Fan va taʼlim 06.03.2020 👁 650

Tumanimizdagi abituriyetlardan DTMning sinov testlari olindi

Soʻnggi yillarda davlat oliy taʼlim muassasalarining bakalavriat taʼlim yoʻnalishlariga qabul test sinovlari jarayoni, koʻpchilik eʼtirof etganidek, shaffof va adolatli oʻtdi. Bu, birinchi navbatda, hukumatimizning mazkur sohada olib borayotgan siyosati, islohotlarining natijasidir. Davlatimizda yoshlarning taʼlim olishlari yoʻlida juda katta imkoniyat va imtiyozlar joriy qilinmoqda.

2019/2020 oʻquv yilida davlat oliy taʼlim muassasalari va ularning filiallariga oʻqishga qabul qilish boʻyicha test sinovlari katta sigʻimli binolarda oʻtkazildi. Binolarga shaxsni identifikatsiyalash qurilmalari, videokuzatuv moslamalari, biometrik va mobil aloqa toʻlqinlarini toʻsuvchi qurilmalar oʻrnatildi, binolarda moʻʼtadil havo harorati taʼminlandi.

Joriy 2020/2021 oʻquv yili uchun oʻtkaziladigan test sinovlari ham har tomonlama shaffof, adolatli oʻtkazilishi uchun tayyorgarlik ishlari boshlab yuborildi.

Tumanimizdagi barcha abituriyentlarning test sinovlariga tayyorgarliklarini yanada oshirish maqsadida 40-sonli umumtaʼlim maktabida tuman XTB va “Lider” oʻquv markazi bilan hamkorlikda DTM testlarini olish tadbiri tashkil etildi. Mazkur tadbirga DTM Qoraqalpogʻiston Respublikasi boʻlimi xodimlari, xususan, boʻlim boshligʻi Muzaffar Abdullayev ham tashrif buyurdi. Test sinovlari jarayoniga tumanimizdagi jami 474 nafar abituriyentlar ishtirok etib, oʻz bilimlarini sinovdan oʻtkazish imkoniyatiga ega boʻldilar.

Alohida taʼkidlash kerakki, taʼlim sohasiga oid olib borilayotgan dolzarb islohotlarni tushungan holda targʻib qilish, toʻgʻri yoʻnaltirish, xalqning keng qatlami, ayniqsa, yoshlar eʼtiboriga yetkazish eng asosiy vazifalardan biridir. Yoshlarimizning kelajagini belgilovchi ushbu islohotlarni amalga oshirish uchun ulkan masʼuliyat talab etiladi.

Aytish joizki, 2019-yilning 14-may kuni Oʻzbekiston Pespublikasi Prezidentining “Oliy taʼlim muassasalariga test sinovlari orqali qabul qilish tizimini takomillashtirish boʻyicha qoʻshimcha chora-tadbirlar toʻgʻrisida” qarori mazkur jarayondagi munosabatlarni tartibga solishda muhim hujjat boʻldi.

Shuningdek, 2019-yil 19-dekabr kuni tegishli vazirlik va tashkilotlarning taklif va tavsiyalari asosida Oʻzbekiston Pespublikasi Taʼlim muassasalariga qabul qilish boʻyicha Davlat komissiyasining 11-son Bayoni bilan taʼlim yoʻnalishlari boʻyicha fanlar majmuasi tasdiqlandi.

Maʼlumki, avvalgi yillarda test sinovlari 3 ta fandan jami 90 ta test savollari fanlar ketma-ketligi boʻyicha 1.1, 2.1, 3.1 ballar bilan baholangan boʻlsa, 2020/2021 oʻquv yilidan boshlab mazkur qoida butunlay oʻzgardi, shuningdek, barcha test sinovlari topshiriladigan taʼlim yoʻnalishlari boʻyicha majburiy fanlar qoʻshildi. Shu tariqa 5 ta fandan test sinovlari topshirish belgilandi.

Bunday oʻzgarishlar, tabiiyki, abituriyentlardan yanada chuqurroq ilm sirlarini egallashni talab qililish bilan birga tayyorgarlik jarayonlariga katta masʼuliyat bilan yondashishni talab qiladi.

Maʼlumot oʻrnida aytish joizki, bugungi kunda oʻtkazilayotgan diagnostik test sinovlari oldingi yillardagidan farq qiladi. Endi har bir fuqaro bu xizmatdan foydalanish imkoniyatiga ega. Buning uchun abituriyent davlat test markazining saytidan roʻyxatdan oʻtib, tegishli fanlar boʻyicha bir yoki bir nechta test topshiriqlariga buyurtma qilishi mumkin.

Bu xizmatlar abituriyent uchun juda ahamiyatli hisoblanadi. Yaʼni abituriyent test topshiriqlarining tuzilish formalari, qiyinchilik darajasi, test topshiriqlari bazasi bilan ishlaganda vaqtdan unimli foydalanishni oʻrganadi. Abituriyent test topshiriqlari kitobi va javoblar varaqasi bilan ishlashish koʻnikmasiga ega boʻladi va oʻzni psixologik jihatdan tayyorlab boradi.

Tumanimizdagi abituriyentlarga oʻz bilimlarini sinash imkonini bergan mazku test sinovlari shaffof tarzda oʻtkazildi. Mazkur jarayonni tashkil qilgan masʼullar endilikda har oyda bir marta abituriyentlarga ushbu imkoniyatni yaratib berishni rejalashtirishmoqda. Keyingi test sinovi mart oyining 15-sanasida oʻtkazilishi kutilmoqda.