash ishlarida  keksalar ham ishtirok etib,  yoshlarga xalqimizning bir necha yuz yillardan buyon eʼzozlanib kelinayotgan bu kabi urf-odatlari, qadriyatlarining mazmun-mohiyati haqida tushuntirishlar bermoqdalar. Bu esa oʻz navbatida unib-oʻsib kelayotgan yosh avlodning milliy anʼana va qadriyatlarimizga nisbatan hurmat ruhida tarbiya topishlariga yordam beradi.

OʻzMTDP tuman Kengashi tomonidan tumanimizdagi “Yusuf eshon bobo” jomʼe masjidida  “Navroʻzing – yangi kun, yangi davroning muborak, jonajon Oʻzbekistonim” shiori ostida oʻtkazilgan obodonlashtirish aktsiyasida ham yoshlar bilan bir qatorda keksalar, partiyadan saylangan deputatlar faol ishtirok etdilar.

Oʻzbekiston Respublikasi Prezidentining “2020-yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida”gi Qarorining joylardagi ijrosi taʼminlanishiga hissa qoʻshish  maqsadida  oʻtkazilgan aktsiya doirasida Oʻzbekiston “Milliy tiklanish” demokratik partiyasi tomonidan mamlakat hududida koʻkalamzorlashtirish ishlari tashkil etilmoqda. Butun Oʻzbekiston boʻylab 2020-yilning 10-20-mart kunlari davomida partiya faollari va deputatlari tomonidan xududlardagi madaniy meros obʼektlarida umumxalq hasharlari, keng qamrovli obodonlashtirish ishlari oʻtkaziladi.

Obodonlashtirish aktsiyasida OʻzMTDP tuman Kengashi xodimlari, Xalq deputatlari tuman Kengashi deputatlari, “Yusuf eshon bobo” jomʼe masjidi imom xatiblari, tumandagi 56-sonli umumtaʼlim maktab oʻqituvchisi, partiya faoli Azimboy Saparbayev, Xushnud Chorshamovlar hamda 60 nafardan ortiq yoshlar koʻngilli boʻlib  ishtirok etdilar.

Aktsiya davomida “Yusuf eshon bobo” jomʼe masjidi yon-atroflari, yoʻlaklari  tozalandi, tomorqa yerlari tartibga keltirildi hamda har xil  mevali, manzarali daraxtlar, gul koʻchatlari ekildi.

 Yaxshi ishni har kim, har kuni qilishi lozimligi tarbiyaviy mazmundagi kitoblarda koʻp taʼkidlanadi. Bu bilan avvalo insonning oʻzining koʻngli koʻtariladi, tozaradi. Qolaversa, har bir  bir yaxshi  ishning orqasidan ezguliklar yaraladi. Shu maʼnoda olib qaraydigan boʻlsak, oʻtkazilgan aktsiya Navroʻz umumxalq bayrami  oldidan xalqimizning azaliy qadriyatlariga yoshlarning hurmat-eʼtibori namunasi boʻldi, desak adashmaymiz.    

O.RAJABOVA.